Қазақстан Республикасының Үкiметi мен Ресей Федерациясының Үкiметi арасында "Байқоңыр" ғарыш айлағында "Бәйтерек" ғарыш зымыран кешенiн құру туралы келiсiм жасасу туралы

Жаңа

Қазақстан Республикасы Үкіметінің 2004 жылғы 21 желтоқсандағы N 1350 Қаулысы

      Қазақстан Республикасының Үкiметi  ҚАУЛЫ ЕТЕДI:
      1. Қоса берiлiп отырған Қазақстан Республикасының Yкiметi мен Ресей Федерациясының Үкiметi арасындағы "Байқоңыр" ғарыш айлағында "Бәйтерек" ғарыш зымыран кешенiн құру туралы келiсiмнiң жобасы мақұлдансын.
      2. Оның мәтiнiне қағидаттық сипаты жоқ өзгерiстер енгiзуге рұқсат бере отырып, Қазақстан Республикасының Үкiметi мен Ресей Федерациясының Үкiметi арасында "Байқоңыр" ғарыш айлағында "Бәйтерек" ғарыш зымыран кешенiн құру туралы келiсiм жасалсын.
      3. Осы қаулы қол қойылған күнiнен бастап күшiне енедi.

       Қазақстан Республикасының
      Премьер-Министрі

Жоба  

Қазақстан Республикасының Үкiметi мен
Ресей Федерациясының Үкiметi арасындағы
"Байқоңыр" ғарыш айлағында "Бәйтерек"
ғарыш зымыран кешенiн құру туралы
КЕЛІСІМ

      Бұдан әрi Тараптар деп аталатын Қазақстан Республикасының Үкiметi мен Ресей Федерациясының Үкiметi,
      1994 жылғы 28 наурыздағы Қазақстан Республикасы мен Ресей Федерациясы арасындағы "Байқоңыр" ғарыш айлағын пайдаланудың негiзгi қағидаттары мен шарттары туралы келiсiмдi, 1994 жылғы 15 сәуiрдегi Өндiрiстiк, коммерциялық, кредиттік-қаржылық, сақтандыру және аралас трансұлттық бiрлестіктер құру мен дамытуға жәрдемдесу туралы келiсiмдi, 1994 жылғы 10 желтоқсандағы Қазақстан Республикасының Үкiметi мен Ресей Федерациясының Үкiметі арасындағы "Байқоңыр" кешенiн жалға беру  шартын (бұдан әрі - Жалға беру шарты), 1993 жылғы 25 желтоқсандағы Қазақстан Республикасының Үкiметi мен Ресей Федерациясының Үкiметi арасындағы "Байқоңыр" ғарыш айлағында жұмыстар орындау үшiн қажетті тауарларды шекара арқылы өткiзу тәртiбi туралы келiсімді басшылыққа ала отырып,
      2004 жылғы 9 қаңтардағы Қазақстан Республикасы мен Ресей Федерациясы арасындағы "Байқоңыр" кешенiн тиiмдi пайдалану жөніндегi ынтымақтастықты дамыту туралы  келiсiмнiң ережелерiн негізге ала отырып,
      2004 жылғы 7 шілдедегi Қазақстан Республикасының Үкiметi мен Ресей Федерациясының Yкiметi арасындағы құпия ақпаратты өзара қорғау туралы  келiсiмнiң ережелерiн назарға ала отырып,
      қазақстандық және ресейлік кәсiпорындар мен ұйымдар арасындағы дәстүрлі қалыптасқан өндірістік байланысты және кооперацияны тереңдетуге, "Байқоңыр" ғарыш айлағында экологиялық қауiпсiздiктiң жоғары деңгейi бар қазiргi заманғы зымыран-ғарыш технологиясын бірлесiп әзiрлеуге және енгiзуге тілек білдiре отырып,
      төмендегiлер туралы келiстi:

1-бап

      Осы Келiсiмнiң мақсаты коммерциялық ғарыштық бағдарламалар мен жобаларды орындау, сондай-ақ Қазақстан Республикасы мен Ресей Федерациясының ұлттық ғарыштық бағдарламаларын iске асыру мақсатында "Байқоңыр" ғарыш айлағының жерүстi ғарыштық инфрақұрылым объектілерiнiң негiзiнде жаңа экологиялық қауiпсiз "Байқоңыр" ғарыш зымыран кешенiн құру және бiрлесiп пайдалану кезіндегi Тараптар ынтымақтастығының негiзгi қағидаттары мен шарттарын айқындау болып табылады.

2-бап

      Осы Келiсiмнiң мақсаты үшiн мынадай терминдер мен анықтамалар пайдаланылады:
       "Бәйтерек" ғарыш зымыран кешенi - ресейлiк "Ангара" тасымалдағыш зымыранымен және оның экологиялық қауiпсiздiктiң жоғары деңгейiне ие ықтимал түрленiмдерiмен ғарыш аппараттарын ұшыруға арналған кешен. "Бәйтерек" ғарыш зымыран кешенiнiң құрамына "Байқоңыр" ғарыш айлағының техникалық құралдарының, құрылыстары мен коммуникацияларының негiзiнде жасалатын ұшыру ұстанымы мен техникалық ұстаным кiредi;
       "құпия ақпарат" - әрбiр Тараптың заңнамасына сәйкес қорғалатын, сондай-ақ Тараптар ынтымақтастығы барысында пайда болған, рұқсатсыз таралуы Қазақстан Республикасының және/немесе Ресей Федерациясының қауiпсiздiгi мен мүдделерiне нұқсан келтiруi мүмкiн кез келген нысанда берiлген мәлiметтер.
       "жасырын ақпарат" - құпия ақпарат санатына жатқызылғаннан басқа, рұқсат етілмеген қолжетiмдiлiктен, таратудан және пайдаланудан ашушы Тарап (немесе оның кәсiпорындары мен ұйымдары) қорғайтын, коммерциялық құпия мен ноу-хауды қоса алғанда, сондай-ақ ақпараттың оның үшіншi тұлғаларға белгiсiздiгiне қарай пәрмендi немесе әлеуеттi коммерциялық құндылығы болғанда, оған заңды негiзде қолжетiмдiлiк болмағанда және ақпарат иесi оның жасырындылығын қорғауға шаралар қолданғанда, ғылыми-техникалық, коммерциялық, өндiрiстiк және өзге де қызметке қатысты кез келген жалпыға қолжетiмдi болып табылмайтын ақпарат. Жасырын ақпарат санатына жасырын ақпараты бар құжаттардың кез келген көшiрмелерi, сондай-ақ жасырын ақпараты бар түпнұсқа құжаттарды пайдалану арқылы немесе олардың негiзiнде дайындалған кез келген құжаттар жатады;
       "тауарлар" - тасымалдағыш зымырандар, екпiндету блоктары, ғарыш аппараттары, дайындау мен ұшыруды жүзеге асыру үшiн қажетті кез келген басқа жабдықтар, бақылау мен сынақ жабдықтары, отын, құрылыс және басқа материалдар, тетiктер мен техникалар, сондай-ақ ғарыш бағдарламаларын iске асыру кезiнде әзiрлеу, өндiру немесе пайдалану үшiн қажеттi, материалдық тасымалдаушыларда белгiленген ақпарат түрiндегi технологиялар. Ақпарат санатына кез келген материалдық нысанда берiлген өзге ақпарат (дерекқорды қоса алғанда, компьютерлiк бағдарламалық қамтамасыз ету, коммерциялық құпия, ноу-хау, өндiрiстік құжаттама және техникалық сипаттамалар) жатады.
       "атқарушы ұйымдар" - "Бәйтерек" ғарыш зымыран кешенiн құру және пайдалану жөнiндегi жұмыстарды орындау үшiн, меншiк нысанына қарамастан, "Бәйтерек" бiрлескен Қазақстан-Ресей кәсiпорны" акционерлiк қоғамы тартатын Тараптардың ұйымдары.

3-бап

      "Бәйтерек" ғарыш зымыран кешенiн құру және оны одан әрi пайдалану мақсатында Тараптар "Бәйтерек" Қазақстан-Ресей бiрлескен кәсiпорны" акционерлiк қоғамын (бұдан әрi - Бiрлескен кәсiпорын) құрады.
      Бiрлескен кәсiпорын қазақстандық және ресейлiк қатысудың тепе-теңдiк қағидаттарында құрылады.
      Қазақстан Тарабынан Құрылтайшы болып Қазақстан Тарабы уәкiлеттiк берген ұйым әрекет етедi.
      Ресей Тарабынан Құрылтайшы болып "М.В.Хруничев атындағы Мемлекеттiк ғарыштық ғылыми-өндiрiстiк орталық" Федералдық мемлекеттiк бiртұтас кәсіпорны әрекет етедi.
      Құрылтайшылар Бiрлескен кәсiпорынның жарғылық капиталына әрқайсысы 200 мың AҚШ доллары мөлшерiнде ақшалай қаражат енгiзедi.
      Бiрлескен кәсiпорын Астана қаласында тiркеледi және өз қызметiн осы Келiсiмге, Қазақстан Республикасының заңнамасына және құрылтай құжаттарына сәйкес жүзеге асырады.
      Бiрлескен кәсiпорынға Қазақстан Республикасының заңнамасына сәйкес салық салынуға тиiс.
      Осы Келiсiм шеңберiнде ұшыруларды қамтамасыз ету жөнiндегi жұмыстар Тараптардың мемлекетаралық комиссиясының басшылық етуiмен, Ресей Федерациясының заңдарында және өзге де нормативтiк құқықтық кесiмдерiнде айқындалған тәртiппен жүзеге асырылады.

4-бап

      "Бәйтерек" ғарыш зымыран кешенiн құру үшiн Қазақстан Тарабы Бiрлескен кәсiпорынға Тараптар келiскен нобайлық жобаның сараптау нәтижелерi бойынша бюджеттiк кредиттiң сомасын нақтылай отырып, негiзгi борышты өтеу бойынша 5 жылдық жеңiлдiктi кезеңмен, жылдық 0,5 сыйақы ставкасы бойынша сыйақы төлеу бойынша 4 жылдық жеңiлдiктi кезеңмен 19 жыл мерзiмге 223 миллион АҚШ долларына баламалы сомада бюджеттiк кредит бередi.
      Қазақстан Тарабы бюджеттiк кредит есебiнен қаржыландырылатын жобаға қызмет көрсету жөнiндегi агент функциясын орындауды "Қазақстан Даму Банкi" акционерлiк қоғамына тапсырады.
      Кредит бойынша сыйақыны есептеу агент ашқан Бiрлескен кәсiпорынның шотына ақша аударылған сәттен бастап жүзеге асырылатын болады.
      Бюджеттік кредит бойынша Бiрлескен кәсiпорынның мiндеттемелерiн орындауды қамтамасыз ету Бiрлескен кәсiпорынның мүлкi болып табылады.
      Бiрлескен кәсiпорынға оның меншiгiндегi мүлiкке өндiрiп алуды айналдыруға байланысты талап-арыздар туындаған жағдайда Тараптар жаппай қырып-жою қарулары мен оны жеткiзу құралдарын таратпаудың халықаралық режимдерiн сақтауды қамтамасыз етедi.

5-бап

      Осы Келiсiмдi iске асыру мақсатында Ресей Тарабы "Бәйтерек" ғарыш зымыран кешенiнiң ұшыру кешенi пайдалануға берiлген сәтке дейiн Ресей Федерациясының ұлттық ғарыш бағдарламасы шеңберiнде "Плесецк" ғарыш айлағында "Ангара" ғарыш зымыран кешенiнiң ұшу сынақтарын қамтамасыз етедi.

6-бап

      Осы Келiсiмдi орындау жөнiндегi қызметтi үйлестiру мақсатында Тараптар мынадай құзыретті органдарды тағайындайды:
      Қазақстан Тарабынан - Қазақстан Республикасы Бiлiм және ғылым министрлігі;
      Ресей Тарабынан - Федералдық ғарыш агенттiгi.
      Осы Келiсiм шеңберiнде ынтымақтастық бағдарламалары мен жобалары оларды iске асыруға байланысты, соңынан қызметтiң мамандандырылған түрлерiн орындауға әкеп соқтыратын ұйымдастыру, қаржылық, құқықтық және техникалық сипаттағы қағидаттар, нормалар мен рәсiмдер сияқты, Тараптардың құзыреттi органдары, Бiрлескен кәсiпорын немесе атқарушы ұйымдар жасасатын жекелеген келiсiмдер мен келiсiм-шарттардың мәнiн құрай алады.
      Тараптардың бiрiнің құзыретті органы өзгерген кезде мұндай Тарап бұл туралы екiншi Тарапқа дипломатиялық арналар арқылы жазбаша хабарлама жiбередi.

7-бап

      Тараптар Бiрлескен кәсiпорынның мiндеттемелерi бойынша жауапты болмайды, Бiрлескен кәсiпорын Тараптардың мiндеттемелерi бойынша жауап бермейдi.
      Тараптардың Бiрлескен кәсiпорынның мiндеттемелерi бойынша жауапкершiлiктен бас тартуы зияткерлiк меншiкке, құпия ақпарат пен технологияларды қорғауға байланысты талап-арыздарға қолданылмайды, және де аталған талап-арыздарды қарау мүдделерi бұзылған Тарап мемлекетінiң заңнамасымен реттеледi.
      Бiрлескен кәсiпорын Тараптар мемлекеттерiнiң құпия ақпаратты қорғау жөнiндегi заңдары мен өзге де нормативтiк құқықтық кесiмдерiн ескере отырып, осы Келiсiм шеңберiндегi жұмыстарды орындау үшiн атқарушы ұйымдарды дербес айқындайды.
      Атқарушы ұйымдардың тiзбесiн Бiрлескен кәсiпорын тiзбенi салық органына одан әрi беру үшiн Қазақстан Тарабының құзыреттi органына жiбередi.

8-бап

      Қазақстан Тарабы мынадай преференциялар берудi қамтамасыз eтeдi:
      а) Қазақстан Республикасының Бiрлескен кәсiпорнының, атқарушы ұйымдарының және Қазақстан Республикасының атқарушы ұйымдары мердiгерлерiнiң тiкелей ғарыш кеңiстiгiнде орындалатын (көрсетiлетiн) жұмыстарына (қызметтерiне), сондай-ақ тiкелей ғарыш кеңiстiгiнде жұмыстарды орындауға (қызметтердi көрсетуге) технологиялық негiзделген және тығыз байланысты жердегi дайындау жұмыстарына (қызметтерге) осы Келiсiмнiң ажырамас бөлiгi болып табылатын Қосымшаға сәйкес қосымша құнға нөлдiк ставка бойынша салық салынады.
      Айналымдар бойынша қосылған құнға нөлдiк ставка бойынша салынатын салықты қайтару Қазақстан Республикасының салық заңнамасына сәйкес жүргiзiледi. Бұл ретте осы тармақшаға сәйкес қосылған құн салығы бойынша нөлдiк ставканы қолданатын атқарушы ұйымдар осы Келiсiмнiң 7-бабында көрсетiлген атқарушы ұйымдар тiзбесiнде белгiленуге тиiс.
      Қосылған құн салығы бойынша нөлдiк ставканы қолдану үшiн мыналар негiз болып табылады:
      Бiрлескен кәсiпорын үшiн - осы Келiсiмге Қосымшада көрсетiлген жұмыстарды орындауға (қызметтердi көрсетуге) арналған шарт (келiсiм-шарт) және жұмыстардың орындалғанын (қызметтердiң көрсетілгенiн) растайтын құжаттардың көшiрмелерi;
      атқарушы ұйымдар үшін - тiкелей Бiрлескен кәсiпорынмен жасалған жұмыстарды орындауға (қызметтердi көрсетуге) арналған шарт (келісiм-шарт) және Бiрлескен кәсiпорын үшiн жұмыстардың орындалғанын (қызметтердiң көрсетілгенiн) растайтын құжаттардың көшiрмелерi;
      Қазақстан Республикасы атқарушы ұйымдарының мердiгерлерi үшiн - Бiрлескен кәсiпорынмен жұмыстарды орындауға (қызметтерді көрсетуге) арналған шарты (келiсiм-шарты) бар атқарушы ұйыммен тiкелей жасалған жұмыстарды орындауға (қызметтердi көрсетуге) арналған шарт (келiсiм-шарт) және атқарушы ұйым үшiн жұмыстардың орындалғанын (қызметтердің көрсетілгенін) растайтын құжаттардың көшiрмелерi. Бұл ретте Қазақстан Республикасының атқарушы ұйымы үшiн мердiгердiң жұмыстарды орындауына (қызметтерді көрсетуiне) арналған нұсқауы және мердігер орындайтын жұмыстардың (көрсететiн қызметтердiң) түрлерi Бiрлескен кәсiпорын мен атқарушы ұйым арасында жасалған шартта (келiсiм-шартта) айқындалуға тиiс;
      б) Бiрлескен кәсiпорынды осы Келiсiмге қосымшада көрсетiлген жұмыстарды орындаудан (қызметтерді көрсетуден) алынатын кiрiстер бойынша корпоративтік табыс салығын төлеуден мемлекеттiк қабылдау комиссиясы "Бәйтерек" ғарыш зымыран кешенiн пайдалануға қабылдаған күннен бастап 15 жыл мерзiмге босату;
      в) Бiрлескен кәсiпорынды осы Келiсiмге Қосымшада көрсетiлген жұмыстарды орындауға (қызметтердi көрсетуге) байланысты қызметті жүзеге асыру кезiнде тiкелей пайдаланылатын салық салу объектiлерi бойынша мүлiкке салынатын салықтан босату;
      г) Бiрлескен кәсiпорынды осы Келiсiмге Қосымшада көрсетiлген жұмыстарды орындауға (қызметтердi көрсетуге) байланысты Бiрлескен кәсiпорынның қызметiн жүзеге асыру үшін бөлiнген және пайдаланылатын жер учаскелері бойынша жер салығынан және жер учаскелерін пайдаланғаны үшін төлемнен босату;
      д) Бiрлескен кәсіпорынды және Қазақстан Республикасының атқарушы ұйымдарын 1993 жылғы 25 желтоқсандағы Қазақстан Республикасының Үкiметi мен Ресей Федерациясының Үкiметi арасындағы "Байқоңыр" ғарыш айлағындағы жұмыстарды орындау үшін қажеттi тауарларды шекара арқылы өткiзу тәртiбi туралы келiсiмге сәйкес "Бәйтерек" ғарыш зымыран кешенiн құру және оның жұмыс iстеуiн қамтамасыз ету мақсатында жеткiзілетiн тауарлардың импорты кезiнде салықтардан, кедендік баждардан және алымдардан босату;
      e) Бiрлескен кәсiпорын мен Қазақстан Республикасының атқарушы ұйымдары "Бәйтерек" ғарыш зымыран кешенін құру және оның жұмыс iстеуiн қамтамасыз ету мақсатында жүзеге асыратын тауарлар импорты квоталауға, лицензиялауға және басқа да шектеулерге жатпайды.

9-бап

      Ресей Тарабы осы Келiсiмдi iске асыру мақсатында Ресей Федерациясында тiркелген атқарушы ұйымдарға Ресей Федерациясының заңнамасына сәйкес преференциялар бередi. "Байқоңыр" ғарыш айлағына тауарларды жеткiзу квоталау режимiн қолданусыз жүргiзiледi.

10-бап

      Тараптар "Бәйтерек" ғарыш зымыран кешенiн құру мақсатында Бiрлескен кәсіпорынға, олардың құзыреттi органдарымен келiсiм бойынша "Байқоңыр" ғарыш айлағының жердегi ғарыш инфрақұрылымының жаңа құрылыстарын (объектілерiн) құру және жұмыс iстеп тұрған құрылыстарына (объектілерiне) бөлiнетiн және бөлiнбейтiн жақсартулар енгiзу құқығын бередi.
      Осы Келiсiмдi іске асыру мақсатында "Байқоңыр" ғарыш айлағының жекелеген құрылыстары (объектілерi) олар орналасқан жер учаскелерiмен бiрге Жалға беру  шартында айқындалған тәртiппен оларды "Байқоңыр" кешенiнiң жалға алынған объектілерiнiң құрамынан шығара отырып, Бiрлескен кәсiпорынға берiлуi мүмкiн.
      "Байқоңыр" ғарыш айлағының басқа құрылыстарын (объектiлерiн) Бiрлескен кәсiпорынның пайдалануы шарттық негiзде жүзеге асырылады.

11-бап

      "Бәйтерек" ғарыш зымыран кешенiн құрудың жобасы Қазақстан Республикасында да, Ресей Федерациясында да Тараптар мемлекеттерiнiң заңнамасына сәйкес мемлекеттiк сараптауға жатады.
      Қазақстан Республикасында жобаның мемлекеттiк сараптамасын жүргiзудi ұйымдастыру үшiн жобалау материалдары Зымырандық технологияны бақылау режимiн қамтамсыз етуге байланысты талаптар және құпия мәлiметтердi сақтау жөнiндегi талаптар ескеріле отырып, Қазақстан Тарабының құзыреттi органына беріледi.
      Осы Келiсiмнiң мақсатында салынатын құрылыс объектiлерiн сараптау 1999 жылғы 13 қаңтардағы Тәуелсiз Мемлекеттер Достастығына қатысушы мемлекеттер үшiн өзара мүдденi білдiретін құрылыс жобаларының мемлекетаралық сараптамасы туралы  келiсiмге сәйкес жүргiзіледi.

12-бап

      "Бәйтерек" ғарыш зымыран кешенiн пайдалана отырып ғарыш аппараттарын ұшыру кезiнде ұшырушы мемлекеттің функциясын Ресей Тарабы орындайды.
      Тараптар "Бәйтерек" ғарыш зымыран кешенiн пайдалана отырып ғарыштық бағдарламаларды орындау кезiнде ғарыш объектілерi келтiрген залал үшiн 1972 жылғы 29 наурыздағы Ғарыш объектілерi келтiрген залал үшін халықаралық жауаптылық туралы  конвенцияға сәйкес олардың кiнәсiнiң дәрежесiне мөлшерлес ортақ жауаптылықта болады.
      "Бәйтерек" ғарыш зымыран кешенiнен ғарыш аппараттарын ұшыруларды дайындау мен жүзеге асыру кезiндегi сақтандыруға жататын тәуекелдер түрлерi, сондай-ақ сақтандыруды жүргізу шарттары мен тәртiбi Тараптардың құзыретті органдары арасындағы келiсiммен айқындалады.

13-бап

      Осы Келiсiмнің шеңберiндегi жұмыстарды орындау кезiнде келтiрiлуi мүмкiн залал үшiн жауапкершілiк, өтемақының мөлшерi, тәртiбi мен мерзiмдерi келiссөздер жүргiзу жолымен Тараптар мемлекеттерiнiң заңнамасына сәйкес айқындалады.

14-бап

      Осы Келiсiм бойынша ынтымақтастық барысында құралатын немесе берілетiн зияткерлiк меншiктi қорғау, бөлу және пайдалану мәселелерi Тараптар мемлекеттерiнiң ұлттық заңнамасына, сондай-ақ Қазақстан Республикасы мен Ресей Федерациясы қатысушысы болып табылатын халықаралық шарттарға сәйкес белгіленедi.
      Осы Келiсiмнiң шеңберiндегі ынтымақтастық атқарушы ұйымдардың, құзыретті органдардың және Тараптардың осы Келiсiмнiң шеңберiндегi немесе одан тыс бiрлескен қызметi басталғанға дейiнгi олар алған зияткерлiк меншiкке құқығын қозғамайды.
      Әрбiр Тарап осы Келiсiмдi iске асыру кезiнде құпия ақпараттың қорғалуын, сондай-ақ осы Келiсiмнiң шеңберiндегi ынтымақтастық барысында берілетін ақпараттың жасырындылығын оның құзыреттi органдарының, атқарушы ұйымдарының және Бiрлескен кәсiпорынның сақтауын бақылауды қамтамасыз ету үшiн өзiнiң мемлекетiнiң заңнамасында көзделген барлық қажеттi шараларды қабылдауға мiндеттенедi. Бұл ретте жасырын ақпаратты осындай ретiнде Тарап, құзыреттi орган, Бiрлескен кәсiпорын немесе жасырындылықты талап ететiн атқарушы ұйым белгілеуге тиiс.
      Егер осы Келiсiмдi орындау үшiн оларды пайдалану тәртiбi Тараптар мемлекеттерiнiң заңнамасымен айқындалатын мәлiметтердi беру немесе олармен алмасу қажет деп танылған жағдайда, олар осы мақсатта Тараптар мемлекеттерiнiң заңнамасында белгiленген нысанда тиiстi шешiмдер қабылдайды.
      Осы Келiсiмнiң шеңберiнде орындалған бiрлескен әзiрлемелер туралы кез келген ақпарат оның қатысушысы болып табылмайтын тарапқа тек Тараптардың құзыретті органдарының жазбаша түрде ресiмделген өзара келiсiмi бойынша ғана берiлуi мүмкiн.

15-бап

      Тараптар, олардың құзыреттi органдары, Бiрлескен кәсiпорын және атқарушы ұйымдар өз мемлекеттерiнiң ұлттық заңнамасына және халықаралық құқық нормаларына сәйкес осы Келiсiмнiң шеңберiндегi жұмыстарды орындауға байланысты қорғалатын тауарлар мен технологияларға рұқсатсыз қолжетiмділiктiң және мұндай технологиялар мен тауарларды үшiншi тұлғаларға рұқсатсыз берудiң алдын алу жөнiнде қажеттi шаралар қабылдайды. Осы мақсатта Ресей Тарабынан Бiрлескен кәсiпорынның құрылтайшы ұйымы атқарушы ұйымдардың және Бiрлескен кәсiпорынның қатысуымен технологияларды қорғау жоспарларын әзiрлейдi, олар Тараптардың құзыреттi органдарына бекiтуге ұсынылады.
      Технологияларды қорғау жоспарлары қорғалатын тауарлар мен технологиялардың жалпы тiзбесiн, Зымырандық технологияны бақылау режимiнiң талаптарын ескере отырып, "Бәйтерек" ғарыш зымыран кешенiн құрудың және пайдаланудың барлық кезеңдерiнде қауiпсiздiк шараларын және бiрлескен бағдарламалар мен жобаларға қатысушылардың жауапкершiлiгiн бөлудi қамтуға тиiс.

16-бап

      Бiрлескен кәсiпорынның қызметкерлерi "Байқоңыр" ғарыш айлағында болған уақытта қауiпсiз жұмыс iстеудiң айрықша режимi бар объектілерде болуға байланысты барлық нормалар мен ережелердi орындауға мiндетті. Көрсетілген нормалар мен ережелердi қызметкерлердiң назарына "Байқоңыр" ғарыш айлағының режим қызметі жеткiзедi.

17-бап

      Осы Келiсiмнiң ережелерiн түсiндiруге және қолдануға қатысты дауларды шешу, сондай-ақ күтпеген және еңсерiлмейтiн жағдайларды (форс-мажор жағдаяттарын) реттеу өзара консультациялар мен келiссөздер жүргiзу жолымен немесе Тараптармен немесе олардың құзыретті органдарымен келiсілген басқа да рәсiмдердiң көмегiмен жүзеге асырылатын болады.

18-бап

      Егер осы Келiсiм күшiне енгеннен кейiн Тараптар мемлекеттерiнiң қабылданған заңдарында және өзге де нормативтiк құқықтық кесiмдерiнде не Тараптар бiр мезгілде қатысушылары болып табылатын халықаралық келiсiмдерде Бiрлескен кәсiпорын үшiн неғұрлым қолайлы жағдайлар көзделетiн болса, онда осы қолайлы жағдайлар қолданылатын болады.

19-бап

      Осы Келiсiм Тараптардың және олардың құзыреттi органдарының олар жасасқан басқа халықаралық шарттардан туындайтын құқықтары мен мiндеттемелерiн қозғамайды.

20-бап

      Осы Келiсiм оған қол қойылған күнiнен бастап уақытша қолданылады және оның күшiне енуi үшiн қажеттi мемлекетiшiлiк рәсiмдердi Тараптардың орындағаны туралы соңғы хабарламаны алған күнiнен бастап күшiне енедi.
      Осы Келiсiмге Келiсiмнiң ажырамас бөлiгi болып табылатын және осы бапта көзделген тәртiппен күшiне енетiн жекелеген хаттамалар жасасу арқылы өзгерiстер мен толықтырулар енгiзiлуi мүмкiн.
      Осы Келiсiм Жалға алу шартының қолданылу мерзiмi өткенге дейiн не Тараптардың бipeуi басқа Тараптың оның күшiн тоқтату ниетi туралы жазбаша хабарламасын алған күнiнен бастап бiр жыл өткенге дейiн, аталған оқиғалардың қайсысының ерте басталуына байланысты, қолданылады.
      Егер Тараптар өзге туралы келiспесе, осы бапта көзделген тәртiппен осы Келiсiмнің қолданылуын тоқтату осы Келiсiмнiң шеңберiнде аяқталмаған жобалар мен бағдарламаларды орындауға әсерiн тигізбейдi. Осы Келiсiмнiң қолданылуын тоқтату заңды тұлғалардың осы Келiсiмнiң қолданылуын тоқтатқанға дейiнгі оған байланысты туындаған шарттық мiндеттемелердi қайта қарауы немесе бiр жақты тәртiппен сақтамауы үшiн құқықтық негiз болып табылмайды.

      2004 жылғы "___" ________ ____________ қаласында әрқайсысы қазақ және орыс тiлдерінде, екi данада жасалды әрi екi мәтiннiң де күшi бiрдей.

       Қазақстан Республикасының               Ресей Федерациясының
      Үкіметі үшін                            Yкiметi үшiн

Қосымша  

Осы Келiсiмнiң 8-бабына сәйкес преференциялар берiлетiн
тiкелей ғарыш кеңiстiгiнде, сондай-ақ тiкелей ғарыш
кеңiстiгiнде жұмыстарды орындауға (қызметтердi көрсетуге)
технологиялық негізделген және олармен тығыз байланысты
дайындық жұмыстары (қызметтерi) кешенiн жүзеге асыру кезiнде
орындалатын (көрсетiлетiн) жұмыстардың (қызметтердiң)
ТIЗБЕСI Жұмыстардың (қызметтердiң) атауы

      1. Тiкелей ғарыш кеңiстігiнде орындалатын (көрсетілетiн) жұмыстар (қызметтер):
      ғарыш аппараттарын, орбиталық станцияларды және басқа да ғарыш жүйелерiн ғарыш кеңiстiгiне шығару;
      байланысты қамтамасыз ету, деректердi беру, теледидар және радио хабарларын тарату үшiн ғарыш техникасын пайдалану;
      жерсерiктiк навигациялық және топогеодезиялық жүйелердi пайдалану;
      ғарыш аппараттарын объектілер мен құбылыстарды қадағалау үшiн пайдалану;
      тiкелей ғарыш жағдайында ғарыш аппараттарын сынау;
      тiкелей ғарыш кеңiстiгiнде орналасқан ғарыш аппараттарын пайдалана отырып орындалатын (көрсетiлетiн) жұмыстар (қызметтер);
      ұшуды басқару және ғарыш жүйелерiн, ғарыш аппараттарын (объектілердi) байланыспен, соның iшiнде Жер бетiнде жүзеге асырылатын байланыспен қамтамасыз ету;
      басқарылатын да, автоматты да аппараттар қолданылатын ғылыми зерттеулер (iргелi және қолданбалы);
      ғарыштан Жердi және басқа да планеталарды қашықтықтан зерттеу, ғарыш аппараттарынан, осы аппараттарды пайдалануды қоса алғанда, экологиялық мониторинг және метеорология;
      2. Тiкелей ғарыш кеңiстігінде жұмыстарды орындауға (қызметтердi көрсетуге) технологиялық негiзделген және онымен тығыз байланысты жердегi дайындық жұмыстарының (қызметтердiң) кешенi:
      арнайы отын және оны жеткiзу құралдарын дайындау, ғарыш аппараттары мен оларды шығару құралдарына отын жеткiзу және құю;
      ғарыш аппараттары мен оларды жеткiзу құралдарын оларды сынау және ұшыру орындарына тасымалдау және шығарушы кәсiпорынға қайтару;
      ғарыш аппараттарынан, орбиталық станциялардан және басқа да ғарыш жүйелерiнен ақпарат қабылдау, оны өңдеу және тұтынушыға дейiн жеткiзу;
      зымыран-ғарыш техникасының жобалау-конструкторлық әзiрлемелерiн, зымыран-ғарыш техникасын өндiру мен оны пайдалануды негiздеу мен қамтамасыз етуге байланысты теориялық және жобалық-iздестiру зерттеулерi;
      ғарыш аппараттарын, орбиталық станцияларды, шығару құралдары мен олардың құрамдас бөлiктерiн, соның iшiнде: зымыран, авиациялық және басқа да кешендердi және олардың құрамына кiретiн зымыран тасығыштарды, тасығыш ұшақтарды, екпiндету блоктарын, оларды дайындау, сақтау және тасымалдау құралдарын - жобалау, құрастыру, өндiру және сынау;
      ғарыш аппараттары мен оларды жеткiзу құралдарын басқарудың мамандандырылған жүйелерiн, сондай-ақ ғарыш аппараттары мен оларды шығару құралдарының жұмыс iстеуiн телеметриялық бақылау құралдарын жобалау, құрастыру, өндiру және сынау;
      ғарыш аппараттары мен оларды шығару құралдарының жұмыс iстеуiн қамтамасыз ету жүйелерiн жобалау, құрастыру, өндiру және сынау;
      техникалық және технологиялық жүйелер мен олардың зымыран-ғарыш кешендерiн тасымалдауды, сақтауды, сынау мен ұшыруды және ғарыш аппараттарын ұшу кезiнде басқаруды қамтамасыз ететiн жердегi ғарыш инфрақұрылымының құрамдас бұйымдарын жобалау, құрастыру, өндiру және сынау, жете толықтыру және пайдалану (қызмет көрсету);
      ұшу-ғарыш оқиғаларын тексеру;
      сынақ және басқару орталықтарын, ұшыру және техникалық кешендердi, әуеайлақтарды және жердегi ғарыш инфрақұрылымының өзге де объектiлерiн және құрылыс-монтаждау жұмыстарын жүргiзу жөнiндегi қызметтердi ұсынуды қоса алғанда, олардың құрамдас бөлiктерiн, сондай-ақ қабылдауға, сақтауға, тасымалдауға және сынауға, ұшыруға дайындауға, зымыранды ұшыруға, ғарыш аппараттарын (объектiлердi) ұшыруға арналған агрегаттардың, жүйелердiң және т.б. құрамдас бөлiктерiн жасау, күтiп ұстау және пайдалану;
      ғарыш аппараттары мен оларды жеткiзу құралдарына ұшудан кейiнгi қызмет көрсету және/немесе оларды жөндеу;
      пайдалану процесiндегi жөндеу-қалпына келтiру жұмыстарын қоса алғанда, ғарыш аппараттары мен оларды жеткiзу құралдарына кепiлдiк берiлген қадағалауды жүзеге асыру;
      зымыран-ғарыш техникасының жүйелерi мен жабдығын кәдеге жарату.

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады