"Электр желілерін басқару жөніндегі қазақстандық компания" "КЕGОС" акционерлік қоғамы (бұдан әрі - "КЕGОС" АҚ) іске асыратын "Мойнақ СЭС қуатын беру схемасы" жобасын тиімді қаржыландыруды ұйымдастыру мақсатында Қазақстан Республикасының Үкіметі ҚАУЛЫ ЕТЕДІ:
1. Қазақстан Республикасы Қаржы министрлігі Қазақстан Республикасының заңнамасында белгіленген тәртіппен:
1) "КЕGОС" АҚ-мен мемлекеттік кепілдік беру туралы келісім жасасын;
2) Халықаралық Қайта Құру және Даму Банкіне (бұдан әрі - Банк) "2009 - 2011 жылдарға арналған республикалық бюджет туралы" Қазақстан Республикасының Заңымен бекітілген мемлекеттік кепілдіктер берудің лимиті шегінде 48000000 (қырық сегіз миллион) АҚШ доллары мөлшерінде тартылатын қарыз бойынша "КЕGОС" АҚ-ның міндеттемелерін қамтамасыз ету ретінде Қазақстан Республикасының мемлекеттік кепілдігін берсін.
2. "Самұрық-Қазына" ұлттық әл-ауқат қоры" акционерлік қоғамына Қазақстан Республикасының заңнамасында белгіленген тәртіппен "КЕGОС" АҚ-ның мемлекеттік кепілдікті алуға үміткер тұлғаларға қойылатын талаптарды орындауын қамтамасыз ету ұсынылсын.
3. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
