"Масс-медиа туралы" Қазақстан Республикасының Заңының 41-бабы 2-тармағына сәйкес БҰЙЫРАМЫН:
1. Осы бұйрыққа қосымшаға сәйкес Бұқаралық ақпарат құралдары қызметін өзін-өзі реттеу мәселелері жөніндегі қоғамдық-кәсіптік кеңес туралы үлгілік ереже бекітілсін.
2. Қазақстан Республикасы Мәдениет және ақпарат министрлігінің Бұқаралық ақпарат құралдары саласындағы мемлекеттік саясат департаменті заңнамада белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрықты Қазақстан Республикасы Мәдениет және ақпарат министрлігінің интернет-ресурсында орналастыруды;
3) осы бұйрық Қазақстан Республикасының Әділет министрлігінде мемлекеттік тіркелгеннен кейін он жұмыс күні ішінде осы тармақтың 1) және 2) тармақшаларында көзделген іс-шаралардың орындалуы туралы мәліметтерді Қазақстан Республикасы Мәдениет және ақпарат министрлігінің Заң департаментіне ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Мәдениет және ақпарат вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасы Мәдениет және ақпарат министрінің міндетін атқарушы |
А. Курманова |
"КЕЛІСІЛДІ"
Қазақстан Республикасының
Қаржы министрлігі
"КЕЛІСІЛДІ"
Қазақстан Республикасының
Ұлттық экономика министрлігі
| Қазақстан Республикасы Мәдениет және ақпарат министрінің міндетін атқарушы 2024 жылғы 9 қазандағы № 471-НҚ бұйрыққа қосымша |
Бұқаралық ақпарат құралдары қызметін өзін-өзі реттеу мәселелері жөніндегі қоғамдық-кәсіптік кеңес туралы үлгілік ереже
1-тарау. Жалпы ережелер
1. Осы Бұқаралық ақпарат құралдары қызметін өзін-өзі реттеу мәселелері жөніндегі қоғамдық-кәсіптік кеңес туралы үлгілік ереже (бұдан әрі – Үлгілік ереже) "Масс-медиа туралы" Қазақстан Республикасының Заңы 41-бабының 2-тармағына сәйкес әзірленді және бұқаралық ақпарат құралдары қызметінің өзін-өзі реттеу мәселелері жөніндегі қоғамдық-кәсіптік кеңестің (бұдан әрі – Кеңес) мәртебесі мен өкілеттігін айқындайды.
2. Кеңестің негізгі мақсаты бұқаралық ақпарат құралдарының қызметінде журналистердің Әдеп кодексінің (бұдан әрі – Кодекс) кәсіптік стандарттарының жоғары деңгейін сәйкес болып табылады.
3. Кеңес медиа саласын дамыту мәселелері бойынша ұсыныстар мен ұсынымдар әзірлеу үшін құрылатын тұрақты жұмыс істейтін консультативтік-кеңесші орган болып табылады.
2-тарау. Кеңестің міндеттері, функциялары мен өкілеттіктері
4. Кеңестің міндеттері:
1) Кодекстің кәсіби стандарттарын ілгерілету;
2) журналистердің кәсіптік деңгейін арттыруға жәрдемдесу.
5. Республикалық кеңестің негізгі функциясы Кодексті әзірлеу болып табылады.
Негізгі функцияны іске асыру үшін өңірлік кеңестер Кодексті әзірлеу кезінде пайдаланылатын ұсыныстар мен ұсынымдарды әзірлейді және Республикалық кеңеске енгізеді.
6. Кеңестің өкілеттіктері:
1) Кеңес қызметіне қатысты мәселелер бойынша ақпарат пайдаланушылардан және иеленушілерден қажетті ақпаратты сұратады және алады;
2) өз құзыретіне кіретін мәселелер бойынша мемлекеттік органдарға жүгінеді.
3-тарау. Кеңес қызметін ұйымдастыру
7. Кеңес төрағадан, төрағаның орынбасарынан және кемінде 7 (жеті) Кеңес мүшелерінен тұрады.
Төраға Кеңес мүшелерінің арасынан қатысып отырған Кеңес мүшелерінің жай көпшілік даусымен сайланады.
Отырысты төраға, ол болмаған кезде – төрағаның орынбасары, төрағаның орынбасары болмаған кезде – Кеңес мүшелерінің көпшілік дауысымен сайланған Кеңеске қатысып отырған мүшесі басшылық етеді.
Төраға отырысты өткізу регламентін (сөздері мен баяндамалардың ұзақтығын, баяндамашылардың сөз сөйлеу тәртібін) айқындайды.
Кеңес мүшелерінің әрқайсысы күн тәртібіндегі мәселелер бойынша өз ұстанымын білдіреді.
8. Кеңес мүшелері жалпы жиналыста сайланады және бұқаралық ақпарат құралдарының кәсіптік қоғамдастығы өкілдерінен, жергілікті кәсіптік қоғамдастықтар, бұқаралық ақпарат құралдары өкілдерінен тұрады.
Кеңес хатшысы жалпы жиналыста тағайындалады және ұйымдастыру функцияларын орындайды. Кеңес хатшысы Кеңес мүшесі болып табылмайды және дауыс беруге қатыспайды.
Кеңес отырыстарын ұйымдастыру мынадай дәйекті іс-әрекеттерден тұрады:
1) отырыс өткізу жоспарланған күнге дейін кемінде үш жұмыс күнінен кешіктірмей Кеңес хатшысы шақырту, күн тәртібін және қажетті материалдарды жібереді;
2) егер отырысқа Кеңес мүшелерінің жалпы санының кемінде үштен екісі қатысса, отырыс заңды деп есептеледі. Кворум болмаған кезде отырыс бес жұмыс күнінен аспайтын мерзімге ауыстырылады;
3) Кеңес мүшелері бір жұмыс күні ішінде алдағы отырысқа өзінің қатысатынын немесе қатыспайтынын (себептерін көрсете отырып) растайды.
Күн тәртібіндегі мәселелер Кеңес алдына қойылған мақсаттар мен міндеттерге сәйкес енгізіледі.
9. Кеңес мүшелері:
1) Кеңес жұмысына белсенді қатысады;
2) Кодекс және Қазақстан Республикасының заңнамасының нормаларын сақтайды;
3) жеке мүдделілік оның Кеңес мүшесінің міндеттерін тиісінше орындауына әсер етуіне жол бермейді, шешімдерді әділ қабылдауға ықпал ететін мүдделер қақтығысымен жағдайлар туындаған кезде Кеңес мүшелері бұл туралы Кеңес төрағасын алдын ала хабардар етеді және мұндай шешімдерді талқылауға және қабылдауға қатыспайды.
10. Кеңес отырыстары тоқсанына кемінде бір рет өткізіледі.
Отырыс бейнеконференцбайланысты және қолжетімді онлайн-сервистерді пайдалана отырып өткізіледі.
Отырыс таратылуы шектелген қызметтік ақпаратты немесе мемлекеттік құпияларды қамтитын мәселелер қаралған кезде, сондай-ақ техникалық мүмкіндік болмаған кезде тікелей қатысу форматында өткізіледі. Бұл ретте Кеңес мүшелері отырысқа өзінің қатысуын қамтамасыз етеді.
Отырысқа қатысатын Кеңес мүшелерінің есебін Кеңес хатшысы жүзеге асырады.
Аралас режим кезінде бейнеконференциялар мен қолжетімді онлайн-сервистерді бір уақытта қолдана отырып, тікелей қатысу форматы қолданылады.
11. Кеңес шешімдері қатысып отырған Кеңес мүшелерінің қарапайым көпшілік дауысымен қабылданады.
Кеңес шешімдерін қабылдау кезінде дауыстар тең болған кезде, Кеңес төрағасының шешуші дауысы болады.
12. Кеңес отырыстарының хаттамаларын Кеңес хатшысы жүргізеді және оған Кеңес төрағасы не оның орнындағы адам қол қояды.
