Ескерту. Күші жойылды - Солтүстік Қазақстан облыстық әкімдігінің 20.08.2013 N 281 қаулысымен
«Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасының 2001 жылғы 23 қаңтардағы № 148 Заңының 27-бабы 1-тармағы 2) тармақшасына, «Мемлекеттік мүлік туралы» Қазақстан Республикасының 2011 жылғы 1 наурыздағы № 413-IV Заңының 75-бабы 3-тармағына сәйкес облыс әкімдігі ҚАУЛЫ ЕТЕДІ:
1. Қоса берілген Солтүстік Қазақстан облысының коммуналдық мүлкін сенімгерлікпен басқаруға беру қағидасы бекітілсін.
2. Осы қаулының орындалуын бақылау облыс әкімінің бірінші орынбасары А.С. Сапаровқа жүктелсін.
3. Осы қаулы оны алғаш ресми жариялаған күннен бастап он күнтізбелік күн өткеннен кейін қолданысқа енгізіледі.
Облыс әкімі С. Біләлов
Солтүстік Қазақстан облысы
әкімдігінің 2012 жылғы
23 ақпандағы № 41
қаулысымен бекітілді
Солтүстік Қазақстан облысының коммуналдық мүлкін сенiмгерлiкпен басқаруға беру қағидасы
1. Жалпы қағидалар
Осы Қағида Қазақстан Республикасының Азаматтық кодексiне, Қазақстан Республикасының «Қазақстан Республикасындағы жергілікті басқару және өзін-өзі басқару туралы» 2011 жылғы 23 қаңтардағы, «Мемлекеттік мүлік туралы» 2011 жылғы 1 наурыздағы заңдарына сәйкес әзірленді және Солтүстік Қазақстан облысының коммуналдық мүлкін сенiмгерлiкпен басқаруға берудің негізгі қағидаттарын, тәртіптері мен қағидаларын айқындайды.
2. Негізгі ұғымдар
1. Осы Солтүстік Қазақстан облысының коммуналдық мүлкін сенiмгерлiкпен басқаруға беру Қағидасында қолданылатын негізгі ұғымдар:
1) теңгерім ұстаушы – шұғыл басқару немесе шаруашылық жүргізу құқығында коммуналдық мемлекеттік мүлкі бар мемлекеттік мекеме, мемлекеттік кәсіпорын;
2) сенiмгерлiкпен басқару – сенiмгерлiкпен басқарушының өз атынан оның иелігіне және пайдалануына берілген мүлікті басқару, егер басқасы шартта немесе заңнамалық актіде, пайда алушының мүддесінде көзделмесе;
3) сенiмгерлiкпен басқарушы – коммуналдық мүлікті сенімгерлікпен басқарушы құрылтайшысымен сенімгерлікпен басқару шартын жасаған жеке тұлғалар және мемлекеттік емес заңды тұлғалар;
4) шарт – Құрылтайшы мен Сенiмгерлiкпен басқарушы арасында жасалған Объектіні сенiмгерлiкпен басқару шарты, ол бойынша бір тарап (сенiмгерлiкпен басқару құрылтайшысы) екінші тарапқа (сенiмгерлiкпен басқарушыға) мүлікті сенiмгерлiкпен басқаруға береді, ал екінші тарап осы мүлікті сенiмгерлiкпен басқару құрылтайшысы немесе құрылтайшымен көрсетілген тұлға (пайда алушы) мүддесінде басқаруды жүзеге асыруға міндеттенеді;
5) коммуналдық заңды тұлғалар – мүлкі Солтүстік Қазақстан облысының коммуналдық меншігіндегі коммуналдық мемлекеттік кәсіпорындар мен коммуналдық мемлекеттік мекемелер;
6) жергілікті атқарушы орган (әкімдік) – облыс (аудан, Петропавл қаласы) әкімі басшылық ететін, өз құзыреті шегінде тиісті аумақта жергілікті мемлекеттік басқару мен өзін-өзі басқаруды жүзеге асыратын алқалы атқарушы орган;
7) объект – мемлекеттік коммуналдық кәсіпорындардың мүліктік кешенi, бағалы қағаздар, мүліктік құқықтар (жарғылық капиталға қатысу үлесi), мемлекетке тиесілі ақша, сондай-ақ Қазақстан Республикасының Азаматтық кодексінде және Қазақстан Республикасының өзге де заңдарымен көзделген жағдайларда сенiмгерлiкпен басқару шартының объектісі болып табылатын өзге де мемлекеттік коммуналдық мүлік;
8) басқару органы - акционерлiк қоғам акцияларының мемлекеттiк пакетiн, жауапкершiлiгi шектеулi серiктестiктiң жарғылық капиталындағы мемлекеттiң үлесiн иелену және пайдалану құқығын жүзеге асыратын мемлекеттiк орган, сондай-ақ коммуналдық мемлекеттік кәсіпорындар мен коммуналдық мемлекеттік мекемелерді мемлекеттiк басқару органы;
9) коммуналдық мүлікті сенiмгерлiкпен басқару құрылтайшысы (бұдан әрі – Құрылтайшы) – облыстың (ауданның, Петропавл қаласының) әкімдігімен облыстың (ауданның, Петропавл қаласының) коммуналдық мүлкін басқаруға, соның ішінде облыстың (ауданның, Петропавл қаласының) коммуналдық мүлкін сенiмгерлiкпен басқаруға беру туралы шарт жасауға уәкілетті атқарушы орган.
2. Объектiнi сенiмгерлiкпен басқару сенiмгерлiкпен басқару шарты бойынша мәмiле негiзiнде туындайды (белгіленеді).
3. Объектілерді сенiмгерлiкпен басқаруға беру ашық тендер (бұдан әрі – Тендер) нәтижелері бойынша жүзеге асырылады.
4. Объектiнi кейін сатып алу құқығымен немесе кейін сатып алу құқығынсыз сенiмгерлiкпен басқаруға беру туралы шешімді облыстың (ауданның, Петропавл қаласының) жергілікті атқарушы органы қабылдайды.
5. Табиғи монополия субъектілері немесе тауар нарығында басым (монополиялық) жағдайда тұрған, не болмаса стратегиялық маңызы бар нарық субъектілері болып табылатын ұйымдардың мүліктік кешендерін немесе акцияларының мемлекеттік пакетін (жауапкершілігі шектеулі серіктестіктердің қатысу үлестерін) сенiмгерлiкпен басқаруға ілгеріде сатып алу құқығымен беру туралы шешім Қазақстан Республикасының Азаматтық кодексінде және «Мемлекеттік мүлік туралы» Қазақстан Республикасының 2011 жылғы 1 наурыздағы Заңында көзделген ерекшеліктерді ескеріп қабылданады.
6. Сенiмгерлiкпен басқарушының Объектіні сатып алу жағдайлары Шартта айқындалады. Шарт қандай мерзiмде және қандай жағдайларды орындаған кезде Объект Сенiмгерлiкпен басқарушының меншiгiне ауысатынын көздеуi тиіс.
Сенiмгерлiкпен басқарушыға Объектiнi сатуға онымен Шарттың барлық жағдайы тиiсiнше орындалған жағдайда ғана жол берiледi.
7. Объектілерді заңды тұлғалардың жарғылық капиталы төлемінің есебіне бергенге дейін Объектілер тендер өткізусіз сенiмгерлiкпен басқаруға ілгеріде сатып алу құқығынсыз берілуі мүмкін.
8. Объектінің теңгерім ұстаушысы Объект туралы мәлiметтердiң анықтағаны үшiн және Объектіні Сенiмгерлiкпен басқарушыға қабылдау-тапсыру актісі бойынша беру сәтіне дейін оның сақталуы үшін жауапкершілікке ие.
3. Коммуналдық мүлікті сенiмгерлiкпен басқаруға беру тәртібі
9. Сенiмгерлiкпен басқару құрылтайшысы сенiмгерлiкпен басқаруды құру мақсатында:
1) Тендердi ұйымдастырады (тендерлiк комиссияның құрамы мен жұмыс регламентiн бекiтедi, Тендерге қатысушыларды тiркейдi, ақпараттық хабарларды жариялауды қамтамасыз етедi);
2) кепiлдi жарналар қабылдайды;
3) «Қазақстан Республикасындағы бағалау қызметі туралы» Қазақстан Республикасының 2000 жылғы 30 қарашадағы Заңына сәйкес Объектiнi бағалау жөнiнде қызметтер көрсетуге шарт жасайды;
4) Тендерді өткiзу барысына бақылауды жүзеге асырады;
5) Сенiмгерлiкпен басқарушымен Шарт жасайды;
6) Шарт жағдайларының орындалуын бақылауды жүзеге асырады;
7) сенiмгерлiкпен басқаруға берілетін Объектінің ерекшелігіне қарай Объектiнi сенiмгерлiкпен басқаруға берумен байланысты өзге де функцияларды жүзеге асырады.
10. Акциялары және жарғылық капиталындағы мемлекеттiң қатысу үлесi сенiмгерлiкпен басқаруға беру Объектiсi болып табылатын мемлекеттiк заңды тұлғалардың, сондай-ақ мемлекеттiк емес заңды тұлғалардың лауазымды тұлғалары Құрылтайшының сұрауы бойынша Объектiнi сенiмгерлiкпен басқаруға беруге дайындау үшiн қажет мәлiметтердi олар айқындайтын мерзiмдерде ұсынады және ұсынылып жатқан мәлiметтердiң анықтығы үшiн жауапкершілікке ие.
11. Объектiнi сенiмгерлiкпен басқаруға беру шарттары Сенiмгерлiкпен басқарушының мыналарға қатысты мiндеттемелерi болуы мүмкін:
1) Объект қызметінің бейінін сақтау;
2) Объектіні реконструкциялау немесе күрделі жөндеу немесе қалпына келтіру бойынша іс-шараларды орындау;
3) Объектiге инвестициялардың көлемдерi, түрлерi және мерзiмдерi бойынша міндеттемелер;
4) өнiмнiң көлемдерiнің, шығарылатын өнiмнiң немесе көрсетiлетiн қызметтердiң түрлерi мен номенклатурасының белгілі деңгейін қамтамасыз ету;
5) белгілі бір тұтынушыларға өнiмдер жеткiзу;
6) баға белгiлеуге, соның iшiнде бағалардың шектi деңгейi бойынша шектеулер;
7) табиғатты қорғау iс-шараларын өткiзу;
8) жұмыс орындарының бар немесе Шартта айқындалған санын сақтап қалу немесе жаңа жұмыс орындарын құру;
9) еңбекті қорғауға, әлеуметтік кепілдіктерді қамтамасыз етуге, Объект қызметкерлерінің өмірі мен денсаулығын сақтандыруға, Объектіні сақтауға қатысты нормалар мен қағидаларды ұстану;
10) Сенiмгерлiкпен басқару Объектісінің өндiрiстiк және әлеуметтiк инфрақұрылым объектiлерiн пайдалану тәртiбi;
11) Объектiнiң берешектерiн Шартта белгiленген мерзiмдерде өтеу;
12) Сенiмгерлiкпен басқарушының ілгеріде Объектiнi сатып алуы;
13) Шартта белгiленген уақыт кезеңi iшiнде Объектiге қатысты мәмiлелер жасауды шектеу және/немесе белгiлi бір қызметтерге тыйым салу;
Басқару органымен және/немесе тендерлік комиссиямен сенiмгерлiкпен басқаруға берілетін Объектінің ерекшелігі ескеріліп, қосымша критерийлер ұсынылуы мүмкін.
12. Рентабельдi емес коммуналдық мемлекеттік кәсiпорындарды сенiмгерлiкпен басқаруға беру кезінде рентабельді емес кәсіпорындардың тізбесін құру бойынша ұсыныстарды Басқару органы Құрылтайшыға енгізеді:
Рентабельдi емес коммуналдық мемлекеттік кәсiпорындарды тәуелсіз басқарушымен сенiмгерлiкпен басқаруға берілетін Объектілер тізбесіне енгізуге мыналар негіз болып табылады:
1) ағымдық, негiзгi және негiзгi емес қызметтiң рентабельдiлiгi көрсеткiштерiнiң үш жылдың iшiнде төмендеуi және/немесе олардың жоспарланған мөлшерлерiн қамтамасыз етпеуi;
2) қатарынан үш жылдың iшiнде таза табыс бойынша жоспарлы көрсеткiштердi орындамауы;
3) үш жылдан астам мерзiмi өткен кредиторлық берешек.
13. Тендер шарттарын Құрылтайшы бекітеді.
14. Тендердi ұйымдастыру және өткiзу үшiн Құрылтайшы Тендерлiк комиссия құрады, оның құрамына Құрылтайшының, Теңгерім ұстаушының, Теңгерім ұстаушыны мемлекеттік басқару органының, мүдделі ұйымдардың, аумақтық әділет органдарының (келісім бойынша) өкілдері кiредi.
Тендерлiк комиссия мүшелерiнiң саны 5 адамнан кем болмауы тиiс.
Тендерлiк комиссияның құрамы, соның ішінде Тендерлiк комиссияның төрағасы мен хатшысы Құрылтайшының бұйрығымен (өкімімен) тағайындалады және Құрылтайшының лауазымдық тұлғалары болып табылады.
15. Құрылтайшы Тендер өткізу туралы шешім қабылдау кезінде:
1) тендерді өткізу күні мен орнын, оның жағдайларын, тендер жеңімпазын таңдау критерийлерін айқындайды;
2) тендерлік комиссия қалыптастырады;
3) тендерлік құжаттаманы бекітеді;
4) кепілді жарналарды қабылдайды;
5) тендерлік комиссия отырысының хаттамаларын бекітеді;
6) тендер жеңімпазымен сенiмгерлiкпен басқару шартын жасауды қамтамасыз етеді;
7) Тендер аяқталғаннан кейін, осы Қағиданың 31-тармағында белгіленген жағдайларды есептемегенде, Тендер қатысушыларына кепілді жарналарды қайтарады.
16. Тендерлік комиссияның ұйымдастырушылық қызметін тендерлік комиссияның хатшысы қамтамасыз етеді. Тендерлік комиссияның хатшысы тендерлік комиссия мүшесі болып табылмайды және тендерлік комиссия шешім қабылдаған кезде дауыс беру құқығы болмайды.
Тендерлiк комиссияның хатшысы: тендерлік комиссия отырысының күн тәртібін қалыптастырады, тендерлік комиссияны қажетті құжаттармен қамтамасыз етеді, Тендерге қатысуға өтініштерді қабылдайды, оларды тіркеуді жүзеге асырады, тендерлік комиссия отырысын өткізуді ұйымдастырады; тендерлік өтінімдері бар конверттерді ашу хаттамасын, тендерге қатысуға рұқсат беру туралы хаттаманы, тендер қорытындылары туралы хаттаманы, сондай-ақ тендерлік комиссия отырысының басқа да хаттамаларын ресімдейді және оларға қол қояды, тендер құжаттары мен материалдарының сақтаулылығын қамтамасыз етеді.
17. Тендерлік комиссия белгілеген мерзімде және ол Объект туралы ұсынған мәліметтер негізінде:
1) Тендер шарттарын айқындайды;
2) оны ілгерде сатып алу құқығымен сенiмгерлiкпен басқаруға беру туралы шешім қабылданған жағдайда ағымдағы құн - Объект құнын бекітеді. Объектінің ағымдағы құнын «Қазақстан Республикасындағы бағалау қызметі туралы» Қазақстан Республикасының 2000 жылғы 30 қарашадағы Заңына сәйкес тәуелсіз бағалаушы есебінің негізінде тендерлік комиссия бекітеді.
3) Тендер жеңімпазын анықтаудың негізгі шарттарын (критерийлерін) айқындайды;
4) кепiлдi жарнаның мөлшерiн анықтайды;
5) тендер жариялау үшін Тендерлік құжаттама мен құжаттар дайындайды;
6) Тендер өткізеді;
7) Тендер жеңiмпазын хабарлайды;
8) Тендер жеңімпазын немесе Тендер нәтижесі бойынша өзге де шешімді айқындайтын қорытындыдан тұратын тендерлік комиссия отырысының хаттамасына қол қояды;
18. Объектiнi сенiмгерлiкпен басқаруға беруге дайындауды Құрылтайшы жүзеге асырады.
19. Басқару органы Құрылтайшыға мүліктік кешені немесе мүлкі немесе акциялары (үлестерi) Объект болып табылатын заңды тұлғаның құрылтай құжаттарын, соңғы екi жыл iшiндегi қаржы-шаруашылық қызмет туралы толық ақпаратты, Объектiнi сенiмгерлiкпен басқаруға беру жөнiндегi шарттарды белгiлеу туралы ұсынысты ұсынады.
20. Тендердi өткiзуге дайындық кезiнде Құрылтайшы Объект туралы ақпаратты жинауды, ақпараттық хабарды уақытылы жариялауды қамтамасыз етедi, Тендерге қатысуға өтiнiмдердi қабылдауды және тiркеудi, бағалауды (Объектiнi ілгеріде сатып алу құқығымен сенiмгерлiкпен басқаруға берген жағдайда) жүргiзедi, келiп түскен материалдарды Тендерлiк комиссияның қарауына жiбередi.
21. Объектіні ілгерде сатып алу құқығымен сенiмгерлiкпен басқаруға беру бойынша бірінші Тендер өткізу кезінде ағымдағы құн бастапқы бағаға тең болады.
Екінші және одан кейінгі Тендерлерде ағымдағы баға тендерлік комиссия шешімімен өзгертілуі мүмкін.
22. Тендер өткізілетіні туралы ақпараттық хабарлама тендер өткізу жарияланған күнге дейiн 15 күннен кешіктірмей қазақ және орыс тiлдерiнде мерзiмдiк баспа басылымдарда жариялануы тиіс, ал коммуналдық меншіктегі акционерлік қоғамдардың акцияларын және жауапкершілігі шектеулі серіктестіктердің жарғылық капиталындағы қатысу үлестерін сенiмгерлiкпен басқаруға беру кезінде – тендерді өткізуге дейін кемінде 30 күнтізбелік күннен кешіктірмей.
23. Ақпараттық хабарлама мыналарды қамтуы тиіс:
1) Объект туралы оның атауын, орналасқан жерін, қысқаша сипаттамасын қоса алғанда, сондай-ақ Теңгерім ұстаушының атауы мен мекенжайы туралы мәліметтер;
2) сенiмгерлiкпен басқару мерзімі;
3) Тендер шарттары және жеңiмпазды анықтау критерийі;
4) Тендердi өткiзу датасы, уақыты мен орны;
5) кепiлдiк жарнаның мөлшерi, мерзімі және тәртібі;
6( Тендерге қатысуға өтiнімді қабылдау мекенжайы және мерзімдері;
7) Тендерге қатысуды ресімдеу тәртібі туралы дерек;
8) Тендерге қатысуға қажетті құжаттар тізбесі;
9) сенiмгерлiкпен басқаруға берілетін объектінің ерекшелігіне байланысты басқа да ақпарат;
24. Тендерлiк комиссия тендер шарттарын өзгерткен жағдайда, барлық өзгерiстер туралы хабарлама шегінде тендердi өткізуге дейін кемінде 5 күнтізбелік күн қалғанда жариялануы тиiс.
Тендер шарттары өзгергендiгi туралы хабарлама жарияланғанға дейiн тендерге қатысуға өтiнiм берген және осыған байланысты тендерге қатысудан бас тартқан тұлғалар кепiлдiк жарнаны толық көлемде қайтаруды талап етуге құқылы.
25. Мүліктік кешені немесе мүлкі немесе акциялары (үлестерi) сенiмгерлiкпен басқару объектiсi болып табылатын әрбiр заңды тұлға бойынша ақпараттық хабарлама жарияланғанға дейiн Құрылтайшы мына құжаттардың көшiрмелерiнен тұратын құжаттар пакетiн дайындауы тиiс:
1) Тендерге шығарылатын Объектінің жарғысы, егер шығарылатын Объект мемлекеттік кәсіпорын немесе акционерлік қоғам не болмаса жауапкершілігі шектеулі серіктестік болса;
2) эмиссияны тiркеу туралы куәлiк (акционерлік қоғамдар үшін);
3) есептi кезең алдындағы жылға қосымшалары бар бухгалтерлiк теңгерімдер;
4) заңды тұлғаны тiркеу туралы куәлiк;
5) акционерлік қоғамдар акционерлерінің немесе жауапкершілігі шектеулі серіктестіктердің қатысушыларының тізілімінен үзiнді;
6) жарғылық капиталға кірген, олардың құны көрсетілген негізгі құралдардың тізбесі;
7) кредиторлық және дебиторлық берешектердің ажыратылымы;
8) мемлекеттiк кәсiпорындар мен мекемелер, мемлекеттiң қатысуымен заңды тұлғалардың тiзiлiмiнен үзiндi;
9) әлеуметтік сала объектілерінің құны көрсетілген олардың тізбесі (акцияларының мемлекеттік пакеті мен мемлекеттік үлестері тендерге шығарылатын акционерлік қоғамдар мен жауапкершілігі шектеулі серіктестіктер ұсынады);
10) сенiмгерлiкпен басқаруға берілетін Объектінің ерекшелігіне байланысты Құрылтайшының қарауы бойынша басқа да құжаттар.
Құжаттар пакетiне, сондай-ақ Құрылтайшының тапсырмасы бойынша тәуелсiз кеңесшiлермен өткiзiлген жұмыс iстеудiң кешендi мониторингi және Объектiнi басқару тиiмдiлiгi негiзiнде қосымша мәлiметтер, сондай-ақ инвестордың тәуекелдік факторларының талдауы, ұйымды техникалық қайта жабдықтаудың ықтимал нұсқалары туралы мәліметтер, кірістілік есептеулері, өндіріске қажетті инвестициялардың көлемін бағалау, өндірілетін өнімнің әлемдік немесе ішкі нарықта өтімділігін бағалау және сол сияқтылар қамтылуы мүмкiн.
Ақпараттық хабарлама жарияланғаннан кейiн Құрылтайшы Тендерге қатысушы болғысы келетіндер Объект туралы ақпаратқа және осы Қағидаға қолжетiмдiлiктi қамтамасыз етедi.
26. Тендерге қатысушылар Тендердi өткiзу туралы ақпараттық хабарламада көрсетiлген мөлшерде, мерзiмдерде және тәртiпте кепiлдiк жарна салады.
Кепiлдiк жарнаның мөлшерi ақпараттық хабарлама жарияланғаннан кейiн өзгертiлуі мүмкін емес. Кепiлдiк жарна Қатысушы атынан кез келген басқа жеке немесе заңды тұлғамен салына алады.
Кепiлдiк жарнаны алушы Құрылтайшы болып табылады.
27. Тендерге қатысу үшiн кепiлдiк жарна әр Объект үшін дербес Объектіні кейін сатып алу құқығымен сенiмгерлiкпен басқаруға беру кезінде оның ағымдағы құнынан және Объектiнi сенiмгерлiкпен басқаруға кейiн сатып алу құқығынсыз беру кезінде қалдық теңгерімдік құнынан 10 пайыз шегiнде белгiленедi.
28. Кепiлдiк жарна Қатысушының мына мiндеттемелерiн қамтамасыз ететiн болып табылады:
1) жеңген жағдайда Тендер нәтижелерi туралы хаттамаға қол қою;
2) Құрылтайшымен Шарт жасасу;
3) (сенiмгерлiкпен басқару шарты бойынша міндеттерді дұрыс орындау.
29. Құрылтайшы кепiлдiк жарнаны келесі жағдайларда қайтармайды:
1) Тендерге қатысушыларға, егер олар осы Қағиданың 24-тармағының екiншi абзацында көзделген жағдайларды қоспағанда, Тендерге қатысудан оны өткiзгенге дейiн кемiнде 3 күнтізбелік күн бұрын бас тартса;
2) Тендер жеңімпазына, егер ол тендер нәтижелері туралы хаттамаға қол қоюдан не болмаса сенiмгерлiкпен басқару шартын жасаудан бас тартса;
3) сенiмгерлiкпен басқарушыға, егер сенімгерлікпен басқару шарты бойынша міндеттердің орындалмауы немесе дұрыс орындалмауынан шарт бұзылса.
30. Тендерде жеңген және ілгерде сатып алу құқығымен сенiмгерлiкпен басқару шартын жасаған Қатысушының кепілді жарнасы сатып алу-сату шарты бойынша төленетін төлемдер есебіне жатқызылады.
31. Осы Қағиданың 29, 30-тармақтарында жазылғандардан басқа барлық жағдайларда кепiлдiк жарна Тендер аяқталған күннен бастап 10 банктiк күннен кешiктiрмей, ал егер ақша Құрылтайшы шотына Тендер өткiзiлгеннен кейiн түссе, онда олар түскен күннен бастап 10 банктiк күн iшiнде қайтарылады.
32. Тендерге қатысушыларды тiркеу ақпараттық хабарлама жарияланған күннен бастап жүргiзiледi және Тендер басталғанға дейiн жиырма төрт сағат бұрын аяқталады.
33. Тендерге Қатысушы ретінде тiркеу үшiн заңды тұлға мыналарды ұсынуы қажет:
1) Тендерге қатысушыны Тендер жеңiмпазы деп хабарлаған жағдайда оның жазбаша мiндеттемесiн бiлдiретiн Тендерге қатысу өтiнiмiн, ақпараттық хабарламада көрсетiлген және Тендерге қатысушының өзiмен ұсынылған Тендер қағидаларында Шарт жасасу;
2) тендер шарттары бойынша жазбаша түрдегi Тендермен байланысты құжаттаманы қоса берiп, басқа құжаттардан бөлек конвертте жапсырылған ұсыныстарды;
3) инвестициялық жобаларды негіздеу әдістемесіне сәйкес экономикалық және коммерциялық есеп айырысулары бар техникалық-экономикалық негіздемелерді;
4) Тендер шарттары бойынша жеке конвертте жапсырылған жазбаша нысандағы бизнес-жоспар;
5) ықтимал Тендерге қатысушының банк (банктер) алдында тендерлiк өтiнiмдер бар конверттердi ашу күнiнiң алдындағы үш айдан артыққа бiрiншi басшы немесе қол қою құқығы бар тұлға және бас бухгалтер қол қойған банктiң (банктердiң) мөрi бар мерзiмi өткен берешектерiнiң жоқтығы туралы банктiң (банктердiң) анықтамасын.
Егер, ықтимал Қатысушы екiншi деңгейдегi бiрнеше банктердiң немесе филиалдардың, сондай-ақ шетелдік банк клиентi болып табылған жағдайда, осы анықтама мұндай банктердiң әрқайсысынан ұсынылады;
6) соңғы қаржы жылы үшiн Қазақстан Республикасының заңнамалық актiлерiмен мiндеттi аудиттi өткiзу белгiленген заңды тұлғалардың аудиторлық есебiн;
7) заңды тұлғаны мемлекеттiк тiркеу (қайта тiркеу) туралы куәлiктiң түпнұсқасы мен көшірмесін;
8) ықтимал тендер Қатысушысының бiлiктiлiгiн растайтын бiлiктiлiк туралы лицензия және/немесе патенттердiң, куәлiктердiң, басқа да құжаттардың түпнұсқасы мен көшірмесі қоса берілген мәлiметтерді;
9) Тендерге қатысушы жарғысының түпнұсқасы мен көшірмесін.
Шетелдік заңды тұлғалар құрылтай құжаттарын мемлекеттiк және орыс тiлдерiнде нотариалды куәландырған көшiрмесiн;
10) ықтимал Тендерге Қатысушының төлеу мерзiмi Қазақстан Республикасының заңнамасына сәйкес ұзартылған жағдайды алып тастағанда тендерлiк өтiнiмдер бар конверттердi ашу күнiнiң алдындағы үш айдан астам уақытқа бiрiншi басшы немесе қол қою құқығы бар тұлға қол қойған, осы салық органының мөрi бар салық және бюджетке төленетiн басқа да мiндеттi төлемдердi төлеу және жинақтаушы зейнетақы қорларына аудару жөнiндегi мерзiмi өтiп кеткен берешегiнiң жоқтығы туралы тиiстi салық органының белгiленген нысандағы анықтамасының түпнұсқасы мен көшірмесін;
11) құрылтайшыға кепiлдiк жарнаны аудару туралы төлем тапсырмасының түпнұсқасы мен көшiрмесiн;
12) ықтимал Тендерге Қатысушы өкiлiнiң өкiлеттiгiн растайтын құжатты (сенiмхатты) (жеке куәлiктi, төлқұжатты (шетел азаматтары үшiн) немесе iшкi iстер органдарының анықтамасын ұсынған жағдайда жарамды).
Құрылтайшы заңды тұлғаны мемлекеттiк тiркеу (қайта тiркеу) туралы куәлiктiң, жарғының, ықтимал Тендерге Қатысушының салық және бюджетке төленетiн басқа да мiндеттi төлемдердi төлеу және жинақтаушы зейнетақы қорларына аудару жөнiндегi төлеу мерзiмi өткен берешегінің жоқтығы туралы анықтаманың, төлем тапсырмасының көшірмелерін салыстырып, растағаннан кейін осы құжаттардың түпнұсқалары Тендерге қатысушыға қайтарылады.
34. Тендерге қатысушы ретінде тіркелу үшін жеке тұлғаға мыналарды ұсыну қажет:
1) Тендерге Қатысушының, оны тендер жеңімпазы етіп жариялаған жағдайда ақпараттық хабарламада көрсетілген және тендерге Қатысушының өзі ұсынған тендер талаптарымен Шарт жасауға жазбаша міндеттемесін білдіретін Тендерге қатысу өтінімі;
2) жазбаша түрдегі тендермен байланысты құжаттармен қоса берілетін, басқа құжаттардан бөлек конвертте жапсырылған Тендер талаптары бойынша ұсыныстар;
3) төлем тапсырмасының немесе Құрылтайшыға кепілдік жарнаның аударылғаны туралы түбіртектің түпнұсқасы мен көшірмесі;
4) жеке куәлiктiң немесе төлқұжаттың түпнұсқасы мен көшірмесі;
5) тиiстi мемлекеттiк орган берген (Шарт жасау үшiн азаматтық құқық қабiлетiнiң барын растау үшiн) заңды тұлғаны құрусыз кәсiпкерлiк қызметтi жүзеге асыруға құқық беретiн құжаттың түпнұсқасы мен көшірмесі;
6) лицензиялардың және/немесе патенттердiң, куәлiктердiң, ықтимал Тендерге қатысушының бiлiктiлiгiн растайтын басқа құжаттардың түпнұсқасы мен көшірмесі қоса берiлген бiлiктiлiк туралы мәлiмет.
Құрылтайшы төлем тапсырмасының, төлқұжаттың немесе жеке куәліктің, заңды тұлғаны құрусыз кәсiпкерлiк қызметтi жүзеге асыруға құқық беретiн құжаттың, лицензиялардың және/немесе патенттердiң, куәлiктердiң, ықтимал Тендерге қатысушының бiлiктiлiгiн растайтын басқа құжаттардың көшірмелерін салыстырып, растағаннан кейін осы құжаттардың түпнұсқаларын Тендерге қатысушыға қайтарады.
35. Тендерге қатысушы ол туралы Тендер басталғанға дейін кемінде 3 күнтізбелік күн бұрын жазбаша хабарлап, өз ұсынысын тендер өткізудің белгіленген мерзіміне дейін қайтарып алуға құқылы.
36. Өтiнiмдердi қабылдау және Тендерге қатысуға үмiт бiлдiрген тұлғаларды тiркеу талап етiлетiн құжаттардың толық жиынтығы бар болған кезде жүргiзiледi.
37. Мыналар Тендерге Қатысушы бола алмайды:
1) Қазақстан Республикасының заңнамалық актiлерiне немесе құрылтай құжаттарына сәйкес жүзеге асыру Тендер шарттары болып табылатын қызмет түрлерiмен айналысуға құқығы жоқ заңды тұлға;
2) сенiмгерлiкпен басқаруға шарт жасасу және оны орындау жөнiнде тиiстi мiндеттемелерiн орындамаған өткен тендерлердiң жеңiмпазы.
38. Құрылтайшының Тендерге қатысушыларға қатысы бар ақпаратты, Қазақстан Республикасының заңдарымен көзделген жағдайларды қоспағанда, Тендер дайындау және оны өткiзудiң барлық кезеңi iшiнде жариялауға құқығы жоқ.
39. Ықтимал Тендерге қатысушылардың құжаттары тiркеу журналына тiркелгеннен кейiн сейфте сақталады. Тендердi өткiзу күнi Тендерге қатысушылардың құжаттары Тендерлiк комиссияға берiледi.
40. Тендерлік комиссия Тендерге қатысушылардың ұсыныстары бар конвертті ашады және жеңімпазды айқындау критерийлеріне сүйеніп, тендерге қатысушылардың ұсыныстарын қарайды.
Тендерге қатысушы немесе оның уәкілетті өкілі конвертті ашу кезінде қатысуға құқылы.
Тендерлік комиссия жобаларға тәуелсіз сараптама өткізуге құқылы.
41. Сенiмгерлiкпен басқаруға беру жөніндегі тендер жеңімпазын айқындаудың негізгі шарттары (критерийлері) қатысушылардың біліктілік мәліметтері, олардың тендер жағдайларын орындауға техникалық және қаржылық мүмкіндіктерінің бар болуы, сенiмгерлiкпен басқару Объектісінің қызмет түрін сақтау, Объектіні қаржылық оңалту бағдарламасының, бағдарламаны іске асыру мерзімінің бар болуы болып табылады.
Басқару органы және/немесе тендерлік комиссия Объект спецификасын ескеріп, басқа да критерийлерді ұсына алады.
42. Тендерлiк комиссияның шешiмi оның мүшелерiнiң қарапайым көпшілік дауысымен қабылданады. Дауыстар тең болған жағдайда, төрағаның дауысы шешушi болып табылады. Дауыстар тең болған жағдайда, Тендерлiк комиссия тең дауыс санын алған Қатысушыларды келiссөзге шақыруға құқылы және олардың келiсiмiмен тендерлiк комиссияның қарауына Объект жұмысын жақсартуға бағытталған қосымша ұсыныстарды енгiзген Тендерге қатысушы жеңiмпаз болып танылады.
43. Тендерлiк комиссияның шешiмi хаттамамен ресiмделедi, оған тендерлiк комиссияның мүшелерi, оның төрағасы, хатшысы және Тендер жеңiмпазы қол қояды. Тендерлiк комиссияның мүшесi өзiнiң ерекше ойын жазбаша жазып, оны хаттамаға тiркеуге құқылы, ол туралы соңғысына белгi қойылады. Тендердiң нәтижелерiне оның қатысушылары Тендер жеңiмпазын хабарлаған күннен бастап 30 күнтiзбелiк күн iшiнде шағымдануы мүмкін.
44. Тендер нәтижелерi туралы хаттама Тендер жеңiмпазы мен Комитеттiң Тендер шарттары негiзiнде Шарт жасау мiндеттемелерiн және Тендер жеңiмпазының ұсыныстарын бекiтетiн құжат болып табылады.
45. Хаттама Құрылтайшыға және тендер жеңімпазына бір данадан жасалады.
46. Тендер нәтижелерi Тендер жеңiмпазын хабарлаған күннен бастап 5 күнтiзбелiк күн iшiнде Комитетпен бекiтiледi.
47. Шешім қабылдаған күннен кейінгі күннен кешіктірмей Қатысушылардың өтінімдерін қарау нәтижелері бойынша Құрылтайшы Тендерге қатысушылардың барлығына хабарлап, тендер нәтижесін бекітуге немесе одан бас тартуға тиісті.
48. Құрылтайшы тендер нәтижелерін бекіткеннен кейін 10 күнтізбелік күннен кешіктірмей тараптар Объектіні сенiмгерлiкпен басқару шартына қол қоюы тиіс.
49. Тараптармен және теңгерім ұстаушымен қол қойылған Объектінің қабылдау-тапсыру актісі шарттың ажырамас құрамдас бөлігі болып табылады.
Акт алты данада қазақ және орыс тілінде әр тарапқа және теңгерім ұстаушыға екі данадан жасалады.
50. Құрылтайшы жаңа тендердi жариялауға, сондай-ақ Тендерлiк комиссияға тендер шарттарын мына жағдайларда өзгертудi ұсынуға құқылы:
1) Тендерге қатысуға өтiнiмдер жоқ болса;
2) Тендерлiк комиссия жеңiмпаздың жоқтығы туралы шешiмдi қабылдаса;
3) Тендер жеңiмпазы Шартқа қол қоюдан бас тартса.
51. Тендер мына жағдайларда өтпеген болып танылады, егер:
қатысушылардың ұсыныстары Тендерлiк комиссиямен Тендер шарттарын қанағаттандырмайтын немесе Қазақстан Республикасының заңнамасына сәйкес келмейтiн болып танылса;
объект жалғыз Құрылтайшыға берілуі мүмкін үшінші және одан ілгердегі тендерлерді есептемегенде, тiркелген Қатысушылардың саны екеуден кем болса.
52. Құрылтайшы Тендер нәтижелері туралы хаттамаға және Тендерді ұтып алған тұлғамен Шартқа қол қоюдан бас тартуға құқығы жоқ.
53. Шартта Тендер жеңімпазының тендерлік ұсыныстарына сәйкес талаптар көзделуі тиіс.
54. Сенiмгерлiкпен басқару шартының негізгі талаптары Қазақстан Республикасы Үкіметінің 2011 жылғы 24 маусымдағы № 700 қаулысымен бекітілген Сенiмгерлiкпен басқару үлгі шартына сәйкес айқындалады.
55. Міндеттемелерді жартылай немесе толық орындамағаны үшін, сондай-ақ егер ол қарсы тұра алмайтын күш жағдайларының салдарынан (жер сілкінісі, су тасқыны, өрт, эмбарго, соғыс немесе әскери қимылдар, мемлекеттік органдардың міндеттемелерді орындауға тыйым салатын немесе қандайда-бір басқа жолмен кедергі келтіретін нормативтік құқықтық актілерді шығаруы) болса, осы жағдайлар тараптар еркінен тыс және тараптардың кез-келгенінің Шарт бойынша өз міндеттемелерін орындауын мүмкін қылмаса Шарт бойынша міндеттерді кешіктіргені үшін тараптар жауапкершіліктен босатылады.
56. Шарт бойынша міндеттемелерді орындау мерзімі қарсы тұра алмайтын күш жағдайлары, сондай-ақ осы жағдайлардан туындаған салдарлар мерзіміне тең уақытқа шегіндіріледі.
57. Қарсы тұра алмайтын күш жағдайлары туындаған кезде тараптардың кез келгені бір-біріне осы жағдайлардың болатыны туралы олардың пайда болған күнінен кейін 30 күнтізбелік күн ішінде жазбаша түрде ақпараттандыруы тиіс.
58. Хабарламау немесе уақытында хабарламау тарапты міндеттемелерді орындамағаны үшін жауапкершіліктен босататын негіз ретінде жоғарыда көрсетілген жағдайларға сілтеме жасау құқығынан айырады.
4. Шарттың орындалуын бақылау
59. Шарт қағидаларының орындалуын бақылауды Құрылтайшы жүзеге асырады.
Осы мақсатта Құрылтайшы жұмыс тобын (комиссия) құруы мүмкін. Жұмыс тобы (комиссия) өз жұмысын Сенiмгерлiкпен басқарушының міндеттемелері ескеріліп жасалған Шартқа сәйкес ұйымдастырады.
Сенiмгерлiкпен басқарушы жұмыс тобының (комиссияның) қарауына құжаттарды (есептерді) Шартта белгіленген мерзімде, нысанда және тәртіпте тапсырады.
60. Бақылауды жүзеге асыру үшiн Құрылтайшы Шарттың орындалуымен байланысты құжаттармен танысуға, сондай-ақ Қазақстан Республикасының заңнамасына сәйкес тәуелсiз кеңесшiлердi тарта отырып, Объектiнi басқару тиiмдiлiгiнiң жыл сайынғы мониторингiн жүргiзуге құқылы.
61. Шарт қағидаларының орындалуын бақылау Сенiмгерлiкпен басқарушының мiндеттемелерді орындауын аяқтаған сәтіне дейiн жүргiзiледi.
62. Мемлекеттік мүлікті сенiмгерлiкпен басқару шарты Қазақстан Республикасының Азаматтық кодексінде көзделген негіздер бойынша өзгертіледі және бұзылады.
63. Сенiмгерлiкпен басқарушы Шартта белгіленген мерзімде Объектінің қызметін қамтамасыз ету бойынша міндеттер мерзімін орындамаған жағдайда Құрылтайшы Сенiмгерлiкпен басқарушыны ол туралы бір айдан кешіктірмей хабардар етіп, шартты бір жақты тәртіпте бұзуға құқылы.
5. Қорытынды қағидалар
64. Осы Қағидамен көзделген Сенiмгерлiкпен басқару қатынастарына осындай қатынастарды реттейтін азаматтық заңнаманың нормалары таралады.
65. Шарт бойынша міндеттемелерді орындамағаны және/немесе тиісінше орындамағаны үшін тараптар Қазақстан Республикасының Азаматтық кодексіне сәйкес жауапкершілікке ие.
66. Сенiмгерлiкпен басқарушымен оған белгіленген шектеулерді бұзып жасалған мәмілелер Қазақстан Республикасының Азаматтық кодексімен көзделген тәртіпте жарамсыз болып танылады.
67. Жауапқа тарту кінәлі тұлғаларды келтірілген залалды өтеу міндетінен босатпайды.
68. Егер шартты бұзуға немесе өзгертуге тараптардың бірінің Шартты елеулі бұзуы негіз болса, онда екінші тарап Шарттың бұзылуымен немесе өзгертілуімен келтірілген залалды талап етуге құқылы.
