Қазақстан Республикасы Президентінің 2015 жылғы 29 желтоқсандағы № 153 Жарлығымен бекітілген Әдеп жөніндегі уәкіл туралы ереженің 8-1-тармағына сәйкес БҰЙЫРАМЫЗ:
1. Қоса беріліп отырған Әдеп жөніндегі уәкілдің сыбайлас жемқорлыққа қарсы іс-қимыл жөніндегі уәкілетті органмен өзара іс-қимыл жасау қағидалары бекітілсін.
2. Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Превенция қызметі осы бірлескен бұйрықты Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) ресми интернет-ресурсына Қазақстан Республикасының заңнамасымен белгіленген тәртіпте орналастыруды қамтамасыз етсін.
3. Осы бірлескен бұйрықтың орындалуын бақылау Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) Төрағасының бірінші орынбасарына және Қазақстан Республикасы Мемлекеттік қызмет істері агенттігі Төрағасының мемлекеттік қызмет саласындағы бақылау мәселелеріне жетекшілік ететін орынбасарына жүктелсін.
4. Осы бірлескен бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасы Мемлекеттік қызмет істері агенттігінің Төрағасы _________________Д. Жазықбай |
Қазақстан РеспубликасыСыбайлас жемқорлыққа қарсыіс-қимыл агенттігінің (Сыбайласжемқорлыққа қарсы қызмет) Төрағасы_______________А. Жұмағали |
| Қазақстан Республикасы Мемлекеттік қызмет істері агенттігі Төрағасының 2023 жылғы "_"________ № ____ және Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) Төрағасының 2023 жылғы "_"_____ № ____ бірлескен бұйрығымен бекітілген |
Әдеп жөніндегі уәкілдің сыбайлас жемқорлыққа қарсы іс-қимыл жөніндегі уәкілетті органмен өзара іс-қимыл жасау қағидалары
1. Осы Әдеп жөніндегі уәкілдің сыбайлас жемқорлыққа қарсы іс-қимыл жөніндегі уәкілетті органмен өзара іс-қимыл жасау қағидалары (бұдан әрі – Қағидалар) Қазақстан Республикасы Президентінің 2015 жылғы 29 желтоқсандағы №153 Жарлығымен бекітілген Әдеп жөніндегі уәкіл туралы ереженің 8-1–тармағына сәйкес әзірленді және әдеп жөніндегі уәкілдің сыбайлас жемқорлыққа қарсы іс-қимыл жөніндегі уәкілетті органмен өзара іс-қимыл тәртібін айқындайды.
2. Әдеп жөніндегі уәкіл жүктелген функцияларды орындау процесінде сыбайлас жемқорлыққа қарсы іс-қимыл саласындағы өз қызметі бойынша сыбайлас жемқорлыққа қарсы іс-қимыл жөніндегі уәкілетті органмен мынадай мәселелер бойынша өзара іс-қимыл жасайды:
1) мемлекеттік қызметшілерге (оның ішінде сыбайлас жемқорлық тәуекелдеріне шалдыққан лауазымдарды атқаратын мемлекеттік қызметшілерге) Қазақстан Республикасының сыбайлас жемқорлыққа қарсы іс-қимыл саласындағы заңнамасының талаптарын сақтау мәселелері бойынша консультациялық көмек көрсету;
2) мемлекеттік қызметшілердің (оның ішінде сыбайлас жемқорлық тәуекелдеріне шалдыққан лауазымдарды атқаратын мемлекеттік қызметшілердің) заңдарда белгіленген шектеулер мен тыйымдарды сақтауына ықпал ететін іс-шаралар өткізу;
3) мемлекеттік қызметшілердің (оның ішінде сыбайлас жемқорлық тәуекелдеріне шалдыққан лауазымдарды атқаратын мемлекеттік қызметшілердің) Қазақстан Республикасының сыбайлас жемқорлыққа қарсы іс-қимыл саласындағы заңнамасының нормаларын бұзу фактілері бойынша жеке және заңды тұлғалардың өтініштерін қарау;
4) құқық бұзушылықтар жасауға ықпал ететін себептер мен жағдайларға талдау жүргізу (мемлекеттік қызметшілер Қазақстан Республикасының сыбайлас жемқорлыққа қарсы іс-қимыл саласындағы заңнамасын бұзған жағдайларда);
5) Қазақстан Республикасының сыбайлас жемқорлыққа қарсы іс-қимыл саласындағы заңнамасын сақтау мәселелері бойынша мемлекеттік қызметшілермен (оның ішінде сыбайлас жемқорлық тәуекелдеріне шалдыққан лауазымдарды атқаратын мемлекеттік қызметшілермен) түсіндіру жұмысын жүргізу;
6) сыбайлас жемқорлық тәуекелдеріне шалдыққан лауазымдарды атқаратын мемлекеттік қызметшілерге қатысты бұқаралық ақпарат құралдардарында мониторинг жүргізу барысында анықталған жағымсыз материалдармен (оның ішінде олардың аккаунттарының мониторингі барысында анықталған материалдар) жұмыс жүргізу;
7) сыбайлас жемқорлыққа қарсы іс-қимыл саласындағы заңнама нормаларын бұзуға жол берген мемлекеттік қызметшілердің жауаптылығын қарау.
3. Сыбайлас жемқорлыққа қарсы іс-қимыл саласындағы әдеп жөніндегі уәкілдердің қызметі мемлекеттік қызмет істері жөніндегі уәкілетті орган бекітетін олардың тиісті жылға арналған үлгілік жұмыс жоспарларына әртүрлі профилактикалық іс-шараларды енгізу арқылы ұйымдастырылады.
4. Сыбайлас жемқорлыққа қарсы іс-қимыл жөніндегі уәкілетті орган жыл сайын келесі жылдың бірінші тоқсанының алдындағы айдың бірінші күнінен кешіктірмей мемлекеттік қызмет істері жөніндегі уәкілетті органға алдағы жылға арналған әдеп жөніндегі уәкілдердің үлгілік жоспарын қалыптастыру үшін профилактикалық сипаттағы іс-шаралар бойынша ұсыныстар жолдайды.
5. Жыл сайын сыбайлас жемқорлыққа қарсы іс-қимыл жөніндегі уәкілетті органнан келіп түскен ұсыныстар негізінде келесі жылдың бірінші тоқсанының алдындағы айдың жиырмасынан кешіктірмей мемлекеттік қызмет істері жөніндегі уәкілетті орган сыбайлас жемқорлыққа қарсы іс-қимыл саласындағы қызметтің өзекті бағыттарын ескере отырып, әдеп жөніндегі уәкілдердің үлгілік жоспарын әзірлейді және бекітеді.
6. Әдеп жөніндегі уәкілдердің үлгілік жұмыс жоспарының орындалу барысы туралы ақпарат мемлекеттік қызмет істері жөніндегі уәкілетті органның интернет-ресурсында мерзімді түрде орналастырылады.
7. Сыбайлас жемқорлыққа қарсы іс-қимыл жөніндегі уәкілетті орган қажеттілік болған жағдайда орталық мемлекеттік органдар (құқық қорғау және арнаулы мемлекеттік органдарды, сондай-ақ Қазақстан Республикасы Қорғаныс министрлігін қоспағанда) мен олардың аумақтық бөлімшелерінің, орталық мемлекеттік органдар ведомстволарының және олардың аумақтық бөлімшелерінің, шет елдегі мекемелердің, тексеру комиссияларының, облыстардың, республикалық маңызы бар қалалардың, астананың, облыстық маңызы бар қалалардың, аудандар, қалалардағы аудандардың әкімдері аппараттарының әдеп жөніндегі уәкілдерінің сыбайлас жемқорлыққа қарсы іс-қимыл саласындағы қызметі туралы ақпаратты қосымша сұрата алады.
