Қазақстан Республикасының нормативтiк құқықтық актiлерiнiң мәтiндерiн кейiннен ресми жариялау ережесiн бекiту туралы

Күшін жойған

Қазақстан Республикасы Үкіметінің қаулысы. 2002 жылғы 22 тамыз N 938. Күші жойылды - Қазақстан Республикасы Үкіметінің 2016 жылғы 30 маусымдағы № 387 қаулысымен

      Ескерту. Күші жойылды - ҚР Үкіметінің 30.06.2016 № 387 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.

      Ескерту. Тақырыбына өзгерту енгізілді - ҚР Үкіметінің 2006.02.14 N 99 Қаулысымен.

       "Нормативтiк құқықтық актiлер туралы" Қазақстан Республикасы Заңының 30-бабын iске асыру мақсатында Қазақстан Республикасының Yкiметi қаулы етеді:

      1. Қоса берiлiп отырған Қазақстан Республикасының нормативтiк құқықтық актiлерiнiң мәтiндерiн кейiннен ресми жариялау ережесi бекiтiлсiн.
      Ескерту. 1-тармаққа өзгерту енгізілді - ҚР Үкіметінің 2006.02.14. N 99 қаулысымен.
       2. Осы қаулы қол қойылған күнiнен бастап күшiне енедi.

      Қазақстан Республикасының
      Премьер-Министрі

Қазақстан Республикасы
Yкiметінiң    
2002 жылғы 22 тамыздағы
N 938 қаулысымен  
бекiтiлген  

Қазақстан Республикасы нормативтiк құқықтық актiлерiнiң  мәтiндерiн кейiннен ресми жариялаудың ережесi

      Ескерту. Мәтіндегі сөздер алмастырылды - ҚР Үкіметінің 2006.02.14. N 99 қаулысымен.

  1. Жалпы ережелер

      1. Осы Ереже "Нормативтiк құқықтық актiлер туралы" Қазақстан Республикасы Заңының 30-бабын iске асыру мақсатында әзiрлендi және Қазақстан Республикасы нормативтiк құқықтық актiлерiнiң мәтiндерiн кейiннен ресми жариялаудың тәртiбiн айқындайды.

      2. "Нормативтiк құқықтық актiлер туралы" Қазақстан Республикасы  Заңының   3-бабында түрлерi көзделген Қазақстан Республикасы нормативтiк құқықтық актiлерiнiң мәтiндерiн кейiннен ресми жариялауды (бұдан әрi - кейiннен жариялау) осы Ережеде белгiленген тәртiппен осындай құқық алған баспа басылымдары жүзеге асырады.

      3. Осы Ереже нормативтiк құқықтық актiлердiң мәтiндерiн кейiннен ресми жариялау қажеттiгi туралы дербес шешiм қабылдайтын Қазақстан Республикасы Парламентiнiң Жаршысына және Қазақстан Республикасының Президентi мен Қазақстан Республикасы Yкiметiнiң актiлер жинағына қолданылмайды.

      4. Нормативтiк құқықтық актiлердiң мәтiндерiн кейiннен ресми жариялауды баспа басылымдары және олар жариялайтын мәтiндер Қазақстан Республикасы нормативтiк құқықтық актiлерiнiң эталондық бақылау банкiне сәйкестiк сараптамасынан өткiзiлуi шартымен және кейiннен ресми жариялауға облыстық, республикалық маңызы бар қала мен астананың аумақтық органдары берген (бұдан әрі - аумақтық органдар) құқықты алғаннан кейiн жүзеге асырады.
      Ескерту. 4-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

      5. Осы Ережеде мынадай ұғымдар пайдаланылады:
      1) сараптама - оның барысында баспа басылымдары ұсынатын нормативтiк құқықтық актiлер мәтiндерiнiң эталондық бақылау банкiнде сақталатын нормативтiк құқықтық актiлердiң ресми мәтiндерiне сәйкестiгiн тексерудi уәкiлеттi орган жүзеге асыратын рәсiм;
      2) макет - кейiннен ресми жариялауға жататын нормативтiк құқықтық акт мәтінінің алдын ала үлгiсі.

2. Кейiннен ресми жариялауға құқық алу үшiн қажеттi
құжаттар

      6. Кейiннен ресми жариялауға құқық алу мақсатында баспа басылымы аумақтық органдарға мынадай құжаттарды ұсынады:
      1) кейiннен ресми жариялауға құқық алуға арналған уәкiлеттi орган белгiлеген нысандағы өтiнiш;
      2) баспа басылымының заңнамада белгiленген тәртiппен куәландырылған құрылтай құжаттарының көшiрмелерi;
      3) макет.
      Ескерту. 6-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

      7. Аумақтық органдар Қазақстан Республикасының заңнамасында белгiленген тәртiппен сараптама жүргiзуге және кейiннен ресми жариялауға құқық алу үшiн қажеттi өзге де материалдарды сұратуға құқылы.
      Ескерту. 7-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

3. Кейiннен ресми жариялауға құқық алудың шарттары
      мен тәртiбi

      8. Осы Ереженiң 6-тармағында көрсетiлген қажеттi құжаттар келiп түскеннен кейiн аумақтық органдар 30 күнтiзбелiк күн iшiнде сараптама жүргiзедi.
      Ескерту. 8-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

      9. Жүргiзiлген сараптама нәтижелерi бойынша аумақтық органдар кейiннен ресми жариялауға құқық беру туралы не оны беруден бас тарту туралы шешiм қабылдайды.
      Ескерту. 9-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

      10. Аумақтық органдардың оң қорытындысы болған кезде баспа басылымы кейiннен ресми жариялауға құқық алады.
      Бұл ретте аумақтық органдар кейiннен жариялануға тиiс нормативтiк құқықтық актiнiң мәтiнiне "Ресми мәтiн" деген мөртаңба қояды.
      Ескерту. 10-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

      11. Кейiннен ресми жариялауға құқық беруден, егер:
      1) осы Ереженiң 6-тармағында көзделген барлық қажеттi құжаттар немесе осы Ереженiң 7-тармағына сәйкес аумақтық органдар сұратуға құқығы бар материалдар ұсынылмаған;
      2) осы Ереженiң 6-тармағында көзделген құжаттарда немесе осы Ереженің 7-тармағына сәйкес аумақтық органдардың сұратуға құқығы бар материалдарда ақпарат толық емес немесе шынайы емес ақпарат көрсетiлген;
      3) аумақтық органдардың терiс қорытындысы шығарылған жағдайда бас тартылуы мүмкiн.
      Ескерту. 11-тармаққа өзгерту енгізілді - ҚР Үкіметінің 2009.12.25 N 2206 Қаулысымен.
      12. Аумақтық органдар кейiннен ресми жариялауға құқық беруден бас тартылған жағдайда баспа басылымына бас тарту себептерiн көрсете отырып, дәлелдi хат жiбередi, сондай-ақ баспа басылымына ұсынылған барлық құжаттар мен материалдарды қайтарады.
      Ескерту. 12-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

4. Кейiннен жариялаудың тәртiбi

      13. Кейiннен жариялау құқығын алған баспа басылымдары нормативтiк құқықтық актiлердi Қазақстан Республикасының нормативтiк құқықтық актiлерiнiң эталондық бақылау банкiне сәйкес корректорлық және редакторлық түзетулер мен қысқартусыз ресми мәтiндерiн оларға дәлме-дәл сәйкестiкте жариялауға тиiс.

      14. Баспа басылымдары нормативтiк құқықтық актiлердiң мәтiндерiн кейiннен ресми жариялау кезiнде олардың қолданысқа енгiзiлген күнiн мiндеттi түрде көрсетуге тиiс.

      15. Нормативтiк құқықтық актiлердiң мәтiндерiн кейiннен ресми жариялау кезiнде жарияланатын нормативтiк құқықтық актiлерге баспа басылымдарының қандай да бiр түсiнiктемесiне рұқсат берiлмейдi.

5. Қорытынды ережелер

       16. Осы Ереженiң сақталуын бақылауды аумақтық органдар жүзеге асырады.
      Ескерту. 16-тармаққа өзгерту енгізілді - ҚР Үкіметінің 2009.12.25 N 2206 Қаулысымен.

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады