Қазақстан Республикасының Үкіметі ҚАУЛЫ ЕТЕДІ:
«Қазақстан Республикасының дипломатиялық және оған теңестiрiлген өкiлдiгi туралы ереженi бекіту туралы» Қазақстан Республикасы Президентінің 2004 жылғы 4 ақпандағы № 1287 Жарлығына өзгерістер енгізу туралы» Қазақстан Республикасының Президенті Жарлығының жобасы Қазақстан Республикасы Президентінің қарауына енгізілсін.
Қазақстан Республикасының
Премьер-Министрі С. Ахметов
Қазақстан Республикасы Президентінің Жарлығы «Қазақстан Республикасының дипломатиялық және оған теңестiрiлген өкiлдiгi туралы ереженi бекіту туралы» Қазақстан Республикасы Президентінің 2004 жылғы 4 ақпандағы № 1287 Жарлығына өзгерістер енгізу туралы
ҚАУЛЫ ЕТЕМІН:
1. «Қазақстан Республикасының дипломатиялық және оған теңестiрiлген өкiлдiгi туралы ереженi бекіту туралы» Қазақстан Республикасы Президентінің 2004 жылғы 4 ақпандағы № 1287 Жарлығына (Қазақстан Республикасының ПҮАЖ-ы, 2004 ж., № 5, 67-құжат) мынадай өзгерістер енгізілсін:
жоғарыда аталған Жарлықпен бекітілген Қазақстан Республикасының дипломатиялық және оған теңестiрiлген өкiлдiгi туралы ережеде:
7-тармақ мынадай редакцияда жазылсын:
«7. Өкiлдiк негiзгі мiндеттердi iске асыру және өзiне жүктелген функцияларды жүзеге асыру үшiн:
1) қазақстандық мемлекеттік органдар мен ұйымдардың (бұдан әрi – мемлекеттік ұйымдар) өкiлдiктерi (өкілдері) мен филиалдарының және олардың қызметкерлерінің орналасқан мемлекетiндегі қызметiн үйлестiруге;
2) орналасқан мемлекетіндегі мемлекеттік ұйымдардан толық ақпарат берудi және Қазақстан Республикасының ұлттық мүдделерiн қозғайтын қызметті келiсудi талап етуге;
3) Қазақстан Республикасының заңнамасында көзделген өзге де құқықтарды жүзеге асыруға құқылы.»;
12-тармақ мынадай редакцияда жазылсын:
«12. Қазақстан Республикасының Төтенше және Өкiлеттi Елшiсі орналасқан мемлекетіндегі Қазақстан Республикасының бас консулдықтарының, консулдықтарының, вице-консулдықтарының, консулдық агенттіктерiнiң, құрметтi консулдықтарының және өзi аккредиттелген мемлекеттерде ашылған Қазақстан Республикасының дипломатиялық миссияларының қызметiне басшылықты, сондай-ақ орналасқан мемлекетiндегі мемлекеттік ұйымдардың қызметiн үйлестiрудi және олардың жұмысын бақылауды жүзеге асырады.
Мемлекеттік ұйымдардың басшылары:
1) өзiнiң қызметiн өкілдіктің немесе консулдық мекеменің басшысымен келiсуге, өкілдіктің басшысына оның өкiлеттiктерiн жүзеге асыруда жәрдем көрсетуге, өзiнiң қызметі туралы оған ақпарат беруге мiндеттi;
2) өкілдіктің немесе консулдық мекеменің басшысымен жұмыс жоспарларын келіседі, сондай-ақ өкілдіктің немесе консулдық мекеменің басшысымен келісілген мерзімдерде олардың орындалуы туралы есептер береді.».
2. Осы Жарлық қол қойылған күнінен бастап қолданысқа енгізіледі.
Қазақстан Республикасының
Президенті Н.Назарбаев
