«Жануарлар дүниесін қорғау, өсімін молайту және пайдалану туралы» Қазақстан Республикасының 2004 жылғы 9 шілдедегі Заңының 15-бабына сәйкес Қазақстан Республикасының Үкіметі ҚАУЛЫ ЕТЕДІ:
1. Біріккен Араб Әмірліктері Сыртқы істер министрі Абдуллах бин Зайд Аль-Нахаянға 2010 жылғы 1 қазан - 15 қараша кезеңінде Маңғыстау облысында ерекше қорғалатын табиғи аумақтардан тыс жерлерде 15 (он бес) дарақ жек дуадақты өз ителгілерімен саятшылық құруға рұқсат берілсін.
2. Қазақстан Республикасы Ауыл шаруашылығы министрлігінің Орман және аңшылық шаруашылығы комитеті осы қаулының 1-тармағында көрсетілген тұлғаға жек дуадақтарды өз ителгілерімен аулауға белгіленген тәртіппен рұқсат берсін.
3. Жек дуадақты аулағаны үшін ақы ставкасы 260 айлық есептік көрсеткіш мөлшерінде белгіленсін.
4. Қазақстан Республикасы Ауыл шаруашылығы министрлігі, Қазақстан Республикасындағы СИТЕС әкімшілік органы ителгімен саятшылық құру үшін қыран құстарды Қазақстан Республикасына әкелу мен одан әкетуді Жойылып кету қаупі төнген жабайы фауна мен флора түрлерімен халықаралық сауда туралы конвенцияның рәсімдерін сақтай отырып қамтамасыз етсін.
5. Маңғыстау облысының әкімі көрсетілген іс-шараларды ұйымдастыруда қажетті жәрдем көрсетсін.
6. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
