Қазақстан Республикасының Үкіметі ҚАУЛЫ ЕТЕДІ:
"Қазақстан Республикасының кейбір заңнамалық актілеріне балалардың қадағалаусыз қалуының профилактикасы және кәмелетке толмағандар арасындағы құқық бұзушылықтардың алдын алу мәселесі бойынша толықтырулар мен өзгерістер енгізу туралы" Қазақстан Республикасы Заңының жобасы Қазақстан Республикасының Парламенті Мәжілісінің қарауына енгізілсін.
Қазақстан Республикасының
Премьер-Министрі К.Мәсімов
жоба
Қазақстан Республикасының Заңы
Қазақстан Республикасының кейбір заңнамалық актілеріне балалардың қадағалаусыз қалуының профилактикасы және кәмелетке толмағандар арасындағы құқық бұзушылықтардың алдын алу мәселесі бойынша толықтырулар мен өзгерістер енгізу туралы
1-бап. Қазақстан Республикасының мынадай заңнамалық актілеріне толықтырулар мен өзгерістер енгізілсін:
1. 2001 жылғы 30 қаңтардағы Қазақстан Республикасының Әкімшілік құқық бұзушылық туралы кодексіне (Қазақстан Республикасы Парламентінің Жаршысы, 2001 ж., N 5-6, 24-құжат; N 17-18, 241-құжат; N 21-22, 281-құжат; 2002 ж., N 4, 33-құжат; N 17, 155-құжат; 2003 ж., N 1-2, 3-құжат; N 4, 25-құжат; N 5, 30-құжат; N 11, 56, 64, 68-құжаттар; N 14, 109-құжат; N 15, 122, 139-құжаттар; N 18, 142-құжат; N 21-22, 160-құжат; N 23, 171-құжат; 2004 ж., N 6, 42-құжат; N 10, 55-құжат; N 15, 86-құжат; N 17, 97-құжат; N 23, 139, 140-құжаттар; N 24, 153-құжат; 2005 ж., N 5, 5-құжат; N 7-8, 19-құжат; N 9, 26-құжат; N 13, 53-құжат; N 14, 58-құжат; N 17-18, 72-құжат; N 21-22, 86, 87-құжаттар; N 23, 104-құжат; 2006 ж., N 1, 5-құжат; N 2, 19, 20-құжаттар; N 3, 22-құжат; N 5-6, 31-құжат; N 8, 45-құжат; N 10, 52-құжат; N 11, 55-құжат; N 12, 72, 77-құжаттар; N 13, 85, 86-құжаттар; N 15, 92, 95-құжаттар; N 16, 98, 102-құжаттар; N 23, 141-құжат; 2007 ж., N 1, 4-құжат; N 2, 16, 18-құжаттар; N 3, 20, 23-құжаттар; N 4, 28, 33-құжаттар; N 5-6; 40-құжат; N 9, 67-құжат; N 10; 69-құжат; N 12, 88-құжат; N 13, 99-құжат; N 15, 106-құжат; N 16, 131-құжат; N 17, 136, 139, 140-құжаттар; N 18, 143, 144-құжаттар; N 19, 146, 147-құжаттар; N 20, 152-құжат; N 24, 180-құжат):
1) мынадай мазмұндағы 112-1-баппен толықтырылсын:
"112-1-бап. Кәмелетке толмағандарды түнгі уақытта ойын-сауық
орындарына кіргізу
1. Кәмелетке толмағандарды заңды өкілінсіз немесе олардың орнындағы адамдарсыз сағат 23.00-ден бастап 6.00-ге дейінгі кезеңде ойын-сауық орындарына кіргізу, -
ойын-сауық орындарының лауазымды адамдарына - айлық есептік көрсеткіштің бестен онға дейінгі мөлшерінде, жеке кәсіпкерлерге, шағын және орта кәсіпкерлік субъектілері және коммерциялық емес ұйымдар болып табылатын заңды тұлғаларға - жиырма бестен отызға дейінгі мөлшерінде, ірі кәсіпкерлік субъектілері болып табылатын заңды тұлғаларға қырықтан елуге дейінгі мөлшерінде айыппұл салуға әкеп соғады.
2. Осы баптың бірінші бөлігінде көзделген әкімшілік жаза қолданылғаннан кейін бір жыл ішінде қайталап жасалған іс-әрекеттер, -
ойын-сауық орындарының лауазымды адамдарына қызметін немесе оның жекелеген түрлерін бір айдан екі айға дейін тоқтата тұрып, айлық есептік көрсеткіштің он бестен жиырмаға дейінгі мөлшерінде, жеке кәсіпкерлерге, шағын және орта кәсіпкерлік субъектілері және коммерциялық емес ұйымдар болып табылатын заңды тұлғаларға қырықтан елуге дейінгі мөлшерінде, ірі кәсіпкерлік субъектілері болып табылатын заңды тұлғаларға сексеннен жүзге дейінгі мөлшерінде айыппұл салуға әкеп соғады.";
2) 336-баптың тақырыбындағы, бірінші және үшінші бөліктеріндегі "спирт ішімдіктерін" деген сөздер "алкогольдік ішімдіктерді" деген сөздермен ауыстырылсын;
3) мынадай мазмұндағы 336-3-баппен толықтырылсын:
"336-3-бап. Кәмелетке толмағандардың түнгі уақытта ойын-сауық
орындарында болуы
1. Заңды өкілінсіз немесе олардың орнындағы адамдарсыз кәмелетке толмағандардың сағат 23.00-ден бастап 6.00-ге дейін ойын-сауық орындарында болуы, -
заңды өкілдеріне немесе олардың орнындағы адамдарға ескерту жасауға әкеп соғады.
2. Осы баптың бірінші бөлігінде көзделген әкімшілік жаза қолданылғаннан кейін қайталап жасалған іс-әрекеттер, -
заңды өкілдеріне немесе олардың орнындағы адамдарға айлық есептік көрсеткіштің бестен онға дейінгі мөлшерінде айыппұл салуға әкеп соғады.";
4) 541-баптың бірінші бөлігінде:
"95-112," деген сандардан кейін "112-1," деген сандармен толықтырылсын;
"336-1 (үшінші бөлігінде)," деген сөздерден кейін "336-3 (екінші бөлігінде)," деген сөздермен толықтырылсын;
5) 543-бапта:
бірінші бөлігінде "336-2," деген сандардан кейін "336-3 (бірінші бөлігінде)," деген сөздермен толықтырылсын;
екінші бөлігінде:
4) тармақшадағы "336-1 (бірінші және екінші бөліктерінде)," деген сөздерден кейін "336-3 (бірінші бөлігінде)," деген сөздермен толықтырылсын;
9) тармақшадағы "336 (бірінші және екінші бөліктерінде)," деген сөздерден кейін "336-3 (бірінші бөлігінде)," деген сөздермен толықтырылсын;
6) 636-баптың бірінші бөлігі 1) тармақшасының екінші абзацында:
"112," деген сандардан кейін "112-1," деген сандармен толықтырылсын;
"336-1 (үшінші бөлігі)," деген сөздерден кейін "336-3" (екінші бөлігінде)," деген сөздермен толықтырылсын.
2. "Қазақстан Республикасындағы баланың құқықтары туралы" 2002 жылғы 8 тамыздағы Қазақстан Республикасының Заңына (Қазақстан Республикасы Парламентінің Жаршысы, 2002 ж., N 17, 154-құжат; 2004 ж., N 23, 142-құжат; 2005 ж., N 7-8, 19-құжат; 2006 ж., N 3, 22-құжат; 2007 ж., N 9, 67-құжат; N 20, 152-құжат):
36-бап мынадай мазмұндағы 4-тармақпен толықтырылсын:
"4. Баланың заңды өкілінсіз немесе олардың орнындағы адамдарсыз сағат 23.00-ден бастап 6.00-ге дейін ойын-сауық ұйымдарында болуына, сондай-ақ заңды өкілінсіз немесе олардың орнындағы адамдарсыз кәмелетке толмағандарды көрсетілген уақытта онда кіргізуге тыйым салынады.".
3. "Кәмелетке толмағандар арасындағы құқық бұзушылықтардың профилактикасы мен балалардың қадағалаусыз және панасыз қалуының алдын алу туралы" 2004 жылғы 9 шілдедегі Қазақстан Республикасының Заңына (Қазақстан Республикасы Парламентінің Жаршысы, 2004 ж., N 18, 105-құжат; 2007 ж., N 9, 67-құжат; N 20, 67-құжат):
1) 1-бап мынадай редакцияда жазылсын:
"1-бап. Осы Заңда пайдаланылатын негізгі ұғымдар
Осы Заңда мынадай негізгі ұғымдар пайдаланылады:
1) әлеуметтік оңалту - кәмелетке толмағандар арасындағы құқық бұзушылықтар, қадағалаусыз және панасыз қалудың профилактикасы жүйесінің органдары мен мекемелері жүзеге асыратын өмірде қиын жағдайға душар болған кәмелетке толмағандарды құқықтық, әлеуметтік, табиғи, психикалық, педагогикалық, моральдық және (немесе) материалдық тұрғыда қалпына келтіруге бағытталған шаралар кешені;
2) жеке профилактикалық жұмыс - мемлекеттік органдардың, қоғамдық бірлестіктердің, ұйымдардың, азаматтардың өмірде қиын жағдайға душар болған кәмелетке толмағандар мен тұрмысы қолайсыз отбасыларды, сондай-ақ кәмелетке толмағандарды құқық бұзушылықтар немесе қоғамға жат іс-әрекеттер жасауға тартатын өзге де адамдарды уақтылы анықтау, оларды әлеуметтік оңалту және (немесе) олардың құқық бұзушылықтар жасауының алдын алу жөніндегі қызметі;
3) кәмелетке толмағандар арасындағы құқық бұзушылықтардың профилактикасы мен балалардың қадағалаусыз және панасыз қалуының алдын алу (бұдан әрі - кәмелетке толмағандар арасындағы құқық бұзушылықтардың, қадағалаусыз және панасыз қалудың алдын алу) - кәмелетке толмағандар арасындағы құқық бұзушылықтардың, қадағалаусыз, панасыз қалудың және қоғамға жат іс-әрекеттердің алдын алуға, оларға ықпал ететін себептер мен жағдайларды анықтауға және жоюға бағытталған, кәмелетке толмағандарды тәрбиелеу, оқыту немесе бағып-күту жөніндегі міндеттерін орындамайтын не олардың мінез-құлқына теріс әсер ететін ата-аналарымен немесе басқа да заңды өкілдерімен, сондай-ақ кәмелетке толмағандарды құқық бұзушылықтар немесе қоғамға жат іс-әрекеттер жасауға тартатын өзге де адамдармен жеке профилактикалық жұмыстар жиынтығын жүзеге асыратын құқықтық, педагогикалық, медициналық және өзге де шаралар жүйесі;
4) кәмелетке толмағанды бағып-күту - кәмелетке толмағанның ата-анасының немесе өзге де заңды өкілдерінің өз қаржылық мүмкіндіктері мен қабілеттерінің шегінде оның салауатты дамуы, оның мүліктік және мүліктік емес құқықтары мен мүдделерін және мемлекеттік ең төмен әлеуметтік стандарттарын қорғау үшін жағдай жасауы;
5) кәмелетке толмағанды тәрбиелеу - балаға қоғамда қалыптасқан және оның рухани, табиғи, имандылық, психикалық, мәдени, зияткерлік дамуына және әлеуметтік ортаның теріс ықпалынан қорғауға бағытталған мінез-құлық ережелері мен нормаларын дарыту жөніндегі ата-анасының немесе өзге де заңды өкілдерінің тарапынан оған әсер ететін үздіксіз процесс;
6) қадағалаусыз қалған бала - ата-анасының немесе олардың заңды өкілдерінің, сондай-ақ педагогтардың, тәрбиешілердің және кәмелетке толмағандарды қадағалауды жүзеге асыруға міндетті басқа да оқыту, тәрбиелеу және өзге мекемелер қызметкерлерінің тарапынан оны тәрбиелеу, оқыту және (немесе) бағып-күту жөніндегі міндеттерді орындамауы немесе тиісінше орындамауы салдарынан не оның үйден немесе баланың құқықтар қорғау жөніндегі функцияларды жүзеге асыратын ұйымдардан өз еркімен кетуі салдарынан мінез-құлқына бақылау болмаған кәмелетке толмаған бала;
7) қадағалаусыз қалу - кәмелетке толмағандардың құқық бұзушылықтар жасауына ықпал ететін, олардың мінез-құлқы мен тұрмыс жағдайына тиісінше бақылаудың жоқтығымен сипатталатын әлеуметтік құбылыс;
8) өмірде қиын жағдайға душар болған балалар - қалыптасқан жағдайлардың салдарынан тіршілік әрекеті бұзылған және осы жағдайларды өз бетінше немесе отбасының көмегімен жеңе алмайтын балалар;
9) панасыз қалған бала - тұрғылықты жері жоқ қадағалаусыз қалған бала;
10) тұрмысы қолайсыз отбасы - кәмелетке толмағандардың ата-анасы немесе заңды өкілдері оларды тәрбиелеу, оқыту, бағып-күту жөніндегі өз міндеттерін орындамайтын және (немесе) олардың мінез-құлқына теріс әсер ететін отбасы.";
2) 19-баптың 2-тармағы "оларға" деген сөзден кейін ", сондай-ақ кәмелетке толмағандарды құқық бұзушылықтар немесе қоғамға жат іс-әрекеттер жасауға тартатын өзге де адамдар" деген сөздермен толықтырылсын;
3) 20-бапта:
2) тармақшадағы "прокурордың," деген сөзден кейін "тергеушінің," деген сөзбен толықтырылсын;
4) тармақшадағы "заңды өкілдеріне" деген сөздерден кейін ", сондай-ақ кәмелетке толмағандарды құқық бұзушылықтар немесе қоғамға жат іс-әрекеттер жасауға тартатын өзге де адамдарға" деген сөздермен толықтырылсын;
4) 21-баптағы "заңды өкілдеріне" деген сөздерден кейін ", сондай-ақ кәмелетке толмағандарды құқық бұзушылықтар немесе қоғамға жат іс-әрекеттер жасауға тартатын өзге де адамдарға" деген сөздермен толықтырылсын;
5) 22-баптың 1-тармағындағы "заңды өкілдері" деген сөздерден кейін ", сондай-ақ өзге де адамдар" деген сөздермен толықтырылсын.
2-бап. Осы Заң ресми жарияланған күнінен бастап күнтізбелік он күн өткен кейін қолданысқа енгізіледі.
Қазақстан Республикасының
Президенті
