"Жер қойнауы және жер қойнауын пайдалану туралы" 2017 жылғы 27 желтоқсандағы Қазақстан Республикасы Кодексінің 129-бабы 1-тармағының 2) тармақшасына және 178-бабы 1-тармағының 2) тармақшасына сәйкес БҰЙЫРАМЫЗ:
1. Қоса беріліп отырған Көмірсутектерді және уранды өндіру саласындағы цифрландыру жобаларын алдыңғы жылдың қорытындылары бойынша жер қойнауын пайдаланушының көмірсутектерді және уранды өндіру кезеңінде өндіру үшін шеккен шығындарының бір пайызы мөлшерінде қаржыландыру қағидалары бекітілсін.
2. Қазақстан Республикасы Энергетика министрлігінің Цифрландыру және ақпараттандыру департаменті Қазақстан Республикасының заңнамасында белгіленген тәртіппен:
1) осы бірлескен бұйрықты Қазақстан Республикасы Әділет министрлігінде мемлекеттік тіркеуді;
2) осы бірлескен бұйрықты Қазақстан Республикасы Энергетика министрлігінің интернет-ресурсында орналастыруды;
3) осы бірлескен бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде Қазақстан Республикасы Энергетика министрлігінің Заң қызметі департаментіне осы тармақтың 1) және 2) тармақшаларында көзделген іс-шаралардың орындалуы туралы мәліметтерді ұсынуды қамтамасыз етсін.
3. Осы бірлескен бұйрықтың орындалуын бақылау жетекшілік ететін Қазақстан Республикасының энергетика вице-министріне жүктелсін.
4. Осы бірлескен бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасының Цифрлық даму, инновациялар және аэроғарыш өнеркәсібі министрінің м. а. |
А. Ахметжанов |
|
Қазақстан Республикасы Энергетика министрі |
Н. Ногаев |
"КЕЛІСІЛДІ"
Қазақстан Республикасының
Қаржы министрлігі
Көмірсутектерді және уранды өндіру саласындағы цифрландыру жобаларын алдыңғы жылдың қорытындылары бойынша жер қойнауын пайдаланушының көмірсутектерді және уранды өндіру кезеңінде өндіру үшін шеккен шығындарының бір пайызы мөлшерінде қаржыландыру қағидалары
1-тарау. Жалпы ережелер
1. Осы Көмірсутектерді және уранды өндіру саласындағы цифрландыру жобаларын алдыңғы жылдың қорытындылары бойынша жер қойнауын пайдаланушының көмірсутектерді және уранды өндіру кезеңінде өндіру үшін шеккен шығындарының бір пайызы мөлшерінде қаржыландыру қағидалары (бұдан әрі – Қағидалар) "Жер қойнауы және жер қойнауын пайдалану туралы" 2017 жылғы 27 желтоқсандағы Қазақстан Республикасы Кодексінің (бұдан әрі – Кодекс) 129-бабы 1-тармағының 2) тармақшасына және 178-бабы 1-тармағының 2) тармақшасына сәйкес әзірленді және көмірсутектерді және уранды өндіру саласындағы цифрландыру жобаларын алдыңғы жылдың қорытындылары бойынша жер қойнауын пайдаланушының көмірсутектерді және уранды өндіру кезеңінде өндіру үшін шеккен шығындарының бір пайызы мөлшерінде қаржыландыру тәртібін айқындайды.
2. Осы Қағидаларда мынадай негізгі ұғымдар пайдаланылады:
1) ақпараттандыру саласындағы уәкілетті орган – ақпараттандыру және "электрондық үкімет" саласында басшылықты және салааралық үйлестіруді жүзеге асыратын орталық атқарушы орган;
2) көмірсутектерді және уранды өндіру саласындағы уәкілетті орган – көмірсутектерді және уранды өндіру саласындағы мемлекеттік саясатты іске асыратын уәкілетті орган;
3) көмірсутектер және уран өндіру саласындағы цифрландыру жобасы – ақпараттық-коммуникациялық технологияларды қолдана отырып, өнімді және (немесе) көрсетілетін қызметтерді құруға бағытталған, уақыт бойынша шектелген өзара байланысты іс-шаралар кешені;
4) көмірсутектерді және уранды өндіру саласында цифрландыру жобасын жүзеге асыратын субъектілер – ақпараттандыру саласындағы қызметті жүзеге асыратын жеке және (немесе) заңды тұлғалар;
5) көмірсутектерді және уранды өндіру саласындағы іске асырылатын цифрландыру жобаларын есепке алу – "Ақпараттандыру туралы" Қазақстан Республикасының 2015 жылғы 24 қарашадағы Заңының 7-1-бабы 9) тармақшасында көзделген ақпараттық-коммуникациялық технологиялар және ақпараттық қауіпсіздікті қамтамасыз ету саласындағы бірыңғай талаптардың орындалуына мониторингті жүзеге асыру мақсатында ақпараттандыру саласындағы уәкілетті орган жүзеге асыратын есепке алу.
2-тарау. Көмірсутектерді және уранды өндіру саласындағы цифрландыру жобаларын алдыңғы жылдың қорытындылары бойынша жер қойнауын пайдаланушының көмірсутектерді және уранды өндіру кезеңінде өндіру үшін шеккен шығындарының бір пайызы мөлшерінде қаржыландыру тәртібі
3. Көмірсутектерді және уранды өндіру саласындағы цифрландыру жобаларын қаржыландыруды жер қойнауын пайдаланушы жобаны іске асырудың екінші жылынан бастап өндіру кезеңі ішінде жыл сайын жүзеге асырады.
4. Алдыңғы жылдың қорытындылары бойынша жер қойнауын пайдаланушының өндіру үшін шеккен шығындарының бір пайызынан асатын көмірсутектерді және уранды өндіру саласындағы цифрландыру жобаларын қаржыландыру көлемі жер қойнауын пайдаланушының келесі жылы тиісті міндеттемелерін орындау есебіне есептеледі.
5. Цифрландыру жобаларын қаржыландыру кезінде алдыңғы жылдың қорытындылары бойынша жер қойнауын пайдаланушының өндіру үшін шеккен шығындары Кодекстің 132 және 180-баптарында көзделген көмірсутектерді және уранды өндіру саласындағы уәкілетті органға жер қойнауын пайдаланушылар ұсынатын көмірсутектер саласындағы жер қойнауын пайдаланушы үшін лицензиялық-келісімшарттық шарттардың орындалуы туралы есептің немесе уранды өндіру саласындағы жер қойнауын пайдаланушы үшін келісімшарттық шарттардың орындалуы туралы есептің деректері негізінде айқындалады.
6. Цифрландыру жобаларын қаржыландыру кезінде жер қойнауын пайдаланушы тауарларды, жұмыстар мен көрсетілетін қызметтерді сатып алуды Кодекстің 131-бабы 1-тармағының екінші бөлігіне және 179-бабы 1-тармағының екінші бөлігіне сәйкес жүзеге асырады.
7. Цифрландыру жобаларын қаржыландыру үшін жер қойнауын пайдаланушы тиісті көрсетілетін қызметтерді сатып алуды өткізгенге дейін күнтізбелік 30 (отыз) күн бұрын атауы мен қысқаша сипаттамасын көрсете отырып, жоспарланып отырған сатып алу туралы ақпаратты ресми интернет-ресурста жариялау үшін көмірсутектерді және уранды өндіру саласындағы уәкілетті органға жібереді.
8. Жер қойнауын пайдаланушының техникалық тапсырмасы бойынша көмірсутектерді және уранды өндіру саласында цифрландыру жобасын жүзеге асыратын субъектілерді айқындауды жер қойнауын пайдаланушы осы Қағидалардың 6-тармағында көзделген сатып алу арқылы жүргізеді.
9. Кодекстің 129 және 178-баптарына сәйкес көмірсутектерді және уранды өндіру саласындағы цифрландыру жобаларын қаржыландыруды орындауды жер қойнауын пайдаланушы мен көмірсутектерді және уранды өндіру саласындағы цифрландыру жобасын жүзеге асыратын субъект арасындағы 1994 жылғы 27 желтоқсандағы Қазақстан Республикасының Азаматтық кодексіне сәйкес жасалған шарт негізінде жүзеге асырады.
10. Көмірсутектерді және уранды өндіру саласындағы цифрландыру жобаларын қаржыландыру бойынша жер қойнауын пайдаланушының міндеттемелерін орындауын растайтын құжаттар "Төлемдер және төлем жүйелері туралы" 2016 жылғы 26 шілдедегі Қазақстан Республикасының Заңы 1-бабының 54) тармақшасында көзделген көмірсутектерді және уранды өндіру саласындағы цифрландыру жобаларын қаржыландыруға ақша қаражатының аударылғанын растайтын төлем құжаттары болып табылады.
11. Жер қойнауын пайдаланушы қаржыландыру нәтижелері бойынша іске асырылатын цифрландыру жобаларын есепке алу үшін ақпараттандыру саласындағы уәкілетті органға көмірсутектерді және уранды өндіру саласындағы қаржыландырылатын цифрландыру жобалары бойынша еркін нысанда есеп ұсынады.
