Қазақстан Республикасының Мемлекеттік құпияларды қорғау жөніндегі агенттігі туралы

Жаңа

Қазақстан Республикасы Президентінің Жарлығы 1999 жылғы 13 мамыр N 139

      Қазақстан Республикасы Конституциясының 44-бабының 3) тармақшасына және "Мемлекеттік құпиялар туралы" Заңының 5-бабына сәйкес қаулы етемін:
      1. Қазақстан Республикасы Үкіметінің құрамына кірмейтін орталық атқарушы орган ретінде Қазақстан Республикасының Мемлекеттік құпияларды қорғау жөніндегі агенттігі (бұдан былай - Агенттік) құрылсын. см. U020931
      2. Агенттік мемлекеттік құпияларды қорғау саласында бірыңғай мемлекеттік саясатты жүзеге асырады деп белгіленсін.
      3. Агенттікке мынадай негізгі функцияларды атқару жүктелсін:
      1) мемлекеттік органдар мен ұйымдарда құпиялылық режимін қамтамасыз ету жөніндегі жұмысты үйлестіру;
      2) мемлекеттік құпияларды қорғау жөніндегі құқықтық, әкімшілік, экономикалық, техникалық, бағдарламалық және криптографиялық шаралар жүйесін әзірлеу, олардың Қазақстан Республикасы аумағында орындалуын бақылау;
      3) мемлекеттік құпияларды қорғау жөніндегі мемлекеттік бағдарламаны, нормативтік және әдістемелік актілерді әзірлеу мен орындау мүдделерін көздеп мемлекеттік құпияларды қорғау органдарының қызметін үйлестіріп отыру;
      4) мемлекеттік органдардың мәліметтерді мемлекеттік құпияларға жатқызу жөнінде өкілеттік берілген лауазымды адамдарының тізбесін әзірлеу және оны бекітуге Мемлекет басшысына ұсыну;
      5) Қазақстан Республикасында Құпиялылық режимін қамтамасыз ету жөніндегі нұсқаулықты әзірлеу;
      6) мемлекеттік құпиялар болып табылатын мәліметтерді қорғаудың техникалық құралдарын сертификаттау тәртібін әзірлеу;
      7) мемлекеттік құпиялар болып табылатын мәліметтерді жария етудің немесе жоғалтудың салдарынан Қазақстан Республикасының ұлттық қауіпсіздігіне немесе мемлекеттік органдар мен ұйымдардың мүдделеріне келтірілген немесе келтірілуі мүмкін зиянның, сондай-ақ мәліметтердің құпияландырылуы нәтижесінде олардың көздері иесіне келтірілген зиянның мөлшерін айқындау тәртібін әзірлеу;
      8) мемлекеттік органдар мен ұйымдарды Қазақстан Республикасының айрықша режимді, режимді және ерекше қорғалатын объектілерінің санатына жатқызу тәртібін әзірлеу;
      9) мемлекеттік құпияларды қорғау саласындағы мемлекеттік бағдарлама мен мемлекеттік құпияларды қорғау жөніндегі жұмыстарды материалдық-техникалық және қаржылай қамтамасыз ету тәртібін әзірлеу;
      10) мемлекеттік құпияларды қорғау жөніндегі бөлімшелердің кадрларын даярлау мен қайта даярлауды ұйымдастыру;
      11) мемлекеттік органдар мен ұйымдарға мемлекеттік құпиялар болып табылатын мәліметтерді қорғау мәселелері жөнінде практикалық және әдістемелік көмек көрсету;
      12) Қазақстан Республикасының азаматтарына оларға мемлекеттік құпияларға рұқсат етуге байланысты арнаулы тексеру жүргізу тәртібін әзірлеу және оны Қазақстан Республикасының Үкіметіне бекітуге ұсыну.
      4. Қазақстан Республикасы Президенттің "Қазақстан Республикасы Үкіметінің құрылымы туралы" 1999 жылғы 22 қаңтардағы N 6 Жарлығының 1-тармағы мынадай мазмұндағы абзацпен толықтырылсын: "Қазақстан Республикасының Мемлекеттік құпияларды қорғау жөніндегі агенттігі".
      5. Қазақстан Республикасының Үкіметі бір ай мерзімде:
      1) бірқатар орталық атқарушы органдардың штат санын қысқарту есебінен Агенттіктің штат санын белгілесін;
      2) Агенттікті қаржыландыруды 1999 жылғы республикалық бюджетте көзделген қаржы есебінен қамтамасыз етсін және Агенттікті қамту үшін жыл сайын республикалық бюджет жобасында қаражат қарастыратын болсын;
      3) Агенттікке жүктелген функциялар мен Агенттікке берілген штат саны көлемінде Агенттікке қажетті материалдық-техникалық жабдықтар мен басқа да мүлікті беретін болсын;
      4) Агенттіктің ережесі мен құрылымын бекітсін;
      5) Қазақстан Республикасы Үкіметінің бұрын шығарылған актілерін осы Жарлыққа сәйкес келтірсін;
      6) осы Жарлықтан туындайтын өзге де шаралар қолдансын.
      6. Осы Жарлықтың орындалуын бақылау Қазақстан Республикасы Президентінің Әкімшілігіне жүктелсін.
      7. Осы Жарлық қол қойылған күнінен бастап күшіне енеді.

       Қазақстан Республикасының
            Президенті
 

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады