Қазақстан Республикасының Үкiметi
ҚАУЛЫ ЕТЕДI:
"Трансферттiк бағаларды қолдану кезiндегi мемлекеттiк бақылау туралы" Қазақстан Республикасы Заңының жобасы Қазақстан Республикасының Парламентi Мәжiлiсiнiң қарауына енгiзiлсiн.
Қазақстан Республикасының
Премьер-Министрі
Жоба
"Трансферттiк бағаларды қолдану кезiндегi мемлекеттiк бақылау туралы" Қазақстан Республикасының Заңы
Осы Заң халықаралық iскерлiк операцияларда мемлекеттiк кiрiс ысырабын болдырмау үшiн трансферттік бағаларды қолдану кезiндегi мемлекеттiк бақылау шараларын белгiлейдi.
1-бап.
Қазақстан Республикасының трансферттiк бағаларды қолдану кезiндегi мемлекеттiк бақылау жөнiндегi заңдары
1. Қазақстан Республикасының трансферттiк бағаларды қолдану кезiндегi мемлекеттік бақылау жөнiндегi заңдары Қазақстан Республикасының Конституциясына негiзделедi, осы Заңнан және өзге де нормативтiк құқықтық актілерден тұрады.
2. Егер Қазақстан Республикасы бекiткен халықаралық шартта осы Заңдағыдан өзгеше ережелер белгiленсе, халықаралық шарттың ережелерi қолданылады.
2-бап.
Осы Заңда пайдаланылатын негiзгi ұғымдар
Осы Заңда қолданылатын ұғымдар мыналарды бiлдiредi:
1) ақпарат көздерiнен алынған баға - ресми түрде танылған ақпарат көздерiнен алынған баға, биржалық баға белгіленiмi туралы, уәкiлеттi органдардан, сондай-ақ басқа да ақпарат көздерiнен алынған деректер;
2) бiрдей тауарлар (жұмыстар, көрсетiлетiн қызметтер) - өздерiне тән басты белгiлерi: физикалық сипаттамалары, сапасы мен рыноктағы өтiмi, шығарылған елi және өндiрушiсi бiрдей тауарлар (жұмыстар, көрсетiлетiн қызметтер);
3) бiртектi тауарлар (жұмыстар, көрсетiлетiн қызметтер) - бiрдей болмаса да, бiр-бiрiне ұқсас сипаттағы және ұқсас компоненттерден тұратын, мұның өзi оларға бiрдей мiндеттер атқаруға және бiрiн-бiрi алмастыруға мүмкiндiк беретiн тауарлар (жұмыстар, көрсетiлетiн қызметтер);
4) қайта қаралатын экономикалық шарттар - осы Заңға сәйкес бұндай шарттар арасындағы айырмашылық бағаға әсерiн тигiзбейтiн немесе мәмiлелердiң шарттарын қайта қаралатын шарттарға келтiру мақсатында түзету мүмкiн болатын бiрдей тауарлар (жұмыстар, көрсетiлетiн қызметтер) рыногындағы (олар жоқ болғанда - бiртектi) мәмiлелердiң шарттары;
5) мәмiлеге қатысушы - осы Заңға сәйкес трансферттiк бағаларды қолдану кезiндегi мемлекеттiк бақылауға жататын, мәмiлелер жасаған жеке және заңды тұлға;
6) мәмiле жасасу бағасы - мәмiлеге қатысушылар қолданатын баға:
7) салық салуда жеңiлдiгi режимi бар мемлекет - Қазақстан Республикасының салық заңнамасына сәйкес айқындалатын салық салуда жеңiлдiгi режимi бар мемлекет;
8) салық бойынша жеңiлдiктер - инвестициялар бойынша келiсiм-шартқа сәйкес берiлген салық преференцияларының болуы немесе қызметiн арнайы экономикалық аймақ аумағында жүзеге асыратын салық төлеушiлердiң жекелеген санаттары бойынша салық мiндеттемелерiнен босату (азайту);
9) тауардың (жұмыстың, көрсетiлетiн қызметтiң) нарықтық бағасы салыстырмалы экономикалық (коммерциялық) жағдайларда бiрдей (олар болмаған кезде - бiртектi) тауарлар (жұмыстар, көрсетiлетiн қызметтер) рыногындағы сұраныс пен ұсыныстың өзара ықпалдастығы кезiнде қалыптасқан, тәуелсiз тараптар арасында тағайындалатын және (немесе) осы Заң белгiлеген тәртiппен айқындалатын баға;
10) трансферттік баға - осы Заңға сәйкес бақылауға жататын, мәмiлелер жасалған кезде объективтi түрде қалыптасатын нарықтық бағадан өзгеше баға;
11) уәкiлетті органдар - Қазақстан Республикасының салық қызметi органдары мен кеден органдары;
12) халықаралық iскерлiк операция - мынадай мәмiлелердi бiлдiредi:
тауарларды сатып алу-сату жөнiндегi экспорттық және (немесе) импорттық;
тараптардың бiрi тұрақты мекеме құрмастан қызметiн жүзеге асыратын Қазақстан Республикасының резидент емесi болып табылатын жұмыстарды орындау, қызмет көрсетулердi көрсету жөнiндегi мәмiлелер;
Қазақстан Республикасы аумағынан тыс жасалған Қазақстан Республикасының салық төлеушiлерiнiң тауарларды, жұмыстарды орындау, қызмет көрсетулердi көрсетудi сатып алу-сату жөнiндегi мәмiлелер.
3-бап.
Трансферттiк бағаларды қолдану кезiнде мемлекеттік бақылауды жүзеге асыру
1. Трансферттiк бағаларды қолдану кезiндегi мемлекеттiк бақылау (бұдан әрi - бақылау) мынадай мәмiлелер бойынша жүзеге асырылады:
1) халықаралық iскерлiк операциялар;
2) Қазақстан Республикасының аумағында жүзеге асырылатын мәмiлелер, олар халықаралық iскерлiк операцияларымен өзара байланыста болған жағдайда:
тараптардың бiрi болып табылатын жер қойнауын пайдаланушымен өндiрiлген пайдалы қазбалар бойынша;
тараптардың бiрi салықтар бойынша жеңiлдiктерi бар;
тараптардың бiрi мәмiлелер жасасатын жылдың алдындағы соңғы екi салық кезеңi iшiнде салық декларацияларының деректерi бойынша залал шеккен.
2. Бақылау:
1) мәмiлелер мониторингi;
2) уәкiлеттi органдардың тексеру жүргiзуi;
3) Қазақстан Республикасының заң актiлерiмен белгiленген өзге де рәсiмдердi жүргiзу арқылы жүзеге асырылады.
3. Осы Заңға сәйкес жүзеге асырылатын бақылауды жүргiзген кездегi уәкiлетті органдардың өзара iс-қимыл жасасу тәртiбiн уәкiлетті органдар айқындайды.
4-бап.
Уәкiлетті органдардың құқықтары мен мiндеттерi
1. Бақылауды жүзеге асыру мақсатында уәкiлеттi органдар:
1) мәмiлеге қатысушылардан және осы мәмiлеге жанама қатысушы үшiншi тұлғалардан тауардың нарықтық бағасын анықтау және мониторинг жүргiзу үшiн қажетті ақпарат сұратуға;
2) өз құзыретi шегiнде трансферттiк бағалар қолдану кезiндегi бақылау мәселесi жөнiнде түсiндiру жүргiзу және түсiнiктеме берудi жүзеге асыруға;
3) мәмiлелер мониторингiн жүргiзуге;
4) трансферттiк бағалар қолдану кезiндегi бақылау мәселесi бойынша тексеру жүргізуге;
5) тексерулерге уәкiлеттi органдардың мамандарын жұмылдыруға құқылы.
2. Уәкiлетті органдардың Қазақстан Республикасының салық және кеден заңдарында көзделген өзге де құқықтары бар.
3. Уәкiлеттi органдар:
1) мәмiлеге қатысушылардың құқықтарын сақтауға;
2) мемлекет мүддесiн қорғауға;
3) мәмiлеге қатысушылардың берген, қолданатын бағаларының экономикалық негiздемесiн қарауға;
4) мәмiлелер мониторингi бойынша белгiленген есептiлiк нысандарын толтыру тәртiбiн түсiндiруге;
5) бақылауды жүзеге асыру барысында алған мәлiметтердiң құпиялылығын сақтауға;
6) Қазақстан Республикасының заңдарына сәйкес тексеру нәтижелерi бойынша мәмiлеге қатысушылардың шағымын қарауды жүргiзуге мiндеттi.
4. Уәкiлеттi органдар Қазақстан Республикасының салық және кеден заңдарымен көзделген өзге де мiндеттердi орындайды.
5-бап.
Мәмiлеге қатысушылардың құқықтары мен мiндеттерi
1. Мәмiлеге қатысушылардың:
1) уәкiлеттi органдарға қолданылатын бағаның экономикалық негiздемесiн және аталған мәмiленiң бағасын растайтын құжаттарды алдын-ала беруге;
2) уәкiлеттi органдардан трансферттiк бағалар қолдануы кезiнде бақылауға қатысты қолданыстағы нормалар туралы ақпарат алуға;
3) бақылауды жүзеге асыруға байланысты туындаған мәселелер бойынша өзi не өзiнiң өкiлi арқылы немесе салық кеңесшiсiнiң қатысуымен өз мүддесiн қорғауға;
4) Қазақстан Республикасының заң актiлерiнде белгiленген тәртiппен салықтық тексеру актілерi бойынша хабарламаға және уәкiлеттi органдарының лауазымды адамдарының әрекетiне (әрекетсiздiгiне) шағым жасауға;
5) салық салу объектiлерi мен салық салуға байланысты объектiлердi өз бетiмен түзетуге;
6) өкiлеттi органдардан трансферттiк бағаларды қолдану кезiндегi бақылау мәселесi жөнiнде түсiнiктеме алуға құқылы.
2. Мәмiлеге қатысушылардың Қазақстан Республикасының заңдарында көзделген өзге де құқықтары бар.
3. Мәмiлеге қатысушылар:
1) осы Заңға сәйкес салық мiндеттемелерiн дер кезiнде және толық көлемiнде орындауға;
2) уәкiлеттi органдардың заңды талаптарын орындауға;
3) қолданатын бағаларының экономикалық негiздемесiн растайтын есептiлiк пен құжаттамалар жүргiзуге;
4) уәкiлеттi органдарға мәмiлелер мониторингi бойынша ақпарат пен есептiлiк, сондай-ақ осы Заң мен Қазақстан Республикасының заң актiлерiнде көзделген тәртiпте өзге де құжаттарды тапсыруға мiндеттi.
4. Мәмiлеге қатысушылар Қазақстан Республикасының заңдарында көзделген өзге де мiндеттердi орындайды.
6-бап.
Мәмiлелер мониторингi
1. Мәмiлелер мониторингiн мәмiлеге қатысушылар қолданатын бағаларға сырттай бақылау жолымен уәкiлетті органдар жүзеге асырады.
2. Мәмiлелер мониторингiне Қазақстан Республикасының Yкiметi бекiтетiн тiзбедегi тауарлар (жұмыстар, қызмет көрсетулер) бойынша халықаралық iскер операциялар жатады. Мәмiлелер мониторингiне жататын мәмiлеге қатысушылар Қазақстан Республикасының салық заңына сәйкес мониторингке жататын салық төлеушiлердiң тiзбесiнен айқындалады.
3. Мәмiлелер мониторингiн жүзеге асыру тәртiбiн уәкiлеттi органдар белгiлейдi және мәмiлер мониторингi бойынша белгiленген есептiлiк нысандарын толтыру мен құжаттамаларды жүргiзу тәртiбiнен тұрады.
7-бап.
Мәмiлелер мониторингi бойынша есептiлiк беру
Мәмiлелер мониторингi бойынша есептiлiк дегенiмiз салық кезеңi iшiнде жасалған мәмiлелер бойынша жасалған және уәкiлеттi органдар бекiтетiн тәртiп пен нысандарда мәмiлеге қатысушылар салық органдарына тапсыратын жиынтық деректердi бiлдiредi.
8-бап.
Трансферттiк бағаларды қолдану кезiңдегi бақылау мәселесi бойынша тексеру жүргiзу
1. Уәкiлетті органдар трансферттік бағаларды қолдану кезiңдегi бақылау мәселесi бойынша тексерудi мынадай жағдайларда жүргiзедi:
1) мәмiле бағасының нарық бағасынан ауытқу фактiсi анықталған жағдайда;
2) трансферттiк бағалардың қолданылуы фактiлерi туралы уәкiлеттi органдардан алынған ақпараттың негiзiнде;
3) Қазақстан Республикасының салық және кеден заңдарын сақтау мәселесi бойынша уәкiлеттi органдар жүзеге асыратын тексеру жүргiзгенде.
2. Трансферттік бағаларды қолдану кезiндегi бақылау мәселесi бойынша тексерудi уәкiлеттi органдар Қазақстан Республикасының салық және кеден заңдарымен белгiленген тәртiп пен мерзiмде жүзеге асырады.
9-бап.
Салық салу объектiлерiне және салық салуға байланысты объектiлерге түзету жасау
1. Тексеру жүргiзу барысында мәмiле жасасу бағасының нарықтық бағадан ауытқуы фактiсi анықталған кезде уәкiлетті органдар осы Заңда және Қазақстан Республикасының өзге де заң актiлерiнде көзделген тәртiпте салық салу объектiлерiне және салық салуға байланысты объектiлерге түзету жүргiзедi.
2. Қазақстан Республикасының резиденттерi мен тұрақты мекеме қызметiн жүзеге асыратын резидент еместердiң тауарларды (жұмыстарды, қызметтердi) сатып алу кезiнде жасасқан, қатысушысы мемлекетте салық салу жеңiлдiгiмен тiркелген мәмiлелер бойынша, не өзара тәуелдi немесе өзара байланысты болып табылады, салық салу объектiлерiне және салық салуға байланысты объектiлерге түзету мәмiле жасасу бағасының нарықтық бағадан ауытқуы кезiнде жүргізіледi.
3. Салық салу объектiлерiне және салық салуға байланысты объектiлерге түзету жасау мәмiле жасасу бағасының нарықтық бағасынан белгiлi бiр жағына 5 проценттен артық ауытқуы кезiнде осы баптың 2-тармағында көрсетiлген мәмiлелердi қоспағанда, мынадай мәмiлелерге:
1) өзара тәуелдi немесе өзара байланысты тараптар арасында;
2) қатысушысы мемлекетте, салық салу жеңiлдiгiмен тiркелген мәмiлелер;
3) тауар алмасу (бартерлiк) операциялары бойынша;
4) салықтар бойынша жеңiлдiктерi бар тұлғалармен мәмiле жасасу кезiнде жүргiзiледi.
4. Осы баптың 2 және 3 тармақтарында көрсетiлмеген мәмiлелер бойынша салық салу объектiлерi мен салық салуға байланысты объектiлерге түзету мәмiле жасасу бағасының нарықтық бағасынан белгiлi бiр жағына 10 проценттен артық ауытқуы кезiнде жүргiзiледi.
5. Салық салу объектiлерi мен салық салуға байланысты объектiлерге түзету мәмiле жасасу бағасының нарықтық бағасынан нақты ауытқуы мен мәмiле жасасу бағасының нарықтық бағадан осы баптың 2-4 тармақтарына сәйкес жiберiлген ауытқуы арасындағы айырмасына жүргiзiледi.
6. Салық салу объектiлерi мен салық салуға байланысты объектiлерге түзету жасау негiзiнде осы мәмлелерден түскен кiрiстер немесе шығыстар және басқа да салық салу объектiлерi нарықтық бағаға негiзделiп айқындалғандай болып есептелiп, салық және бюджетке төленетiн басқа да мiндеттi төлемдер Қазақстан Республикасының заңдарына сәйкес айыппұлдар мен өсiм қолданыла отырып есептеледi.
7. Салық салу объектiлерi мен салық салуға байланысты объектiлер мәмiлелерiне қатысушылардың өз бетiнше түзету жасау кезiнде салық және бюджетке төленетiн басқа да мiндеттi төлемдерге қосымша сомалар айыппұлдар қолданылмай есептеледi.
8. Түзету жасау тек салық және бюджетке төленетiн басқа да мiндеттi төлемдердiң ұлғаюына әкелетiн немесе бұдан былай ұлғаюына әкелуi мүмкiн салық салу объектiлерi мен салық салуға байланысты объектілер бойынша жүргiзiледi.
10-бап.
Тараптардың өзара тәуелдiлiгiн немесе өзара байланыстылығын айқындау
Өз араларындағы мәмiлелердiң (операциялардың) экономикалық нәтижелерiне әсер етуi мүмкiн, ерекше өзара қатынастағы жеке және (немесе) заңды тұлғалар өзара тәуелдi немесе өзара байланысты тараптар деп танылады.
Мұндай ерекше өзара қатынастар мына жағдайларды қамтиды:
1) бiр тұлға екiншi тұлғаның қосылма тұлғасы болып танылады;
2) егер қатысу үлесi 10 проценттен кем болмаса бiр тұлға тiкелей және (немесе) жанама түрде екiншi тұлғаға (басқаруға, бақылауға, капиталға) қатысады;
3) бiр тұлға тiкелей және (немесе) жанама түрде (басқаруға, бақылауға, капиталға) қатысатын тұлғалар және осындай әр тұлғаның капиталына тiкелей және (немесе) жанама қатысу үлесi 10 проценттен кем болмайды;
4) егер шаруашылық серiктестiгiнiң шарты бойынша қатысушы салымының мөлшерi барлық салымның жалпы мөлшерiнiң 20 процентiнен астамын құраса немесе мұндай серiктестiктiң осы қатысушының пайдасына бөлiнуге тиiстi кiрiсiнiң үлесi серiктестiктiң жалпы кiрiсiнiң 20 процентiнен астамын құраса, шаруашылық серiктестiгi және оның қатысушысы;
5) белгiлi бiр тұлға бiр мезгiлде қатысушысы болып табылатын және оның қатысу үлесi осындай әр серiктестiктегi қатысушылардың барлық салымдарының жалпы мөлшерiнiң 20 процентiнен асатын екi шаруашылық серiктестiгi;
6) сенiмгерлiк басқару құрылтайшысы және мүлiктi сенiмгерлiк басқару шарты бойынша сенiмгер басқарушы;
7) егер белгiлi бiр тұлға мүлiктi сенiмгерлiк басқару жөнiндегi екi шарт бойынша да сенiмгерлiк басқарудың құрылтайшысы болса, екi сенiмгер басқарушы;
8) мүлiктi сенiмгерлiк басқару шарты бойынша сенiмгер басқарушы және пайда алушы;
9) егер ұйым капиталына қатысу үлесi 10 проценттен асатын болса, сенiмгер басқарушы және сенiмгерлiк басқару құрылтайшысы тiкелей немесе жанама қатысатын ұйым;
10) егер мүлiктi сенiмгерлiк басқару жөнiндегi екi шарт бойынша да сенiмгерлiк басқару құрылтайшысы бiр тұлға болса, мүлiктi сенiмгерлiк басқару жөнiндегi бiр шарт бойынша сенiмгер басқарушы және мүлiктi сенiмгерлiк басқару жөнiндегi екiншi шарт бойынша пайда алушы;
11) мүлiктiң Меншiк иесi және мүлiктiң меншiк иесiнiң осы мүлiкке қатысты бiр немесе бiрнеше құқығы (иелену, пайдалану, билiк ету) берiлген тұлға;
12) бiр тұлға екiншi тұлғаға қызмет жағдайы бойынша бағынады;
13) тұлғалар еншiлес кәсiпорындар болып табылады немесе үшiншi бiр тұлғаның тiкелей немесе жанама бақылауында болады;
14) тұлғалар неке-отбасы қатынастарында болады, не жақын туыстар немесе жекжаттар болады.
Өзара тәуелдiлiгі немесе өзара байланыстылығы Қазақстан Республикасының өзге заң актiлерiне сәйкес айқындалуы мүмкiн.
11-бап.
Нарықтық бағаны анықтау әдiстерi
1. Нарықтық бағаны анықтау үшiн мынадай әдiстердiң бiрi пайдаланылады:
1) "бақыланбайтын салыстырмалы баға" әдiсi;
2) "шығындарға қосу" әдiсi;
3) "кейiннен өткiзу бағасы" әдiсi.
2. Осы баптың 1-тармағының 2) және 3) тармақшаларында көзделген әдiстер "бақыланбайтын салыстырмалы баға" әдiсiн қолдану мүмкiн болмаған кезде қолданылады.
3. Нарықтық бағаны анықтау үшiн әдiстердi қолдану тәртiбiн уәкiлеттi органдар айқындайды.
12-бап.
"Бақыланбайтын салыстырмалы баға" әдiсi
1. "Бақыланбайтын салыстырмалы баға" әдiсi тиiстi тауарлар (жұмыстар, көрсетiлетiн қызметтер) рыногында бiрдей (олар болмаған кезде - бiртектi) тауарлар (жұмыстар, көрсетiлетiн қызметтер) бойынша мәмiлелер болған кезде қолданылады және салыстырмалы экономикалық жағдайда бiрдей (олар болмаған кезде - бiртектi) тауарлардың (жұмыстардың, көрсетiлетiн қызметтердiң) бағасын негiзге ала отырып, нарықтық бағаны белгiлейдi.
2. Тауардың (жұмыстың, көрсетiлетiн қызметтiң) нарықтық бағасын анықтау кезiнде осы тауарды (жұмысты, көрсетiлетiн қызметтi) өткiзу кезiнде бiрдей (олар болмаған кезде - бiртектi) тауарлармен (жұмыстармен, көрсетiлетiн қызметтермен) салыстырмалы жағдайда жасасқан және (немесе) жүзеге асырылған мәмiлелер бойынша баға туралы ақпарат ескерiледi.
3. "Бақыланбайтын салыстырмалы баға" әдiсiн қолдану кезiнде нарықтық баға мынадай түрде анықталады:
1) ресми ақпарат көзiнде бағасы бар тиiстi рынокке тасымалдау бағыты туралы құжатты расталған ақпараты бар тауарлармен мәмiлелер жасасу үшiн нарықтық баға ресми ақпарат көзiнен баға ретiнде айқындалады. Бұл ретте, мәмiле бағасы дифференциал арқылы нарықтық бағасымен салыстырмалы экономикалық жағдайларға келтiрiледi;
2) осы тармақтың 1) тармақшасына сәйкес келмейтiн тауарлармен мәмiлелер жасасу үшiн нарықтық баға тиiстi рыноктағы ақпарат көздерiнен бағаны дифференциал арқылы мәмiле жағдайларымен салыстырмалы экономикалық жағдайларға келтiру жолымен айқындалады.
4. Дифференциал мәмiле жасасу кезiнде қолданылатын бағаны немесе ақпарат көзiнен бағаны салыстырмалы экономикалық жағдайларға келтiру үшiн қолданылатын түзетулер мөлшерiн бiлдiредi, және өзiне:
1) тиiстi рынокке тауарларды жеткiзу үшiн қажеттi негiзделген шығыстарды;
2) осы баптың 7-тармағында көрсетiлген мәмiле жасасу кезiнде қолданылатын бағаның нарықтық бағадан ауытқу шамасына ықпал ететiн жағдайларды;
3) тауарлардың (жұмыстардың, қызметтердiң) сапасын қосады.
5. Дифференциалды құрайтындар құжатты немесе ақпарат көздерiмен расталуы керек.
6. Мәмiле жасасу кезiнде қолданылатын бағаның нарықтық бағадан ауытқу шамасына ықпал ететiн жағдайларға:
1) жеткiзiлетiн тауарлардың (мәселен, тауар партиясының көлемi), орындалатын жұмыстардың, ұсынылатын қызметтердiң саны (көлемi);
2) мiндеттемелердi орындау мерзiмi;
3) әдетте мәмiлелердiң осы түрiнде қолданылатын төлем жағдайлары, сондай-ақ бағаға ықпал етуi мүмкiн өзге де жағдайлар;
4) өзара тәуелдi емес тұлғалар арасында мәмiлелер жасалған кезде қолданылатын дағдылы баға шегерiмдерi немесе бағаға үстеме ескерiледi. Атап айтқанда:
тауарларға (жұмыстарға, көрсетiлетiн қызметтерге) тұтынушы сұранымының маусымдық ауытқуы;
тауарлардың сапаларын немесе өзге де тұтыну қасиеттерiн жоғалтуы тауарлардың жоғалтқан сапасын және/немесе өзге де тұтыну қасиеттерiн iшiнара жақсартуы немесе қалпына келтiруi;
тауарлардың жарамдылық немесе өткiзiлу мерзiмiнiң өтуi (өту күнiнiң жақындауы);
ұқсас емес жаңа тауарлардың (жұмыстардың, көрсетiлетiн қызметтердiң) рынокқа келуi кезiндегi, сондай-ақ тауарлардың (жұмыстардың, көрсетiлетiн қызметтердiң) жаңа рыноктарға шығуы кезiндегi маркетинг саясаты;
тұтынушыларды тауарлардың тәжiрибелiк модельдерiмен және үлгiлерiмен таныстыру мақсатында оларды өткiзу қажеттiгi туғызған шегерiмдер мен үстемелер ескерiледi.
7. Осы баптың 6-тармағында көрсетілген жағдайлар қатысушылары салық салу жеңiлдiгiмен мемлекетте тiркелген мәмiлелерге ықпал етпейдi.
8. Ақпарат көздерiнен баға болмаған кезде нарықтық баға "тауарларды еркiн айналымға шығару" режимiнде ресiмделген импорттаушы елiнiң әкелiнетiн жүк кеден декларацияларының деректерi бойынша баға немесе жүк кеден декларациясының деректерiне сәйкес салыстырмалы экономикалық жағдайларда халықаралық iскер операцияларының қатысушыларының бiрдей (бiртектi) тауарларының (жұмыстарының, қызметтерiнiң) орташа өлшенген өткiзу бағасы есептелiнедi.
13-бап.
"Шығындарға қосу" әдiсi
1. "Шығындарға қосу" әдiсiн пайдалану кезiнде тауарлардың (жұмыстардың, көрсетiлетiн қызметтердiң) нарықтық баға жұмсалған шығындар (шығыстар) мен үстеме баға сомасы ретiнде анықталады.
2. Шығындарды (шығыстарды) анықтау үшiн тауарларды (жұмыстарды, көрсетiлетiн қызметтердi) өндiруге (сатып алуға) және (немесе) өткiзуге жұмсалғаны расталған тiкелей және жанама шығындар (шығыстар) тасымалдау, сақтау, сақтандыру жөнiндегi шығындар (шығыстар) мен өзге де шығындар (шығыстар) ескерiледi. Yстеме баға қызметтiң осы саласы үшiн қалыптасқан орташа рентабелдiлiк нормасын қамтамасыз ететiндей болып белгiленедi.
3. Қызметтің аталған саласы үшiн рентабельдiлiк Қазақстан Республикасының статистика және салық қызметi жөнiндегi органдарының деректерi негiзiнде айқындалар.
14-бап.
"Кейiннен өткiзу бағасы" әдiсi
"Кейiннен өткiзу бағасы" әдiсiн пайдалану кезiнде тауарлардың (жұмыстардың, көрсетiлетiн қызметтердiң) нарықтық бағасы сатып алушының мұндай тауарларды (жұмыстарды, көрсетiлетiн қызметтердi) кейiннен сатқандағы (қайта сатқандағы) бағасы мен қайта сатқан кезде сатып алушы шеккен, расталған шығындардың (шығыстардың) (аталған сатып алушы тауарларды (жұмыстарды, көрсетiлетiн қызметтердi) сатушыдан сатып алғандағы баға есепке алынбай), сондай-ақ оның үстеме бағасының айырмасы ретiнде анықталады. Yстеме баға қызметтiң осы саласы үшiн қалыптасқан орташа рентабелдiлiк нормасын қамтамасыз ететiндей болып белгiленедi.
15-бап.
Нарықтық бағаны анықтау үшiн пайдаланылатын ақпарат көздерi
1. Тауардың (жұмыстың, көрсетiлетiн қызметтiң) нарықтық бағасын және нарықтық бағаны анықтау үшiн қажеттi өзге де деректердi анықтау үшiн мынадай кезекте тиiстi ақпарат көздерi пайдаланылады:
1) нарықтық бағалар туралы ақпарат көздерi;
2) биржалық баға белгiленiмi туралы дерек көздерi;
3) Баға, шығындар мен мәмiле жасасу бағасының нарықтық бағадан ауытқуына ықпал ететiн жағдайлар туралы мемлекеттік органдардың деректерi;
4) Дербес сарапшылар берген ақпараттар;
5) өзге де ақпарат көздерi.
2. Нарықтық бағалар туралы ақпарат көздерiнiң тiзбесiн Қазақстан Республикасының Үкiметi бекiтедi.
3. Егер келiсiм-шарт шартына сәйкес мәмiлеге қатысушылар тауарға баға қалыптастыру кезiнде ресми көз пайдаланылса, алайда тиiстi тауарға нарықтық баға бiрнеше ресми ақпарат көздерi негiзiнде анықталуы мүмкiн болса, негiзге келiсiм-шартпен анықталған ақпарат көзiнен алынған баға қолданылады.
4. Қатысушысы мемлекетте салық салу жеңілдiгiмен тiркелген мәмiле бойынша нарықтық бағаны айқындау кезiнде тек осы баптың 1-тармағының 1) және 3) тармақшаларында көрсетiлген ақпарат көздерi ғана пайдаланылады.
16-бап.
Трансферттiк бағаларды қолдану кезiнде бақылау жөнiндегi заңдардың бұзылғаны үшiн жауаптылық
Трансферттiк бағаларды қолдану кезiнде бақылау туралы заңдардың бұзылуына кiнәлi тұлғалар Қазақстан Республикасының заң актiлерiнде белгiленген тәртiппен жауапты болады.
17-бап. Уәкiлеттi органдардың шешiмдерiне шағым жасау Уәкiлеттi органдардың шешiмдерiне Қазақстан Республикасының заң актiлерiнде белгiленген тәртiппен шағым жасалуы мүмкiн.
18-бап.
Осы Заңды қолданысқа енгiзу тәртiбi
1. Осы Заң 2007 жылғы 1 қаңтардан бастап қолданысқа енедi.
2. "Трансферттiк бағаларды қолдану кезiндегi мемлекеттiк бақылау туралы" Қазақстан Республикасының 2001 жылғы 5 қаңтардағы Заңының (Қазақстан Республикасы Парламентiнiң Жаршысы, 2001 ж., N 1, 2-құжат) күшi жойылды деп танылсын.
Қазақстан Республикасының
Президентi
