Ескерту. Күші жойылды – ҚР Қорғаныс министрінің 20.09.2022 № 809 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.
Қазақстан Республикасы Үкіметінің 2001 жылғы 16 тамыздағы № 1074 қаулысымен бекітілген Қазақстан Республикасы Қорғаныс министрлігі туралы ереже 21-тармағының 19-88) тармақшасына сәйкес БҰЙЫРАМЫН:
1. Қоса беріліп отырған Қазақстан Республикасы Қорғаныс министрлігінің мамандандырылған ұйымдарының қызметтік жұмысын бағалау жөніндегі нұсқаулық бекітілсін.
2. Қазақстан Республикасы Қарулы Күштері Бас штабының Ұйымдастыру-жұмылдыру жұмыстары департаменті Қазақстан Республикасының заңнамасында белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрықты Қазақстан Республикасы Қорғаныс министрлігінің интернет-ресурсына орналастыруды;
3) алғашқы ресми жарияланған күнінен бастап күнтізбелік он күн ішінде осы тармақтың 1) және 2) тармақшаларында көзделген іс-шаралардың орындалуы туралы мәліметтерді Қазақстан Республикасы Қорғаныс министрлігінің Заң департаментіне жолдауды қамтамасыз етсін.
3. Осы бұйрықтың орындалуын бақылау Қорғаныс министрінің бірінші орынбасары – Қазақстан Республикасы Қарулы Күштері Бас штабының бастығына жүктелсін.
4. Осы бұйрық лауазымды адамдарға, оларға қатысты бөлігінде жеткізілсін.
5. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасының Қорғаныс министрі |
Н. Ермекбаев |
| Қазақстан Республикасы Қорғаныс министрінің 2021 жылғы "___" __________ № ___ бұйрығымен бекітілген |
Қазақстан Республикасы Қорғаныс министрлігінің мамандандырылған ұйымдарының қызметтік жұмысын бағалау жөніндегі нұсқаулық
1-тарау. Жалпы ережелер
1. Осы Қазақстан Республикасы Қорғаныс министрлігінің мамандандырылған ұйымдарының (бұдан әрі – мамандандырылған ұйымдары) қызметтік жұмысын бағалау жөніндегі нұсқаулық мамандандырылған ұйымдарының қызметтік жұмысын бағалау механизімін нақтылайды.
2. Мамандандырылған ұйымдары қызметтік жұмысын бағалау:
1) оқу жұмысының жай-күйін;
2) әскери-техникалық мамандарды (бұдан әрі – ӘТМ) және әскери оқытылған резервті даярлау сапасын;
3) мамандандырылған ұйымдарының жалпы бағалауды қамтиды.
2-тарау. Қызметтік жұмысты бағалау
1-параграф. Оқу жұмысының жай-күйі
3. Оқу жұмысының жай-күйі мамандандырылған ұйымдарының оқу бөлімінде тексеріледі және мынадай көрсеткіштер бойынша бағаланады:
1) оқу жұмысын жоспарлау және ұйымдастыру құжаттарын толық, уақтылы және сапалы әзірлеу;
2) мамандандырылған ұйымдарының оқытушылар құрамының жеке даярлық деңгейі;
3) оқу жұмысын жүргізу сапасы;
4) ӘТМ-ны және әскери оқытылған резервті даярлау сапасы;
5) мамандандырылған ұйымдарының оқу материалдық-техникалық базасының жай-күйі.
4. Оқу жұмысын жоспарлау құжаттарын толық, уақтылы және сапалы әзірлеу мамандандырылған ұйымдарының басқармасының оқу бөлімінде әзірленетін бұйрықтарды, мамандандырылған ұйымдарының оқу процесін ұйымдастыру жөніндегі жоспарлау, есепке алу құжаттары нысандарының тізбесінде белгіленген жоспарлау құжаттарын зерделеу негізінде белгіленеді.
Оқу процесін ұйымдастыру жоспарлау, есепке алу құжаттары бойынша және оқу сабақтары барысында тексеріледі. Бұл ретте даярлау бағдарламасын орындау дәрежесі, оқытылатын оқу пәндері тақырыптарын өтудің құрылымдық-логикалық кезеңділігі, оқытушылар құрамының оқу жүктемесі және оның белгіленген нормаларға сәйкес келуі, мамандандырылған ұйымдарының басшылығының оқу сабақтарын бақылауды ұйымдастыруы және оның тиімділігі зерделенеді.
Оқу жұмысын жоспарлау және ұйымдастыру құжаттарын толық, уақтылы және сапалы әзірлеу мынадай болып бағаланады:
"өте жақсы" – жоспарлау құжаттары әзірленген және бар, әрбір оқу пәні бойынша тақырыптық жоспарлар бітірушілерге қойылатын біліктілік талаптарына және ӘТМ және әскери оқытылған резервті даярлау бағдарламаларына сәйкес келеді. Жоспарланған тапсырмалар мен жұмысты талдаудың өзара сабақтастығы айқындалған. Жоспарланған іс-шаралар қойылған міндеттерді уақтылы шешуге бағытталған;
"жақсы" – жоспарлау құжаттары әзірленген және бар, ӘТМ-ны және әскери оқытылған резервті даярлау бағдарламасы бітірушілерге қойылатын біліктілік талаптарына сәйкес келеді және әрбір оқу пәні бойынша тақырыптық жоспарлар ӘТМ-ны және әскери оқытылған резервті даярлау бағдарламасына сәйкес келеді. Жоспарланған іс-шараларды орындау және қойылған міндеттерге қол жеткізу байқалады;
"қанағаттанарлық" – жоспарлау құжаттары жоспарланған іс-шаралардың уақтылы және сапалы орындалуын қамтамасыз етпейді немесе ӘТМ-ны және әскери оқытылған резервті даярлау бағдарламасы бітірушілерге қойылатын біліктілік талаптарына толық ауқымда сәйкес келмейді немесе оқу пәндері бойынша тақырыптық жоспарлар ӘТМ-ны және әскери оқытылған резервті даярлау бағдарламасына толық ауқымда сәйкес келмейді. Жоспарланған іс-шаралардың орындалуын бақылау уақтылы және жеткілікті тиімді жүзеге асырылмайды;
"қанағаттанарлықсыз" – ағымдағы жұмысты ұйымдастыруды регламенттейтін жоспарлау құжаттамасының болмауы немесе ӘТМ-ны және әскери оқытылған резервті даярлау бағдарламасы бітірушілерге қойылатын біліктілік талаптарына сәйкес келмейді немесе оқу пәндері бойынша тақырыптық жоспарлар ӘТМ-ны және әскери оқытылған резервті даярлау бағдарламасына сәйкес келмейді. Қойылған міндеттердің уақтылы және сапалы орындалуына бақылау жүзеге асырылмайды.
5. Оқытушылар құрамының жеке даярлық деңгейі олардың құзіреттілік деңгейін (теориялық білімін, пркатикалық дағдыларын және біліктілігін) анықтау мақсатында олар білім алушылармен теориялық және практикалық сабақтар өткізу барысында, сондай-ақ олармен бақылау сабақтарын (жаттығулар) өткізу және тестілеу арқылы тексеріледі.
Оқытушылардың жеке даярлығы сапасын тексеру кезінде олар оқу сабақтарын өткізетін оқу пәндерінің тақырыптары бойынша тексеріледі. Оқытушылар құрамының оқу сабақтарын өткізу сапасы филиал оқытушыларының кемінде 50%-і тексеріледі және бағаланады.
6. Оқытушының оқу сабағын өткізу сапасын тексеру кезінде:
1) оқу сабағын ұйымдастыру және оны өткізу әдістемесінің даярлық бағдарламасының талаптарына сәйкес келуі;
2) білім алушыларға теориялық білім қалай берілетіні, олар үшін қажетті дағдылар қалай қалыптастырылатыны және оқу сабағын өткізу барысында олардың біліктілігі қалай жетілдірілетіні;
3) оқу сабағын өткізуге оқытушының жеке дайындығы, материалды дұрыс және түсінікті етіп жеткізуі, оқу уақытын тиімді пайдалануы;
4) оқу сабағының материалдық-техникалық қамтамасыз етілуі және оны сабақ барысында қолдану қарқындылығы;
5) техникалық оқу құралдарын қолдана білуі;
6) оқытушының білім алушымен қарым-қатынасты орната алуы, сондай-ақ білім алушылардың сабақтағы тәртібі мен белсенділігі ескеріледі (айқындалады).
7. Оқытушыларды бағалау сыныптарда, саптық алаңда, далада, автоайлақта, оқу-жаттығу орталықтарының және әскери атыс алаңдарының аумағында, автомобиль және басқа да техникада, автомобиль және басқа да тренажерларда, электрондық-есептеу техникасы құралдарында тексеріледі.
Оқ ату және (немесе) машиналарды жүргізу жаттығуларын орындауға "Оқ ату даярлығы" оқу пәні және (немесе) "Жүргізу" пәні бойынша оқу сабақтарын өткізетін оқытушылар, сондай-ақ машиналарды жүргізуді үйрететін шеберлер тартылады.
8. Оқытушылар құрамының жеке дайындығы деңгейі мынадай болып бағаланады:
"өте жақсы" – егер тексерілуші бағдарламалық материалды терең және нақты білетінін көрсетсе, сұрақтарға жылдам және дұрыс жауап берсе, белгіленген нормативтерді сенімді орындаса, оқ ату және (немесе) машиналарды жүргізу жаттығуын "өте жақсыға" орындаса;
"жақсы" – егер тексерілуші бағдарламалық материалды нақты білсе, оны білікті, қатесіз мазмұндап берсе, сұрақтарға жауап берген кезде алған білімін дұрыс қолданса, белгіленген нормативтерді орындауда мықты дағдылары болса, оқ ату және (немесе) машиналарды жүргізу жаттығуын "өте жақсыға" және "жақсыға" орындаса;
"қанағаттанарлық" – егер тексерілуші тек негізгі материалды ғана білсе, жекелеген жағдайларда қойылған сұраққа толық жауап беру үшін қосымша (бағыттау) сұрақтар қоюды қажет етсе, жауап берген кезде нақты жауап бермесе, нормативтерді сенімді орындамаса, оқ ату және (немесе) машиналарды жүргізу жаттығуын оң бағаға орындаса;
"қанағаттанарлықсыз" – егер тексерілуші қойылған сұрақтарға жауап берген кезде өрескел қателіктерге жол берсе, алған білімін практикада қолдана алмаса, белгіленген нормативтерді "қанағаттанарлық" деген бағаға орындамаса, оқ ату және (немесе) машиналарды жүргізу жаттығуын орындамаса.
9. Оқытушылар құрамының даярлығы үшін мамандандырылған ұйымдарының жалпы бағалау әрбір оқытушы алған жалпы жеке бағалар негізінде айқындалады және мынадай болып қойылады:
"өте жақсы" – егер оқытушылардың 90%-і тексерілген пәндер бойынша оң баға алса, олардың ішінде 50%-і "өте жақсы";
"жақсы" – егер оқытушылардың кемінде 80%-і оң баға алса, олардың ішінде 50%-і "өте жақсы" және "жақсы";
"қанағаттанарлық" – егер оқытушылардың кемінде 70%-і тексерілген пәндер бойынша оң баға алса;
"қанағаттанарлықсыз" – егер алынған нәтижелер "қанағаттанарлық" деген бағаның талаптарына жауап бермесе.
10. Оқу жұмысын жүргізу сапасы мынадай болып бағаланады:
"өте жақсы" – оқу бағдарламаларын өту жоспар-графиктері, оқу сабақтарының кестелері және машиналарды практикалық жүргізуге үйрету (агрегаттарда жұмыс істеу) кезектілігі графиктері уақтылы және сапалы орындалады; жоспарлау және оқу жұмысын есепке алу құжаттары толық өзара келісілуі қамтамасыз етілген, тексерілген оқу сабақтарының кемінде 80%-і "өте жақсы" және "жақсы" деп бағаланған;
"жақсы" – оқу бағдарламаларын өту жоспар-графиктері, оқу сабақтарының кестелері және машиналарды практикалық жүргізуге үйрету (агрегаттарда жұмыс істеу) кезектілігі графиктері уақтылы орындалады, ал бар кемшіліктер мамандарды даярлау сапасына ықпал етпейді, жалпы жоспарлау және оқу жұмысын есепке алу құжаттары өзара келісілуіне қол жеткізілген, тексерілген оқу сабақтарының кемінде 70%-і "жақсы" және "қанағаттанарлық" деп бағаланған;
"қанағаттанарлық" – оқу бағдарламаларын өту жоспар-графиктері, оқу сабақтарының кестелері және машиналарды практикалық жүргізуге үйрету (агрегаттарда жұмыс істеу) кезектілігі графиктері орындалады, бірақ ауа райы жағдайы (қыс кезеңіндегі қардың қалың болуы немесе күз-көктемгі ауыспалы кезеңдегі төмен температуралық режим) немесе әртүрлі ұйымдастыру және техникалық себептер бойынша сабақтарды, іс-шаралар мен жұмыстарды орындау мерзімдерін бұзу немесе бұзушылықтар бар, олар жалпы мамандарды даярлау сапасына әсер етпеген; кейбір қателіктер мен жаңылысулар бар болса да жоспарлау және оқу жұмысын есепке алу құжаттары өзара келісілген, олар мамандарды даярлау сапасына әскер етпейді, тексерілген оқу сабақтарының кемінде 60%-і "қанағаттанарлық" деген бағадан төмен емес бағаланған;
"қанағаттанарлықсыз" – талаптар "қанағаттанарлық" деген бағаға орындалмаған.
2-параграф. ӘТМ-ны және әскери оқытылған резервті даярлау сапасы
11. ӘТМ-ны және әскери оқытылған резервті даярлау сапасы білім алушылардың жеке даярлық деңгейін тексеру нәтижелері бойынша бағаланады.
12. Білім алушылардың жеке даярлық деңгейін бағалау олардың өткен оқу материалы көлемінде оқу бағдарламасының пәндері бойынша теориялық және практикалық даярлығын бағалауды қамтиды.
13. Білім алушының жеке даярлық деңгейі мынадай болып бағаланады:
"өте жақсы" – егер білім алушы тексерілген оқу пәндері бойынша кемінде 50% "өте жақсы", ал қалғаны – "жақсы" немесе "тапсырды" деген баға алса;
"жақсы" – егер білім алушы тексерілген оқу пәндері бойынша кемінде 50% "өте жақсы" және "жақсы", ал қалғаны – "қанағаттанарлық" деген баға алса;
"қанағаттанарлық" – егер білім алушы тексерілген оқыту пәндері бойынша кемінде 70% оң баға алса;
"қанағаттанарлықсыз" – егер қойылған талаптар "қанағаттанарлық" деген бағаға орындалмаса.
3-параграф. Мамандандырылған ұйымдарының жалпы бағалау
14. Мамандандырылған ұйымдарының оқу жұмысын жалпы бағалау мыналарға қойылады:
"өте жақсы" – егер оқу жұмысын жоспарлау мен ұйымдастыружай-күйі "өте жақсы" деп бағаланса, әскери-техникалық мамандарды және/немесе әскери оқытылған резервті даярлау сапасының деңгейі "жақсы" деген бағадан төмен емес деп бағаланса;
"жақсы" – егер оқу жұмысын жоспарлау мен ұйымдастыру жай-күйі "жақсы" деген бағадан төмен емес деп бағаланса, әскери-техникалық мамандарды және/немесе әскери оқытылған резервті даярлау сапасының деңгейі "қанағаттанарлық" деген бағадан төмен емес деп бағаланса;
"қанағаттанарлық" – егер тексерудің барлық өлшемшарты оң бағаланса;
"қанағаттанарлықсыз" – егер қойылатын талаптар "қанағаттанарлық" деген бағаға орындалмаса.
15. Жалпы бағалау барлық тексерілген мамандандырылған ұйымдарының қойылған бағалардан құрылады және мынадай болып қойылады:
"өте жақсы" – егер тексерілген мамандандырылған ұйымдарының оқу жұмысын жоспарлау мен ұйымдастыру жай-күйі "өте жақсы" деп бағаланған кезде кемінде 50%-і "өте жақсы" деп бағаланса;
"жақсы" – егер тексерілген мамандандырылған ұйымдарының оқу жұмысын жоспарлау мен ұйымдастыру жай-күйі "жақсы" деп бағаланған кезде кемінде 50 %-і "жақсы" және "өте жақсы" деп бағаланса;
"қанағаттанарлық" – егер тексерілген мамандандырылған ұйымдарының оқу жұмысының жай-күйі "қанағаттанарлық" деп бағаланған кезде 70%-і оң баға алса;
"қанағаттанарлықсыз" – егер тексерілген мамандандырылған ұйымдарының 30 %-і "қанағаттанарлықсыз" деп бағаланса.
