Қазақстан Республикасының Әлеуметтік кодексі 11-бабының 4) тармақшасына сәйкес Қазақстан Республикасының Үкіметі ҚАУЛЫ ЕТЕДІ:
1. "Мемлекеттік әлеуметтiк сақтандыру қоры" акционерлiк қоғамының (бұдан әрi – Қор) қаржылық орнықтылығын қамтамасыз ететiн мынадай нормалар мен лимиттер:
Қор резервiнiң есептi жылдан кейiнгi жылдың 1 қаңтарына есептелетін ең төмен мөлшерi провизия мөлшерiнiң кемiнде он пайызы мөлшерінде. Қор қызметiнiң нәтижесiнде болуы мүмкiн тәуекелдердi жабу үшiн қалыптастырылатын және оның қаржылық орнықтылығын қамтамасыз ететiн Қор резервi Қордың активтерi мен провизиясының айырмасы ретiнде айқындалады;
Қордың Қазақстан Республикасының Ұлттық Банкінде ашылған ағымдағы шотындағы ақшаның ай сайынғы инвестицияланбайтын қалдығының есепті айдан кейінгі айдың басындағы ең төмен мөлшері есепті айдың алдындағы айда Қазақстан Республикасының Әлеуметтік кодексінде көзделген әлеуметтік төлемдер сомасының 0,5 еселенген мөлшерінен кем болмайтын мөлшерде белгіленсін.
Ескерту. 1-тармаққа өзгеріс енгізілді - ҚР Үкіметінің 15.03.2025 № 149 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.2. Қор провизияларды Қордан алушыларға төленетiн болашақ әлеуметтiк төлемдердiң келтiрiлген құны ретiнде актуарийлік есеп-қисаптарды пайдалана отырып, жыл сайын айқындайды.
3. Осы қаулы 2023 жылғы 1 шілдеден бастап қолданысқа енгізіледі.
|
Қазақстан Республикасының Премьер-Министрі |
Ә. Смайылов |
