Шымкент қаласының мәслихаты ШЕШТІ:
1. Шымкент қаласы мәслихатының."Шымкент қаласының Құрмет грамотасымен наградтау туралы ережені бекіту туралы" 2019 жылғы 29 наурыздағы № 47/386-6с шешiмiне (Нормативтік құқықтық актілерді мемлекеттік тіркеу тізілімінде № 28 болып тіркелген) мынадай өзгерістер енгізілсін:
көрсетілген шешімнің кіріспесі жаңа редакцияда жазылсын:
"Қазақстан Республикасындағы жергiлiктi мемлекеттiк басқару және өзiн-өзi басқару туралы" Қазақстан Республикасы Заңының 6-бабы 1-тармағының 12-3) тармақшасына сәйкес Шымкент қаласының мәслихаты ШЕШТІ:";
1-тармақ жаңа редакцияда жазылсын:
"1. Шымкент қаласының Құрмет грамотасымен наградтау туралы ереже осы шешімнің қосымшасына сәйкес бекітілсін.";
мемлекеттік тіліндегі 2-тармақтың бірінші абзацы жаңа редакцияда жазылсын, орыс тіліндегі мәтін өзгермейді:
"2. "Шымкент қаласы мәслихатының аппараты" мемлекеттік мекемесі Қазақстан Республикасының заңнамасында белгіленген тәртіппен:";
көрсетілген шешімнің қосымшасы осы шешімнің қосымшасына сәйкес жаңа редакцияда жазылсын.
2. "Шымкент қаласы мәслихатының аппараты" мемлекеттік мекемесі Қазақстан Республикасының заңнамасында белгіленген тәртіпте:
1) осы шешімді Шымкент қаласының Әділет департаментінде мемлекеттік тіркеуді;
2) ресми жарияланғаннан кейін осы шешімді Шымкент қаласы мәслихатының интернет-ресурсына орналастыруды қамтамасыз етсін.
3. Осы шешім алғашқы ресми жарияланған күнінен кейін күнтізбелік он күн өткен соң қолданысқа енгізіледі.
| Шымкент қаласы | |
| мәслихатының төрағасы | Б. Нарымбетов |
| Шымкент қаласы мәслихатының 2023 жылғы 29 қыркүйектегі № 7/73-VIII шешіміне қосымша |
|
| Шымкент қаласы мәслихатының 2019 жылғы 29 наурыздағы № 47/386-6с шешімімен бекітілген |
Шымкент қаласының Құрмет грамотасымен наградтау туралы ереже
1-тарау. Жалпы ережелер
1. Осы Шымкент қаласының Құрмет грамотасымен наградтау туралы ереже (бұдан әрі – Ереже) "Қазақстан Республикасындағы жергілікті мемлекеттік басқару және өзін-өзі басқару туралы" Қазақстан Республикасы Заңының 6-бабы 1-тармағының 12-3) тармақшасына сәйкес әзірленді және Шымкент қаласының Құрмет грамотасымен наградтау тәртібін реттейді.
2. Шымкент қаласының Құрмет грамотасымен (бұдан әрі - Құрмет грамотасы) Шымкент қаласына сіңірген еңбегін мойындау белгісі ретінде өндіріс, бизнес, білім беру, денсаулық сақтау, ғылым, мәдениет, шығармашылық, спорт, заңдылықты, қоғамдық тәртіпті қамтамасыз ету, азаматтардың құқықтары мен бостандықтарын қорғау, қоршаған ортаны қорғау, басқа өңірлермен мәдени және экономикалық байланыстарды кеңейту, халықтар арасындағы достық пен ұлтаралық келісімді нығайту салаларындағы Шымкент қаласының әлеуметтік-экономикалық дамуына елеулі үлес қосқан, мемлекеттік және әскери қызметте елеулi жетiстiктерi, жемісті қоғамдық және қайырымдылық қызмет атқарған Қазақстан Республикасының азаматтары наградталады.
Сондай-ақ, Құрмет грамотасымен Шымкент қаласына еңбек сiңiрген шетел азаматтары да наградталуы мүмкiн.
3. Құрмет грамотасымен осы Ереженің 2-тармағында көрсетілген қызмет салаларында кемінде 5 жыл жұмыс өтілі бар азаматтар наградталады.
4. Құрмет грамотасымен наградтау туралы өтінішхатты Шымкент қаласы мәслихатының депутаттары, еңбек және шығармашылық ұжымдар, қоғамдық және діни бірлестіктер, саяси партиялар, заңды тұлғалар немесе бастамашыл топтар (бұдан әрі – өтінішхат беруші тұлға) енгізеді.
5. Заңсыз сотталған және толық ақталған азаматтарды қоспағанда, соттылығы бар, сондай-ақ бұрын сотталған адамдар Құрмет грамотасымен наградтауға жатпайды.
2-тарау. Құрмет грамотасымен наградтау тәртібі
6. Азаматты немесе шетел азаматын Құрмет грамотасымен наградтау туралы өтінішхат Шымкент қаласының әкімдігіне мынадай мәліметтерді көрсете отырып жолданады:
тегі, аты, әкесінің аты (болған жағдайда);
туған күні, айы, жылы;
білімі туралы мәліметтер;
жарғылық немесе құрылтай құжаттарына сәйкес ұйымның толық атауы;
өтініш берілген күнге атқаратын лауазымын толық көрсете отырып, жұмыс орны;
осы Ереженің 2-тармағына сәйкес еңбек қызметі, жетістіктері, құрметті атақтар, наградалар туралы.
7. Осы Ереженің 6-тармағында көрсетілген құжаттар қарау үшін наградтау күніне дейін 30 (отыз) күнтізбелік күннен кешіктірілмей Шымкент қаласының әкімдігіне ұсынылады. Егер құжаттарды ұсынудың соңғы күні мереке немесе демалыс күнге дәл келсе, құжаттарды ұсынудың соңғы күні одан кейінгі келесі жұмыс күні болып саналады.
8. Құжаттардың уақтылы ұсынылмауы немесе ұсынылған құжаттардың осы Ереженің 6-тармағына сәйкес келмеуі өтінішхатты қараусыз қалдыру үшін негіз болып табылады.
9. Азаматтарды Құрмет грамотасымен наградтаутуралы қайта өтінішхат беру алдыңғы наградтау сәтінен бастап бес жылдан ерте емес уақыттан кейін жүргізіледі.
10. Құрмет грамотасымен наградтау туралы өтінішхат, Шымкент қаласы әкімінің аппараты құжаттардың уақтылы ұсынылуын және ұсынылған құжаттардың осы Ереженің 6-тармағына сәйкес келуін тексергеннен кейін, түскен күнінен бастап 5 жұмыс күн ішінде Шымкент қаласының әкімімен (бұдан әрі – әкім) Шымкент қаласының мәслихатының (бұдан әрі – мәслихат) қарауына енгізіледі.
11. Құрмет грамотасымен наградтау туралы өтінішхат мәслихат сессиясында қаралғанға дейін түскен күнінен бастап 10 жұмыс күн ішінде мәслихаттың жергілікті өзін-өзі басқару және қоғамдық қауіпсіздік жөніндегі тұрақты комиссиясында (бұдан әрі – Комиссия) қаралады.
Комиссияның шешімі оның төрағасы қол қоятың қаулымен рәсімделеді және ұсынымдық сипатта болады.
12. Құрмет грамотасымен наградтау туралы шешімді мәслихат қабылдайды. Қарау нәтижесі бойынша мәслихат Құрмет грамотасымен наградтау немесе наградтаудан бас тарту туралы шешім қабылдайды. Бас тартқан жағдайда, әкім аппараты қабылданған шешім туралы өтінішхат беруші тұлғаға шешім қабылданған күннен бастап 2 жұмыс күн ішінде жазбаша хабарлайды.
Мәслихаттың шешiмi түпкiлiктi болып табылады.
13. Құрмет грамотасына әкім және мәслихат төрағасы қол қояды.
14. Құрмет грамотасын салтанатты түрде әкім және мәслихат төрағасы тапсырады.
15. Наградталған адам, көрсетілген адамға қатысты соттың айыптау үкімі заңды күшіне енген жағдайда әкімнің ұсынысы негізінде мәслихат шешімімен Құрмет грамотасынан айырылады.
16. Осы Ереженің 15-тармағында көзделген негіздер бойынша Құрмет грамотасынан айырылған адамдарды қайта наградтау жүргізілмейді.
17. Заңсыз сотталған және толық ақталған азаматтар әкімнің ұсынысы негізінде мәслихат шешімімен Құрмет грамотасына құқықтарын қалпына келтіреді.
