Әлеуметтiк сала объектiлерiн балансқа қабылдау туралы

Қазақстан Республикасы Премьер-Министрiнiң өкiмi 1996 жылғы 5 желтоқсан N 551-ө

"Банкроттық туралы" Қазақстан Республикасы Президентiнiң Заң күшi бар Жарлығына сәйкес, Атырау облысының "Полипропилен" акционерлiк қоғамының 1996 жылғы 1 шiлдеге 1 млрд. теңгеден астам сомада жинақталып қалған кредиттiк берешегiнiң және бюджет пен бюджеттiк емес қорларға тиесiлi сомаларды бiр жылдан астам уақыт төлемеуiнiң нәтижесiнде:
1. Қазақстан Республикасының Мемлекеттiк мүлiктi басқару жөнiндегi мемлекеттiк комитетiнiң "Полипропилен" акционерлiк қоғамының дәрменсiздiгi және қолданылып жүрген заңдарға сәйкес оны жою үрдiсiн жүргiзу туралы хабарламасы назарға алынсын.
2. Атырау облысының әкiмiне:
1997 жыл iшiнде "Полипропилен" акционерлiк қоғамының балансындағы әлеуметтiк сала объектiлерiн балансқа қабылдау;
1997 жылға арналған облыс бюджетiн қалыптастыру кезiнде осы кәсiпорындардың әлеуметтiк сала объектiлерiн қаржыландыруды ведомстволық қаржыландырудан облыстық бюджетке берiлетiн Әлеуметтiк-экономикалық дамудың 1997 жылға арналған индикативтiк жоспары жөнiндегi әлеуметтiк мекемелер негiзiнде және солардың саны шегiнде, облыстың бюджеттiк ұйымдарының жүйелерiн оңтайландыруды ескере отырып, көздеу;
Қазақстан Республикасының Мемлекеттiк мүлiктi басқару жөнiндегi мемлекеттiк комитетiне және "Полипропилен" акционерлiк қоғамына кәсiпорында ол жойылған жағдайда өндiрiстiк үрдiстердiң үздiксiздiгiн қамтамасыз ету үшiн қажеттi жылу-энергия ресурстарын берiп тұру мөлшерiн сақтау мәселелерiнде ұйымдастыру жәрдемiн көрсету ұсынылсын.

Премьер-Министр