ЗҚАИ-ның ескертпесі!
Осы бұйрықтың қолданысқа енгізілу тәртібін 4 т. қараңыз
"Жер қойнауы және жер қойнауын пайдалану туралы" Қазақстан Республикасының Кодексі 64-бабының 17-2) тармақшасына сәйкес БҰЙЫРАМЫН:
1. Осы бұйрыққа қосымшаға сәйкес қоса беріліп отырған қатты пайдалы қазбалар кен орындарын барлау жөніндегі ең төменгі талаптар бекітілсін.
2. Қазақстан Республикасы Өнеркәсіп және құрылыс министрлігінің Геология комитеті заңнамада белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркелуін;
2) осы бұйрықты Қазақстан Республикасы Өнеркәсіп және құрылыс министрлігінің интернет-ресурсында орналастыру.
3. Осы бұйрықтың орындалуын бақылау жетекшілік ететін Қазақстан Республикасының Өнеркәсіп және құрылыс вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік алпыс күн өткен соң қолданысқа енгізіледі.
|
Қазақстан Республикасы Өнеркәсіп және құрылыс министрінің міндетін атқарушы |
А. Бейспеков |
"КЕЛІСІЛДІ"
Қазақстан Республикасы
Ұлттық экономика министрлігі
"КЕЛІСІЛДІ"
Қазақстан Республикасы
Қаржы министрлігі
| Қазақстан Республикасы Өнеркәсіп және құрылыс министрінің міндетін атқарушысының 2024 жылғы 5 сәуірдегі № 122 Бұйрығына қосымша |
Қатты пайдалы қазбалар кен орындарын барлау жөніндегі ең төменгі талаптар
1. Жер қойнауын пайдаланушылар қатты пайдалы қазбалар кен орындарын барлау кезінде мынадай ең төменгі талаптар сақталады:
1) келісімшартқа немесе лицензияға сәйкес жер қойнауын пайдалануға берілген жер қойнауы учаскесінің кеңістіктік шекаралары шеңберінде қатты пайдалы қазбаларды барлау жөніндегі операцияны жүргізу;
2) жер қойнауын пайдалану бойынша белгіленген қаржылық лицензиялық және келісімшарттық міндеттемелердің орындалуын қамтамасыз ету;
3) барлау жоспарында көзделген жұмыстардың түрлерін, тәсілдері мен әдістерін қолдана отырып, қатты пайдалы қазбаларды барлау жөніндегі операцияны жүргізу;
4) барлау жұмыстары басталғанға дейін жер қойнауын зерттеу жөніндегі уәкілетті органның аумақтық бөлімшесіне электрондық жеткізгіштерде барлау жоспарының көшірмесін ұсыну;
5) "Жер қойнауы және жер қойнауын пайдалану" Қазақстан Республикасы Кодексінің 194-бабының 2-тармағына сәйкес барлау жөніндегі жұмыстарды құжаттандыру жөніндегі талаптарды сақтау және жер қойнауын дұрыс зерделеу үшін қажетті барлық мәліметтерді көрсету;
6) қатты пайдалы қазбаларды барлау жөніндегі жер қойнауы учаскесі шегінде ілеспе компоненттерді зерделеу.
