Ескерту: Бұйрықтың күші жойылды - ҚР Білім және ғылым министрлігінің 2004 жылғы 9 қыркүйектегі N 732 бұйрығымен.
-----------Бұйрықтан үзінді-------------
Қазақстан Республикасы Премьер-Министрiнiң 2004 жылғы 6 наурыздағы N 77-ө өкiмiне сәйкес бiлiм және ғылым мәселелерi бойынша заңға тәуелдi кесiмдерге тексерiс өткiзу барысында қолданыстағы заңнамаға қайшы келетiн актiлер анықталды. Ведомстволық нормативтiк базаны қолданыстағы заңнамаға сәйкестендiру мақсатында БҰЙЫРАМЫН:
1. Күшi жойылды деп танылсын:
1) N 666 тiркелген, "Қазақстан Республикасы Ғылым министрлігі-Ғылым академиясының ғылыми еңбектерiн басып шығару және тарату тәртiбiн жетiлдiру туралы" Қазақстан Республикасының Ғылым министрi-Ғылым академиясы Президентiнiң 1998 жылғы 30 қарашадағы N 233 бұйрығы...
Министрдің
міндетін атқарушы
----------------------------------------
Қазақстан Республикасы Ғылым министрлiгi-Ғылым академиясы (бұдан әрi - Ғылымминi-Ғылым академиясы) алқасының 1998 жылғы 16 қазандағы N 31 қаулысына және Ғылымминi-Ғылым академиясы Ғылыми-баспалық кеңесiнiң 1998 жылғы 8 қыркүйектегi шешiмiне сәйкес және Ғылымминi-Ғылым академиясының ғылыми еңбектерiн басып шығару және тарату тәртiбiн жетiлдiру мақсатында бұйырамын:
1. Қазақстан Республикасы Ғылым министрлiгi-Ғылым академиясының қоса берiлген ғылыми еңбектерiн басып шығару тәртiбi бекiтiлсiн (әрi қарай - Тәртiбi).
2. Ғылымминi-Ғылым академиясының құрылымдық бөлiмшелерi, баспалары мен Тәртiпте көрсетiлген өзге ұйымдары Ғылымминi-Ғылым академиясы ғылыми еңбектерiн осы Тәртiпке сәйкес басып шығару және таратуды қамтамасыз ету үшiн тиiстi шаралар қолдансын.
3. Осы бұйрықтың орындалуын бақылау Мемлекеттiк ғылыми-техникалық сараптау және ақпараттық инфрақұрылым департаментiнiң директоры В.И. Дробжевке жүктелсiн.
Министр-президент
Қазақстан Республикасы
Ғылым министрi - Ғылым
академиясы президентiнiң
1998 ж. 30 қараша
N 233 бұйрығымен
Бекітілген
Қазақстан Республикасы Ғылым министрлiгi-Ғылым
академиясының ғылыми еңбектерiн басып шығару
Тәртібі
I тарау. Жалпы ережелер
1 бөлiм. Осы тәртiппен реттелетiн қатынастар
1. Қазақстан Республикасы Ғылым министрлiгi-Ғылым академиясының ғылыми еңбектерiн басып шығарудың осы тәртiбi (әрi қарай - Тәртiбi) Қазақстан Республикасының Ғылым министрлiгi-Ғылым академиясы туралы ережелер (әрi қарай ҚР ҒМ - ҒА) және ҚР ҒМ - FA Ғылыми-баспалық кеңесi туралы ереже (әрi қарай - ҒБК) негiзiнде Қазақстан заңдары шеңберiнде әзiрлендi.
2. Осы Тәртiп ғылыми-баспалық қызметтi iске асыру барысында авторлар, ғылыми еңбектер авторлары ұжымдары, институттар (орталықтар) ғылым бөлiмшелерi, ҒБК секциялары, Ғылыми-баспалық кеңес, Қазақстан Республикасының Ғылым министрлiгi-Ғылым академиясы, баспалар, ҚазмемҒТАИ және басқа мүдделi мекемелер, ғылыми әдебиет оқырмандары арасында туындайтын қатынастарды реттейдi.
2 бөлiм. Негiзгi ұғымдар
3. Мәтiнде мынадай ұғымдар пайдаланылады:
1) оқырман адресi - белгiлi бiр оқырман аудиториясы (ортасы), егер ғылыми әдебиеттi алсақ - оның аудиториясы ғалымдар, ғылыми қызметкерлер, ғылымды мамандық тұтқан адамдар, ғылыми-көпшiлiк әдебиет болса - оның оқырмандары ғылымның осы саласының маманы емес;
2) басылым - редакциялық-баспалық өндеуден өткен полиграфиялық жағынан дербес безендiрiлген, ГОСТ белгiлеген шығу мәлiметтерi бар және кiтаптың мазмұнындағы ақпаратты беруге арналған баспасөз туындысы;
3) ғылыми басылымның анықтама аппараты-аннотация (түсiнiктеме), шығу мәлiметтерi, алғысөз, кiрiспе мақала, соңғы сөз, ескерту, түсiндiрме, библиографиялық тiзiм, көрсеткiштер, қосымшалар, кiтап рефераты, мазмұны т.б.;
4) мазмұны және тараулар тiзбесi - айдар көрсеткiшi, яғни атаулар көрсеткiшi:
мазмұны - басылымға кiрген шығарманың (туынды) көрсеткіші (әңгiме, мақала, құжаттар және т.б.);
тараулар тiзбесi - жеке басылым болып шыққан туындының атаулар көрсеткiшi;
5) ғылыми еңбектер - кiтаптар, кiтапшалар, монографиялар, оқулықтар, жинақтар, препринттер, мақалалар және т.б.;
6) кiтап-көлемi 48 беттен асатын периодикалық емес кiтап басылымы;
7) кiтапша - көлемi 4 беттен 48 бетке дейiнгi периодикалық емес кiтап басылымы;
8) монография - бiр немесе бiрнеше авторлардың бiр проблеманы болмаса тақырыпты толық және жан-жақты зерттеуiне арналған кiтап не кiтапша түрiндегi ғылыми басылым. Монография жеке эмпиризмдiк фактiлердi сипаттап және оларды зерделеуден ғылыми теорияларды жүйелi түрде баяндауға, тұжырымдамаларды негiздеуге, ғылыми iзденiстердiң стратегиясын жасауға мүмкiндiк бередi;
9) оқулық - оқу бағдарламасына лайықталған пәндi немесе оның тарауын, бөлiмiн жүйелеп баяндайтын және осындай басылым ретiнде ресми бекiтiлген оқулық басылым;
10) қолжазба - қолдан жазылған яки жазу машинкасына (компьютерге) басылған автордың мәтiндiк түпнұсқасы не көшiрмесi;
11) рецензия - қолжазбаның мазмұнына, композициясына, тiлi мен стилiне талдау, шығармаға әдiстемелiк бағасы, жалпы қорытындысы бар сын-пiкiр;
12) аннотация - баспа туындысының мазмұнына, мiндетi, нысаны және басқа ерекшелiктерiне тоқталатын қысқаша сипаттама. Ол түсiнiктi, қызықты, әдеби тiлмен жазылуы, туындының негiзгi ой-мақсатын, кiмдерге арналып жазылғанын анықтай бiлуi тиiс. Аннотацияның орташа көлемi 600 баспа таңбасы;
13) реферат - негiзгi нақты мәлiметтерi мен қорытындылары бар бастапқы құжаттың қысқаша мазмұнын баяндау. Реферат мәтiнi мынадай жоспар бойынша түзеледi: тақырып, пән (объект), жұмыстың сипаты мен мақсаты, пайдаланылған әдiс, нақты нәтижелерi, қолдану саласы. Рефератты негiзiнде жаратылыстану мен техникалық ғылымдар бойынша басылымдарда жариялайды. Рефераттың баспа таңбасымен орташа көлемi: мақалалар, патенттер - 1000, көлемi үлкен құжаттар үшiн - 2500 таңба;
14) авторлық табақ (авт.т.) - авторлар, аудармашылар, редакторлар және т.б. еңбегiн есептеу үшiн алынған туындының көлемiн өлшеу бiрлiгi. Бiр авторлық табақ 40000 (әрiптердi, сандарды, тыныс белгiлерi мен сөз арасындағы ашық жерлердi қосқанда) баспа таңбадан тұрады, яғни екi интервал (бiр бетте 30 жол әрбiр жолда 60 баспа таңбадан) аралықпен машинкаға басылған мәтiн 22-23 бетке тең болады, не 700 жол өлеңмен жазылған мәтiн, яки 3000 кв.см иллюстрациялық материал.
2 тарау. Ғылыми еңбектерді басып шығару тәртібі
3 бөлiм. Түпнұсқаны дайындау
4. Түпнұсқаның бағдарламасы не жоспары - автор түпнұсқада баяндағысы келетiн мәселелердiң толық тiзбесi.
Бағдарламаның жүйелi түсiндiрмесi бөлiмдер, тараулар, параграфтарға бөлiнедi. Ол туындының мазмұны мен құрылым принципiн ашып айтып бередi. Бағдарламаға болашақ кiтаптың атауы, көлемi, мақсаты, аннотациясы, оқырмандық адресi, анықтама аппаратының сипаттамасы мен көлемiн, иллюстрацияларының саны мен сипаты кiредi. Түпнұсқаның аты қысқа және оның негiзгi идеясын айқын бiлдiруi тиiс.
5. Түпнұсқа тақырыптың қазiргi деңгейiн көрсетуi, ғылыми-техникалық мәселелердi бiлiктi баяндауы, жақсы әдеби тiлмен анық құрылымдық баяндауды меңгеруi, әдемi орындалған өзiндiк суреттер, сызбалар, фотосуреттер түрiндегi безендiрулерi (иллюстрация) болуы тиiс.
6. Теруге даярланған түпнұсқа, әдетте, мынадай элементтерден тұруы қажет: мұқабаның оң жағындағы (бетi), кiтаптың бiрiншi бетi, аннотациясы (қазақ, орыс, ағылшын тілдерiнде), алғы сөзi, кiрiспесi, негiзгi авторлық текст, қосымшалары, иллюстрациялар, библиография, ескертулер мен түсiнiктемелер (комментарийлер), көрсеткiштер, мазмұны.
7. Түпнұсқаны рецензиялағанда мына схемаларды басшылыққа алған жөн:
1) тақырыптың толықтылығын негiздеу;
2) ғылыми мазмұнын бағалау;
3) тiлi мен стилiн, құрылымын (архитектоникасын) бағалау;
4) иллюстрациялық материалына баға беру;
5) түпнұсқаның көлемiне баға беру (қысқарту не толықтыру);
6) жалпы қорытынды (түзетуден кейiн басып шығару, жалпы жарияламау).
Рецензияда бiрiншi кезекте автордың мына принциптiк сипаттағы мәселелердi қалай шешкенiн көрсетуi талап етiледi: ғылыми мазмұны-мағынасы, материалды толық баяндауы, ғылыми жаңалығы, тақырыптың толықтылығы, көкейтестiлiгi, қарауға ұсынылған түпнұсқаның iргелi және қолданбалы маңызы.
4 бөлiм. Ғылыми еңбектердi басып шығару квотасы
8. Қазақстан Республикасы Ғылым министрлiгi - Ғылым академиясының ғылыми еңбектерiн орталықтандырылған қаржы есебiнен басып шығару үшiн әрбiр ғылыми бөлiмшеге жыл сайын квота белгiленедi.
9. Квота ғылыми бөлiмшелер iшiнде орындалатын ғылыми бағдарламалардың көлемiне, басым iргелi және қолданбалы зерттеулердiң дамуы үшiн маңыздылық дәрежесiне қарай институттар арасында бөлiнедi.
5 бөлiм. Ғылыми еңбектердi басып шығарудың қаржы көздерi
10. Ғылыми еңбектердi басып шығаруды қаржыландыру ғылыми бөлiмшелерге iргелi зерттеулерi бағдарламаларына квоталарға сәйкес белгiленген қаражат есебiнен бiр орталықтан жүзеге асырылады.
11. Қаржыландырудың басқа да көздерi пайдаланылады:
1) бюджеттен тыс қаржылар;
2) Ғылым қорының қаражаттары;
3) Ақпарат және қоғамдық келiсiм министрлiгi тапсырылған тақырыптама не бағыт бойынша басылымдарға бөлген қаражат;
4) шетелдiк және отандық компаниялардың, фирмалар, банктер, жеке тұлғалардың және т.б. демеушiлiк қолдауы;
5) халықаралық гранттар;
6) автордың қаражаты.
12. Орталықтандырылған бюджеттен қаржыландыру есебiнен автор жылына бiр ғана кiтап шығаруы мүмкiн (жеке немесе ұжым болып). Басқа тең жағдайларда Қазақстан Республикасы Ғылым министрлігi-Ғылым академиясының ұйымдарында қызмет ететiн авторларға артықшылық берiледi.
6 бөлiм. Басылымға түпнұсқа таңдау
13. Түпнұсқа мынадай таңдау кезеңдерiнен өтуi тиiс:
1) автор (болмаса авторлар ұжымы) институт ғылыми кеңесiнiң қарауына (ғылыми орталықтың ғылыми-техникалық кеңесiне) өзiнiң түпнұсқасымен қоса осы тақырыптама бойынша зерттеулер жағдайы туралы қысқаша аналитикалық шолу тапсырады, болашақ кiтапты жоғары оқу орындарындағы оқу процесiн жетiлдiру үшін пайдалану мүмкiншiлiгiн атап көрсетедi, басылымды тарату және потенциялды оқырмандар тобы туралы мәлiметтер келтiредi;
2) институт (орталық) басшылығы түпнұсқаны осы мамандық бойынша екi ғылым докторына iшкi және сыртқы рецензияға жiбередi. Рецензияларды алған соң түпнұсқа ғылыми кеңестiң мәжілісiнде - талқыланады. Ғылыми кеңес оң қорытынды берген жағдайда осы саланың жетекшi ғалымдары қатарынан жауапты редактор тағайындалады;
3) Редакцияланған түпнұсқа рецензенттердiң сын-пiкiрлерiмен және республиканың жақын және ұзақ мерзiмдi перспективалық дамуының негiзгi бағыттарына сәйкестiгi көрсетiлген, жұмыстың iргелi ғылымдар дамуы үшiн толықтылығы, маңызы, автор зерттеп жүрген проблемалардың әртүрлi деңгейдегi конференциялардағы (соңғы 5 жылда) басымдылығы мен талқылану дәрежесi айтылған ғылыми кеңестiң қорытындысымен тиiстi ғылыми бөлiмшеге жiберiледi;
4) ғылыми бөлiмше ғылыми - баспа секциясымен бiрлесе отырып ғылымның әртүрлi салалары бойынша жоғары бiлiктi рецензенттер тiзiмiн жасап, бекiтедi (құрамын ротациялау принципiн сақтай отырып) олармен еңбек келiсiмiн жасайды, ол үшiн түпнұсқаларды жабық ақылы рецензиялаудан өткiзедi және авторды рецензиямен таныстырады, автордан ескертулерге жазбаша түрде жауап хат алады;
5) тиiстi ҒБК секция мен бөлiмше бюросының бiрлескен шешiмi бойынша түпнұсқа бөлiмше басылымдарының жоспарына енгiзiледi немесе қайтарылып берiледi (оның дәлелдi себептерi келтiрiледi);
6) ғылыми бөлiмше жыл сайын мамыр - маусым айларында өзiнiң орталықтан қаржыландыру жөнiндегi квотасын ескере отырып келесi жыл басылымдарының редакциялық дайындығын жасайды (қаржыландыру мерзiмi мен көздерiн көрсете отырып), оған еңбектердiң аннотациясын (рефераттарын) тiркеп, ғылыми-баспа жұмыстары секторына жiбередi;
7) ғылыми-баспа секторы Қазақстан Республикасы Ғылым министрлiгi- Ғылым академиясы ғылыми мекемелерiнiң бiр орталықтан қаржыландырылатын ғылыми және ғылыми-көпшiлiк әдебиетi басылымдарының жылдық жоспарының жобасын қалыптастырады да материалдарын Ғылыми-баспа кеңесiне тапсырады;
3) ҒБК Қазақстан Республикасы Ғылым министрлiгi-Ғылым академиясы ғылыми басылымдардың жылдық жоспарын, сондай-ақ орталықтандырылған қаржы есебiнен шығарылатын ғылыми еңбектер тiзбесiн қарайды және бекiтедi.
14. Ғылыми-баспа жұмыстары секторы осы жылғы маусым айында басын түзу үшiн Мемлекеттiк ғылыми-техникалық бағдарламалар және оларды ресурстық қамсыздандыру департаментiне ҒБК бекiткен орталықтандырылған қаржы бюджетi есебiнен шығарылатын ғылыми еңбектер тiзбесiмен шығыс сметасының жобасын тапсырады.
15. Орталықтандырылған қаржы бюджетi есебiнен шығарылатын ғылыми еңбектер тiзбесiн ҚР ҒМ-ҒА алқасы бекiтедi де анықталған смета жобасымен бiрге (әрбiр монография бойынша калькуляцияны қоса алғанда) 1 желтоқсанда тапсырылады.
7 бөлiм. Ғылыми еңбектердi шығару
16. ҚР ҒМ-ҒЛ ғылыми еңбектерiн орталықтандырылған қаржы есебiнен шығаруды Қазақстан Республикасының Ғылым министрлiгi-Ғылым академиясы жариялаған ғылыми әдебиет шығару жөнiндегi ашық конкурста (тендер) жеңiп шыққан баспа жүзеге асырады.
17. ҚР ҒМ-ҒА қаржы көздерi мен түпнұсқалардың дайындық мерзiмi көрсетiлiп бекiтiлген ғылыми басылымдар шығару жылдың жоспары тақырыптық және редакциялық жоспарларға кiргiзу үшiн баспаға жiберiледi.
18. ҚР ҒМ-ҒА қаржы көздерi мен дайындық мерзiмi көрсетiлiп жылдық ғылыми басылымдар шығару жоспарына енгiзiлген түпнұсқалар баспаның көрсеткен мерзiмi мен талаптарына сәйкес баспаға ұсынылады:
1) түпнұсқа мен иллюстрациялық материал баспаға әбден бiткен және жинақталған түрiнде (библиографиясы, көрсеткiштерi, тараулар тiзбесi немесе мазмұнымен қоса) тақырыптық жоспарда көзделген көлемде тапсырылуы тиiс;
2) физика-математика ғылымдары, геология, тау-кен iстерi, металлургия, энергетика, химия, география, экономика жөнiндегi жұмыстар, сондай-ақ (қажет болған жағдайда) медицина және басқа ғылымдар бойынша еңбектер үшiн сараптау комиссиясының актiсi. Актте суреттер мiндеттi түрде ескертiлуi тиiс. Егер карталар не схемалар болса, онда олардың қандай географиялық негiзде орындалғанын (тек қана 1:2500000 масштабты карталарды пайдалану мүмкiн) көрсету қажет. Егер түпнұсқа сараптаманы қажет етпейтiн болса, оны институт директорының хатында, болмаса ғылыми кеңестiң шешiмiнен көшiрмесiнде көрсету керек ("Ашық жариялауға бекiтiлген, сараптау актiсi талап етiлмейдi");
3) автордың жұмысында құпия яки жариялауға болмайтын материалдар не аяқталмаған болмаса жариялауға тыйым салынған зерттеу және эксперименталдық жұмыстардың мәліметтері келтiрiлмегендiгi туралы анықтама. Анықтаманы мекеменiң басшысы бекiтуi тиiс;
4) тиiстi министрлiк қорытындысының көшiрмесi (егер талап етiлсе);
5) кiтаптың шығуына мүдделi ұйымдар мен тұлғалар тiзiмi, олардың саны көрсетiлген таралымға сәйкес келуi тиiс;
6) түпнұсқаның тапсырысты басылымына - ғылыми мекеменiң директоры мен бас бухгалтерiнiң кiтаптi шығаруға байланысты барлық шығынды төлейтiнi туралы кепiлдеме хаты;
7) түпнұсқаның бiрiншi бетiнде жауапты редактордың:
"баспаға дайын" деген таңбасы мен қолы болуы тиiс. Жинақтар үшiн жауапты редактордың қолымен қатар редакциялық алқаның барлық мүшелерiнiң қолы болуы шарт.
Сонымен бiрге бiрiншi бетте автор (ал жинақтар үшiн жауапты редактор) аударма мәтiндерi, дәйексөздер, латын (не шетел тiлiндегi мәтiн), аты-жөнi, тегi, сандық материалдар тексерiлдi деген белгi қоюы тиiс.
Жинақтарда мақала авторлары қол қоюы қажет немесе олардың түпнұсқамен сәйкестiгiн редакциялық алқаның жауапты хатшысы растауы тиiс;
8) кiтаптың мұқабасында жоғарыдан төмен, ретiмен:
а) кітаптың басында: "Қазақстан Республикасының Ғылым министрлiгi-Ғылым академиясы";
б) автордың аты-жөнi, тегi (монографиялар мен кiтапшалар үшiн);
в) кiтаптың аты;
г) том, бөлiм, шығарылым не кiтаптың рет нөмiрi (басылым жалғастырылатын немесе сериялы болса);
д) басылымның шығу орны (Алматы) мен шығатын жылы;
9) түпнұсқаның бiрiншi бетiнде:
а) "Қазақстан Республикасының Ғылым министрлiгi-Ғылым академиясы және институт атауы" (еңбектер жинағына институт атауы орнына: "... институтының еңбектерi, Том ... ");
б) автордың аты-жөнi, тегi (монографиялар мен кiтапшалар үшiн);
в) кiтап аты (кейде оның мазмұнын айқындайтын тақырыпша):
г) том, бөлiм, шығарылым не кiтаптың рет нөмiрi (басылым жалғастырылатын не сериялы болса);
д) баспаның атауы;
e) басылымның шығу орны (Алматы) мен шығатын жылы;
10) бiрiншi беттiң екiншi жағында аннотация (реферат) берiледi, кiтаптың жауапты редакторы, редакциялық алқасы, құрастырушылары көрсетiледi;
11) бөлiмдердiң, бөлiктердiң, тараулар, параграфтар атаулары "Тараулар тiзбесiнде" ретiмен әрi қысқартылмаған түрде берiледi.
Шығарманың не оның бөлiктерiнiң атаулары олардың орындарынан белгiлi болады: маңызы жағынан теңбе-тең атаулар азат жолда бiр қатармен жазылады;
12) бiрнеше дербес (жеке-жеке) мақалалардан тұратын кiтаптың "Мазмұнында" (институттардың жинақтары, ғылыми еңбектерi) авторлардың тегi (фамилиялары) мен мақалалардың атаулары) рет-ретiмен бiрiнен кейiн бiрi келтiрiледi. Аты-жөнi фамилияның алдында жазылады. Мақалаларды нөмiрлеуге және олардың парақтарының нөмiрлерiн түпнұсқада жазуға болмайды;
13) "Тараулар тiзбесi" не "Мазмұны" кiтаптың соңында келтiрiледi.
8 бөлiм. Жарияланған басылымдарды
құлақтандыру және рефераттау
19. Ғылыми еңбектерi ҚР Ғылым министрлiгi-Ғылым академиясының жоспарына енген авторлар түпнұсқаға аннотацияларын не рефераттарын (жаратылыстану және техникалық ғылымдар үшiн) қазақ, орыс, ағылшын тілдерiнде басылған және дискеттер түрiнде (мәтiндер текст форматында сақталған болуы тиiс, бiрақ *DОС. форматында емес) материалды ҒБК қарауына уақытылы дайындап тапсыру үшiн ғылыми-баспа жұмыстары секторына ұсынады.
20. ҚР ҒМ-ҒА Ғылыми-баспа кеңесi мақұлдаған жарияланбақ басылымдар туралы немесе рефераттар (қазақ, орыс, ағылшын тiлдерiнде) мына ұйымдарға жiберiледi:
1) ғылыми-зерттеу және тәжiрибе-конструкторлық жұмыстар бойынша рефераттар жинағында жариялау үшін (5 сериялы, басылу мерзiмi - жылына екi рет) және (немесе) рефераттық журналдарда шығару мақсатында ҚазмемҒТАИ;
2) ҚР ҒМ-ҒЛ ғылыми журналдар редакциялары: "ҚР ҒМ-ҒА хабаршысы", "ҒМ-ҒА баяндамалары", "ҚР ҒМ-ҒА хабарлары мына сериялар бойынша: физика-математика ғылымдары, биологиялық және медицина ғылымдары, химия-технологиялық ғылымдар, қоғамдық және гуманитарлық ғылымдар, филология ғылымдары", "Қазақстан геологиясы" "Минералдық шикiзатты кешендi пайдалану" (тиiстiлiгiне қарай) журналдар мұқабаларының 3 және 4 жақтарына басу үшiн;
3) проспектiлерге енгiзу мақсатымен баспаларға;
4) республиканың жетекшi кiтапханаларына, университеттерге, ғылыми орталықтарға оқырмандармен мамандардың мүдделiлiгiн анықтау мақсатымен;
5) жариялануға дайындалып жатқан және басылып шыққан еңбектер туралы ағылшын тiлiндегi ақпарат-мәлiметтер Қазақстан Республикасы Ғылым министрлiгi-Ғылым академиясы интернетiне орналастырылады (жалпы көлемi 0,5 - 1 авт.т.).
3 тарау. Баспадан шыққан еңбектерді тарату
9 бөлiм. Ғылыми еңбектердi тарату, сату бағасын
қалыптастыру және сатудан түскен қаржыны бағыттау
21. Басылған ғылыми еңбектердi тарату:
1) баспалар тегiн тарататын ұйымдар:
Ақпарат және баспасөз министрiнiң 1992 ж. 26 қарашадағы N 1717 бұйрығына сәйкес мiндеттi сүйiншi даналар: Қазақстан Республикасы Президентiнiң Әкiмшiлiгi - 2, Кiтап палатасы - 1, Ақпарат және қоғамдық келiсiм министрлiгi - 2, Кiтап музейi - 1, Ұлттық кiтапхана - 1, ҚР ҒМ-ҒА Орталық ғылыми кiтапханасы (ОҒК) - 1, Әл-Фараби атындағы ҚазМҰУ кiтапханасы - 1, Ғылым министрлiгi-Ғылым академиясы - 1, баспа - 6;
авторға не авторлар ұжымына - 5 дана;
Тәуелсiз Мемлекеттер Достастығы елдерi мен алыс шетелдер бойынша кiтапхана қоры мен кiтапханааралық алмасуды түзу үшiн (орталықтандырылған қаржы есебiнен басылған жағдайда): ОҒК - 30 дана, кiтапханалар қорына (шыққан басылымның бейiнiне қарай): Республикалық ғылыми-техникалық кiтапхана-5 дана, Республикалық ауыл шаруашылық кiтапхана-5 дана, ҚР ҒМ-ҒА ғылыми-зерттеу институттарының (ұлттық орталықтар) кiтапханалары және Республиканың жетекшi жоғары оқу орындары кітапханалары-1 данадан;
2) басылымды шығаруға жауапты институт (орталық) таралымды әрi қарай жалғастырып, редакциялық алқамен бiрлесiп сату бағасын түзедi:
тарату мәселесiн оқырман өресiне сәйкес жүргiзген абзал: тектес мекемелер, бағдарламалық кеңестер, мамандар ғылыми қоғамы, өте мүдделi ұйымдар, жеке және заңды тұлғалар т.б. болуы мүмкiн;
басылымның бағасын белгілеуде өзiндiк құны мен сұраным нарығына сүйену қажет.
22. Бiр орталықтан қаржыландыру жағдайында басылымды сатудан түскен қаражат редакциялық шығынды төлеуге (аннотацияны не рефератты қазақ, ағылшын тілдеріне аудару, рецензиялау) және ғылыми басылымды әзiрлеуге, шығару мен таратуға байланысты шығысты iшiнара өтеуге кетедi.
23. Басылымды тарату туралы есеп ҚРҒМ-ғылыми-баспа секторына осы жылғы желтоқсан айының 10-нда тапсырылады.
