Қазақстан Республикасының Үкіметі ҚАУЛЫ ЕТЕДІ:
1. "Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасы мен Ресей Федерациясының біртұтас энергетикалық жүйелерінің қатарлас жұмыс істеуін қамтамасыз ету жөніндегі шаралар туралы келісімге қол қою туралы" Қазақстан Республикасы Үкіметінің 2022 жылғы 26 қарашадағы № 954 қаулысына мынадай өзгеріс енгізілсін:
көрсетілген қаулымен мақұлданған Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасы мен Ресей Федерациясының біртұтас энергетикалық жүйелерінің қатарлас жұмыс істеуін қамтамасыз ету жөніндегі шаралар туралы келісімнің жобасы осы қаулыға қосымшаға сәйкес жаңа редакцияда жазылсын.
2. Осы қаулы қол қойылған күнінен бастап қолданысқа енгізіледі.
|
Қазақстан Республикасының Премьер-Министрі |
Ә. Смайылов |
| Қазақстан Республикасы Үкіметінің 2023 жылғы 17 наурыздағы № 238 қаулысына қосымша |
|
| Қазақстан Республикасы Үкіметінің 2022 жылғы 26 қарашадағы № 954 қаулысымен мақұлданған |
|
| Жоба |
Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасы мен Ресей Федерациясының біртұтас энергетикалық жүйелерінің қатарлас жұмыс істеуін қамтамасыз ету жөніндегі шаралар туралы келісім
Бұдан әрі Тараптар деп аталатын Қазақстан Республикасының Үкіметі мен Ресей Федерациясының Үкіметі
Қазақстан Республикасының біртұтас энергетикалық жүйесінің (бұдан әрі – Қазақстан БЭЖ-і) және Ресей Федерациясының біртұтас энергетикалық жүйесінің (бұдан әрі – Ресейдің БЭЖ-і) қатарлас жұмыс істеуін қамтамасыз етудің маңыздылығын атап өте отырып,
электр энергетикасы саласындағы өзара тиімді ынтымақтастықты одан әрі тереңдетуге деген мүдделігін негізге ала отырып,
1993 жылғы 25 желтоқсандағы Қазақстан Республикасының Үкіметі мен Ресей Федерациясының Үкіметі арасындағы Ынтымақтастық және отын-энергетика кешендерін дамыту туралы келісімді, 2000 жылғы 25 қаңтардағы Тәуелсіз Мемлекеттер Достастығына қатысушы мемлекеттердің электр энергиясы мен қуатынының транзиті туралы келісімді ескере отырып,
төмендегілер туралы келісті:
1. Тараптар Қазақстан БЭЖ-і мен Ресей БЭЖ-інің қатарлас жұмыс істеуі қамтамасыз етілетін, мыналар:
1) Қазақстан БЭЖ-і арқылы Ресей Федерациясынан беруге жоспарланатын электр энергиясының көлемдерін Тараптар мемлекеттерінің тарифтерді мемлекеттік реттеу саласындағы уәкілетті органдарының жыл сайын келісуі;
2) "Электр желілерін басқару жөніндегі қазақстандық компания" (Kazakhstan Electricity Grid Operating Company) "KEGOC" акционерлік қоғамы (Қазақстан Республикасы) (бұдан әрі – KEGOC) мен "Интер РАО ЕЭС" жария акционерлік қоғамы (Ресей Федерациясы) (бұдан әрі – Интер РАО) арасында жасалған шарттар (келісімшарттар) бойынша электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін өтеу мақсатында электр энергиясын сатып алу және сату көзделетін қажетті шараларды қабылдайды. Бұл ретте KEGOC пен Интер РАО арасында жасалған шарттар (келісімшарттар) бойынша электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін өтеу мақсатында электр энергиясын сатып алу және сату құнында:
а) электр энергиясы ағындарының нақты мемлекетаралық сальдосының диспетчерлік графикте берілгеннен жол берілетін ауытқуының орташа сағаттық шамасы шегінде:
бір тәулік бұрын баға өтінімдерін бәсекелестік іріктеу қорытындылары бойынша айқындалған бағалар негізінде Ресей Федерациясының электр энергиясы мен қуатының көтерме нарығында қалыптасқан электр энергиясының бағасына сәйкес келетін электр энергиясын сатып алу және сату бағасының теңдігі қамтамасыз етілетіні;
Қазақстан Республикасының ұлттық электр желісінің және Ресей Федерациясының біртұтас ұлттық (бүкілресейлік) электр желісінің электр желілері бойынша электр энергиясын беру жөніндегі көрсетілетін қызметтерге ақы төлеуді Қазақстан Республикасы мен Ресей Федерациясының шаруашылық жүргізуші субъектілері жүзеге асырмайтыны, көрсетілетін қызметтердің тиісті көлемі міндеттемелер көлемін айқындау кезінде ескерілмейтіні;
Интер РАО рентабельділік нормасының мөлшері 0,5 пайызды құрайтыны;
б) электр энергиясы ағындарының нақты мемлекетаралық сальдосының диспетчерлік графикте берілгеннен жол берілетін ауытқуының орташа сағаттық шамасынан жоғары:
электр энергиясын сатып алу және сату бағалары Ресей Федерациясының электр энергиясы мен қуатының көтерме нарығында жасалған және жүйені теңгерімдеу үшін өтінімдерді бәсекелестік іріктеу қорытындылары бойынша электр энергиясы саудасын қамтамасыз ететін шарттар бойынша электр энергиясын сатып алу (сату) құнын негізге ала отырып айқындалатыны;
Ресей Федерациясынан Қазақстан Республикасына берілген электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін өтеу мақсатында Ресей Федерациясының электр энергиясы мен қуатының көтерме нарығында жасалған шарттар бойынша қуатты сатып алу құнын, Ресей Федерациясының бағаларды (тарифтерді) мемлекеттік реттеу саласындағы уәкілетті органы Ресей Федерациясының электр энергиясы мен қуатының көтерме нарығы субъектілері үшін белгілеген бағалар (тарифтер) бойынша "Россети – Федералдық желілік компаниясы" жария акционерлік қоғамының (бұдан әрі – Россети) электр энергиясын беру жөніндегі көрсетілетін қызметтерінің құнын және "Біртұтас энергетикалық жүйенің жүйелік операторы" акционерлік қоғамының (Ресей Федерациясы) (бұдан әрі – БЭЖ ЖО) электр энергетикасындағы жедел-диспетчерлік басқару жөніндегі көрсетілетін қызметтерінің құнын негізге ала отырып айқындалатын бағалар бойынша қуатқа ақы төлеу жүзеге асырылатыны;
KEGOC-тың электр энергиясын беру жөніндегі көрсетілетін қызметтеріне және оның жүйелік оператор ретіндегі көрсетілетін қызметтеріне ақы төлеу жүзеге асырылмайтыны;
Интер РАО рентабельділік нормасының мөлшері 2,5 пайызды құрайтыны көзделеді;
3) Қазақстан Республикасының уәкілетті ұйымы мен Интер РАО арасында жасалған шарт (келісімшарт) бойынша электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін төмендету мақсатында:
а) бір тәулік бұрын баға өтінімдерін бәсекелестік іріктеу нәтижелері бойынша электр энергиясын сатып алу және сату шарты бойынша Ресей Федерациясының электр энергиясы мен қуатының көтерме нарығында электр энергиясын сатып алу бағалары бойынша электр энергиясына ақы төлеу;
б) Ресей Федерациясының электр энергиясы мен қуатының көтерме нарығында жасалған шарттар бойынша қуатты сатып алу, Ресей Федерациясының бағаларды (тарифтерді) мемлекеттік реттеу саласындағы уәкілетті органы Ресей Федерациясының электр энергиясы мен қуатының көтерме нарығы субъектілері үшін белгілеген бағалар (тарифтер) бойынша Россетидің электр энергиясын беру жөніндегі көрсетілетін қызметтерінің және БЭЖ ЖО-ның электр энергетикасындағы жедел-диспетчерлік басқару жөніндегі көрсетілетін қызметтерінің құнын негізге ала отырып айқындалатын бағалар бойынша қуатқа ақы төлеу, сондай-ақ Ресей Федерациясының электр энергиясы мен қуатының көтерме нарығының коммерциялық инфрақұрылым ұйымдарының (бұдан әрі – коммерциялық инфрақұрылым ұйымдары) көрсетілетін қызметтеріне Ресей Федерациясының бағаларды (тарифтерді) мемлекеттік реттеу саласындағы уәкілетті органы белгілеген тариф және Ресей Федерациясының электр энергиясы мен қуатының көтерме нарығы субъектілері үшін "Нарық кеңесі КӘ" қауымдастығы байқаушы кеңесінің (Ресей Федерациясы) шешімімен белгіленген баға бойынша ақы төлеу;
в) Интер РАО рентабельділік нормасының мөлшері:
2022 жылғы 30 маусымға дейін – 2,5 пайыз;
2023 жылғы 1 шілдеден бастап – 5 пайыз болып;
г) көрсетілген жеткізілімдерді өзара келісілген тәртіппен KEGOC, БЭЖ ЖО және Россети жүзеге асыратын Қазақстан БЭЖ-і мен Ресей БЭЖ-і арасындағы экспорт/импорт қималары арқылы электр энергиясы ағындары сальдосының жоспарлы сағаттық графиктерінде есепке алу көзделетін Қазақстан БЭЖ-інің теңгерімдеуші нарығымен жабылмайтын теңгерімсіздікті реттеу үшін Ресей Федерациясының Қазақстан Республикасына берілетін электр энергиясын сатып алу;
4) Қазақстан Республикасының электр желілері арқылы электр энергиясын беру жөніндегі көрсетілетін қызметтерге Қазақстан Республикасының тарифтерді мемлекеттік реттеу саласындағы уәкілетті органы белгілеген, Қазақстан Республикасының өз тұтынушылары үшін электр энергиясын беруге арналған тарифтен аспайтын және электр энергиясын беру жүзеге асырылатын электр беру желілерінің тиісінше техникалық жай-күйін және пайдаланылуын қамтамасыз ететін тариф бойынша ақы төлеу көзделетін қажетті шараларды қабылдайды.
2. Электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін өтеу мақсатында электр энергиясын сатып алуға және сатуға арналған шарттар бойынша және Қазақстан БЭЖ-інің теңгерімдеуші нарығы жаппайтын теңгерімсіздікті реттеу үшін Ресей Федерациясынан Қазақстан Республикасына берілетін электр энергиясын сатып алуға арналған шарттар бойынша электр энергиясының құнын есептеуде пайдаланылатын электр энергиясы мен қуатының сандық және бағалық параметрлері Ресей Федерациясының коммерциялық инфрақұрылым ұйымдарының есептік құжаттарымен расталады. Бұл ретте электр энергиясының құнында Ресей Федерациясының бағаларды (тарифтерді) мемлекеттік реттеу саласындағы уәкілетті органы белгілеген тариф және "Нарық кеңесі КӘ" қауымдастығы байқаушы кеңесінің шешімімен Ресей Федерациясының электр энергиясы мен қуатының көтерме нарығы субъектілері үшін белгіленген баға бойынша Ресей Федерациясының коммерциялық инфрақұрылым ұйымдарының көрсетілетін қызметтерінің құны ескеріледі.
3. Тараптар электр энергиясы ағындарының нақты мемлекетаралық сальдосының жоспардағыдан жол берілетін орташа сағаттық ауытқуының шамасынан асатын ауытқуларды энергия жүйелерінің қалыпты жұмыс режимінен ауытқу ретінде қарайды және осындай ауытқуларды барынша азайтуға бағытталған шараларды қабылдайды. Электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін сатып алу мен сатудың қаржылық нәтижесі Ресей БЭЖ-інің көрсетілген ауытқуларды физикалық тұрғыдан реттегені үшін әділ төлем болып табылады.
4. Тараптардың уәкілетті органдары мемлекетаралық қималардағы қуат ағындары сальдосының жоспардағыдан ауытқуларының технологиялық негізделген орташа сағаттық шамаларын айқындау әдістемесін келіскенге және бекіткенге дейін электр энергиясы ағындарының нақты мемлекетаралық сальдосының жоспардағыдан ауытқуларының жол берілетін орташа сағаттық шамасы 150 МВт-қа (оның ішінде Батыс Қазақстан – Ресей қимасында 30 МВт-қа) тең болып белгіленеді.
5. KEGOC алдындағы міндеттемелерді орындау мақсатында біртұтас ұлттық (бүкілресейлік) электр желісін басқару жөніндегі ұйымның электр энергиясын беру бойынша Интер РАО-ға көрсеткен қызметтерінің көлемі Интер РАО алдындағы KEGOC міндеттемелерін қалыптастыру үшін осы Келісімнің 1-бабының 1-тармағында көзделген қағидалар бойынша айқындалады.
1. Тараптар:
KEGOC пен Россети, БЭЖ ЖО арасындағы қатарлас жұмыс істеу туралы;
KEGOC пен Россети арасындағы Қазақстан Республикасының электр желілері арқылы электр энергиясын беру жөнінде қызметтер көрсету туралы;
KEGOC пен Интер РАО арасындағы Қазақстан Республикасы мен Ресей Федерациясының шекарасы арқылы электр энергиясын беру кезінде туындайтын электр энергиясы ағындарының нақты мемлекетаралық сальдосының жоспардағыдан ауытқуларының сағаттық көлемдерін өтеу үшін электр энергиясын сатып алу және сату туралы;
Қазақстан Республикасы мен Ресей Федерациясының шекарасы арқылы берілетін электр энергиясының мөлшерін сағаттық есептеу және KEGOC пен Россети арасындағы электр энергиясын есепке алудың сағаттық деректерін күн сайын алмасу мен келісуді ұйымдастыру тәртібі туралы шарттарды (келісімшарттарды) бір мезгілде жасасуға Тараптар мемлекеттерінің шаруашылық жүргізуші субъектілеріне жәрдемдеседі.
2. Тараптар консультациялар өткізеді, олардың барысында кейіннен Солтүстік Қазақстан – Ресей және Батыс Қазақстан – Ресей қималарында электр энергиясының нақты ағындарының ауытқуларын бірыңғай қимада есепке алудың орындылығы не орынсыздығы мәселесі бойынша шешім қабылдау үшін техникалық-экономикалық негіздемені де келіседі.
Осы Келісімді орындау жөніндегі қызметті үйлестіруді және оның орындалуын бақылауды Тараптардың мынадай құзыретті органдары жүзеге асырады:
Қазақстан тарапынан – Қазақстан Республикасының Энергетика министрлігі;
Ресей тарапынан – Ресей Федерациясының Энергетика министрлігі.
Көрсетілген құзыретті органдар ауыстырылған жағдайда Тараптар бұл туралы бір-біріне дипломатиялық арналар арқылы дереу хабардар етеді.
Осы Келісімде көзделген өз міндеттемелерін Тараптардың бірінің орындауына кедергілер тудыратын мән-жайлар не осы Келісімнің ережелерін қолдануға және (немесе) түсіндіруге қатысты келіспеушіліктер туындаған жағдайда, Тараптардың құзыретті органдары көрсетілген мән-жайларды не келіспеушіліктерді еңсеру және осы Келісімнің орындалуын қамтамасыз ету бойынша өзара қолайлы шешімдер қабылдау мақсатында консультациялар мен келіссөздер жүргізеді.
Тараптардың құзыретті органдары арасындағы консультациялар мен келіссөздер арқылы шешілмеуі мүмкін келіспеушіліктер Тараптар арасындағы келіссөздер арқылы шешіледі.
Тараптардың өзара келісімі бойынша осы Келісімге оның ажырамас бөлігі болып табылатын өзгерістер енгізілуі мүмкін, олар жеке хаттамалармен ресімделеді.
Осы Келісім белгіленбеген мерзімге жасалады және Тараптардың оның күшіне енуі үшін қажетті мемлекетішілік рәсімдерді орындағаны туралы соңғы жазбаша хабарламаны дипломатиялық арналар арқылы алған күннен бастап күшіне енеді және 2022 жылғы 1 қарашадан бастап туындаған құқықтық қатынастарға қолданылады.
Тараптардың кез келгені екінші Тарапқа дипломатиялық арналар арқылы осы Келісімнің қолданылуын тоқтату ниеті туралы жазбаша хабарламаны оның қолданылуы тоқтатылатын болжамды күнге дейін кемінде 6 ай бұрын, бірақ осы Келісім күшіне енген күннен бастап кемінде 3 жыл өткен соң жіберу арқылы оның қолданылуын тоқтата алады.
Осы Келісімнің қолданылуын тоқтату оның қолданылуы кезеңінде осы Келісім шеңберінде жасалған шарттарда (келісімшарттарда) көзделген міндеттемелердің орындалуын қозғамайды.
Осы Келісім Тараптар мемлекеттерінің заңнамасына қайшы келмейтін бөлігінде оған қол қойылған күннен бастап 15 күн өткен соң уақытша қолданылады. Осы Келісімді уақытша қолдану басталған күннен бастап 2009 жылғы 20 қарашадағы Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасы мен Ресей Федерациясының бірыңғай энергетикалық жүйелерінің қосарлас жұмыс істеуін қамтамасыз ету жөніндегі шаралар туралы келісімді (бұдан әрі – 2009 жылғы 20 қарашадағы келісім) уақытша қолдану тоқтатылады.
2009 жылғы 20 қарашадағы келісімді уақытша қолдануды тоқтату 2009 жылғы 20 қарашадағы келісім шеңберінде жасалған шарттарда (келісімшарттарда) көзделген міндеттемелердің орындалуын қозғамайды.
20__ жылғы "_" _______ _________ қаласында әрқайсысы қазақ және орыс тілдерінде екі данада жасалды, әрі екі мәтіннің де күші бірдей.
|
Қазақстан Республикасының Үкіметі үшін |
Ресей ФедерациясыныңҮкіметі үшін |
