Сақтандыру (қайта сақтандыру) ұйымдарының филиалдары мен өкiлдiктерiн ашуға келiсiм беру және келiсiм беруден бас тарту ережесiн бекiту туралы

Күшін жойған

Қазақстан Республикасы Ұлттық Банкі Басқармасы 2000 жылғы 31 қаңтар N 15. Қазақстан Республикасы Әділет министрлігінің Нормативтік құқықтық актілерді тіркеу басқармасы 2000 жылғы 9 наурызда тіркелді. Тіркеу N 1073. Қаулының күші жойылды - ҚР Қаржы нарығын және қаржы ұйымдарын реттеу мен қадағалау агенттігі Басқармасының 2006 жылғы 9 қаңтардағы N 20 қаулысымен.

Ескерту: Қаулының күші жойылды - ҚР Қаржы нарығын және қаржы ұйымдарын реттеу мен қадағалау агенттігі Басқармасының 2006 жылғы 9 қаңтардағы N 20 қаулысымен .
_____________________________

Сақтандыру заңдарын жетiлдiру мақсатында Қазақстан Республикасы Ұлттық Банкiнiң Басқармасы ҚАУЛЫ ЕТЕДI :
1. Сақтандыру (қайта сақтандыру) ұйымдарының филиалдары мен өкiлдiктерiн ашуға келiсiм беру және келiсiм беруден бас тарту ережесi бекiтiлсiн және Қазақстан Республикасының Әдiлет министрлiгiнде мемлекеттiк тiркеуден өткiзiлген күннен бастап күшiне енгiзiлсiн.
2. Сақтандыруды қадағалау департаментi (Құрманов Ж.Б.):
1) Заң департаментiмен (Шәріпов С.Б.) бiрлесiп осы қаулыны және Сақтандыру (қайта сақтандыру) ұйымдарының филиалдары мен өкiлдiктерiн ашуға келiсiм беру және келiсiм беруден бас тарту ережесiн Қазақстан Республикасының Әдiлет министрлiгiнде мемлекеттiк тiркеуден өткiзу шараларын қарастырсын;
2) Қазақстан Республикасының Әдiлет министрлiгiнде мемлекеттiк тiркеуден өткiзiлген күннен бастап он күндiк мерзiмде осы қаулыны және Ереженi барлық сақтандыру (қайта сақтандыру) ұйымдарына, Қазақстан Республикасының Ұлттық Банкi бөлiмшелерiнiң облыстық филиалдарына және мүдделi бөлiмшелерiне жiберсiн.
3. Осы қаулының орындалуын бақылау Қазақстан Республикасы Ұлттық Банкiнiң Төрағасы Г.А.Марченкоға жүктелсiн.

Ұлттық Банк
Төрағасы

Қазақстан Республикасы
Ұлттық Банкі Басқармасының
2000 жылғы 31 қаңтардағы
N 15 қаулысымен бекітілген

Сақтандыру (қайта сақтандыру) ұйымдарының
филиалдары мен өкiлдiктерiн ашуға келiсiм беру
және келiсiм беруден бас тарту ережесi

Осы Ереже "Сақтандыру қызметi туралы" 2000 жылғы 18 желтоқсандағы N 126-II ҚРЗ Қазақстан Республикасының Заңына , Қазақстан Республикасындағы сақтандыру қызметiн реттейтiн басқа да нормативтiк құқықтық актiлерге сәйкес әзiрленген және сақтандыру қызметiн реттеу және қадағалау жөнiндегi уәкiлеттi мемлекеттiк органға (бұдан әрi - уәкiлеттi мемлекеттiк орган) сақтандыру (қайта сақтандыру) ұйымының филиалы мен өкiлдiгiн (бұдан әрi - сақтандыру ұйымдары) ашуға келiсiм беру және келiсiм беруден бас тарту тәртiбiн айқындайды.
Ескерту: Ереженің кіріспесі жаңа редакцияда жазылды - ҚР Ұлттық Банкі Басқармасының 2001 жылғы 20 сәуірдегі N 107 қаулысымен .

1-тарау. Жалпы ережелер

1. Сақтандыру ұйымының филиалы - заңды тұлға болып саналмайтын, сақтандыру ұйымының тұрған жерінен тыс жерге орналасқан, сақтандыру ұйымының атынан сақтандыру (қайта сақтандыру) операцияларын жүзеге асыратын және сақтандыру ұйымының өзіне берілген өкілеттігі шегінде іс-қимыл жасайтын сақтандыру ұйымының ерекше бөлімшесі.
Сақтандыру ұйымы филиалының балансы сақтандыру ұйымымен бiрге болуы керек.
Сақтандыру ұйымы филиалының электронды почта қабылдауға және жіберуге арналған модеммен жарақтандырылған кемінде бір дербес компьютері болуы керек.
Ескерту: 1-тармақ толықтырылды - ҚР Ұлттық Банкі Басқармасының 2002 жылғы 26 қарашадағы N 470 қаулысымен .

2. Сақтандыру ұйымының өкілдігі - заңды тұлға болып саналмайтын, сақтандыру ұйымының тұрған жерiнен тыс жерге орналасқан, сақтандыру ұйымының мүддесiн қорғайтын және өкiлеттiгiн бiлдiретiн, оның атынан мәмiлелер мен басқа да құқықтық iс-қимыл жасайтын сақтандыру ұйымының ерекше бөлiмшесi.

3. Сақтандыру ұйымдарының филиалдары мен өкiлдіктері Қазақстан Республикасының аумағында және одан тыс жерлерде уәкілетті мемлекеттік органның келiсiмi болғанда ашылады.

4. Уәкiлеттi мемлекеттiк орган сақтандыру ұйымдарының филиалдары мен өкiлдiктерiн ашуға келiсiм беру мәселесiн барлық қажеттi құжаттарды берген күннен бастап бiр ай мерзiмде қарауға тиiс.

5. Сақтандыру ұйымдарының филиалдары мен өкiлдiктерiн ашуға келiсiм беру немесе келісiм беруден бас тарту туралы шешiмдi уәкiлеттi мемлекеттiк орган қабылдайды.

6. Уәкiлеттi мемлекеттiк орган сақтандыру ұйымдарының филиалдары мен өкiлдiктерiн ашуға берiлген келiсiмдердiң есебiн жүргізiп отырады.

7. Сақтандыру ұйымдары мынадай шарттарды орындаған жағдайда, сонымен қатар Қазақстан Республикасынан тыс жерлерде де филиал немесе өкiлдiк ашу келiсiмiн алуға өтiнiш жасай алады:
1) жарғылық капиталдың ең аз мөлшерi (жаңадан құрылған сақтандыру ұйымдары үшiн) немесе меншiктi капиталдың ең аз мөлшерi (жұмыс iстеп тұрған сақтандыру ұйымдары үшiн) болуы;
2) соңғы аяқталған жыл нәтижелері бойынша шығынсыз қызметі;
3) сақтандыру ұйымының өтiнiш бергенге дейінгі соңғы алты ай iшiнде пруденциалдық нормативтердi және басқа да сақталуға тиістi нормалар мен лимиттердi орындауы.
Ескерту: 7-тармақтың 1), 3) тармақшалары жаңа редакцияда жазылды - ҚР Ұлттық Банкі Басқармасының 2001 жылғы 20 сәуірдегі N 107 қаулысымен .

2-тарау. Сақтандыру ұйымының филиалы мен өкілдігін ашуға
келісім беру және келісім беруден бас тарту тәртібі

8. Сақтандыру ұйымының филиал мен өкiлдiк ашуға келiсiм беру туралы өтiнiшiне мынадай құжаттар қоса берiлуге тиiс:
1) өтiнiш берушiнiң құрылтай құжаттарының нотариалды куәландырылған көшiрмелерi;
2) өтiнiш берушi сақтандыру ұйымының уәкiлеттi органының шешімі;
3) филиалдың немесе өкiлдiктiң басшысын және бас бухгалтерiн сайлау (тағайындау) туралы сақтандыру ұйымының уәкiлеттi органының шешiмi;
4) сақтандыру ұйымының уәкiлеттi органы бекiткен және сақтандыру ұйымының мөрiмен куәландырылып, үш данада жасалған, тiгiлген және нөмiрленген түрдегi филиал немесе өкілдiк туралы ереже;
5) сақтандыру ұйымы филиалының басшысының немесе өкiлiнiң атына берiлген, сақтандыру ұйымы филиалының басшысының немесе өкiлiнiң өкiлеттiктерi көрсетiлуге тиiстi нотариалды куәландырылған сенiмхат;
6) уәкiлеттi мемлекеттiк органның филиалдың бiрiншi басшысын және бас бухгалтерiн сайлауға (тағайындауға) келiсiм беру туралы шешiмiнiң көшiрмесi;
7) филиалдың немесе өкілдіктің орналасқан жерін растайтын құжат.
Ескерту: 8-тармақ өзгертілді, толықтырылды - ҚР Ұлттық Банкі Басқармасының 2001 жылғы 20 сәуірдегі N 107 қаулысымен , 2002 жылғы 26 қарашадағы N 470 қаулысымен .

8-1. Қазақстан Республикасының аумағында Қазақстан Республикасының резиденті емес - сақтандыру ұйымының өкілдігін ашуға келісім беру туралы өтінішке осы Ереженің 8-тармағында көзделген құжаттармен қатар Қазақстан Республикасының резиденті емес - сақтандыру ұйымы мемлекетінің тиісті сақтандыруды қадағалау органының Қазақстан Республикасының аумағында өкілдікті ашуға рұқсаты, не тиісті мемлекеттің заңдары бойынша мұндай рұқсат талап етілмейтінін растайтын құжат қоса беріледі.
Қазақстан Республикасының резиденті емес - сақтандыру ұйымы ұсынатын құжаттар Қазақстан Республикасының заңдарымен белгіленген тәртіппен заңдастырылуы тиіс.
Ескерту: 8-1-тармақпен толықтырылды - ҚР Ұлттық Банкі Басқармасының 2002 жылғы 26 қарашадағы N 470 қаулысымен .

9. Осы Ереженiң 8-тармағында көзделген құжаттардан басқа, Қазақстан Республикасынан тыс жерлерде сақтандыру ұйымдарының филиалын немесе өкiлдiгiн ашуға келiсiм беру туралы өтiнiшке қоса сақтандыру ұйымы филиалының немесе өкiлдiгiнiң банктiк есепшоты туралы не қызмет көрсетiлетін банк туралы мәлiметтер берiлуге тиiс.

10. Осы Ереженiң 7, 8, 8-1, 9-тармақтарында көзделген талаптардың бiрiн орындалмаған жағдайда уәкiлеттi мемлекеттiк орган сақтандыру ұйымдарының филиалын немесе өкiлдiгiн ашуға келiсiм беруден бас тартуға құқылы.
Ескерту: 10-тармақ өзгертілді - ҚР Ұлттық Банкі Басқармасының 2002 жылғы 26 қарашадағы N 470 қаулысымен .

11. Уәкiлеттi мемлекеттiк орган филиал немесе өкiлдiк ашуға келiсiм беруден бас тарту туралы шешім қабылдаған күннен бастап он күндік мерзімде сақтандыру ұйымының атқару органына өзiнiң келiсiм беруден бас тарту себебiн көрсете отырып жазбаша хабарлайды.

3-тарау. Филиал немесе өкiлдiк ашуға берiлген
келiсiмдi ресiмдеу тәртiбi

12. Сақтандыру ұйымдарының филиалын немесе өкiлдiгiн ашу туралы ереже мынадай түрде куәландырылады: "Қазақстан Республикасының Қаржы нарығын және қаржы ұйымдарын реттеу мен қадағалау жөніндегі агенттігімен келiсiлген. Қазақстан Республикасының Қаржы нарығын және қаржы ұйымдарын реттеу мен қадағалау жөніндегі агенттігінің Төрағасы (Төрағаның орынбасары)".
Сақтандыру ұйымдарының филиалын немесе өкілдігін ашу туралы ереже уәкілетті мемлекеттік органда келісілгеннен кейін уәкілетті мемлекеттік орган Төрағасының (Төраға орынбасарының) қолы қойылып, уәкілетті мемлекеттік органның мөрімен бекітіледі.
Ескерту: 12-тармаққа өзгертулер енгізілді - ҚР Қаржы нарығын және қаржы ұйымдарын реттеу мен қадағалау жөніндегі агенттігі Басқармасының 2004 жылғы 25 қазандағы N 304 қаулысымен .

13. Уәкілетті мемлекеттік органның келісілген Сақтандыру ұйымдарының филиалын немесе өкілдігін ашу туралы ереженің бір данасы сақтандыру ұйымының заң істеріне тігіледі, ал қалған даналары әдiлет органдарында есептік тіркеуден өту үшін өтініш берушіге қайтарылады.
Ескерту: 13-тармаққа өзгертулер енгізілді - ҚР Ұлттық Банкі Басқармасының 2001 жылғы 20 сәуірдегі N 107 қаулысымен , ҚР Қаржы нарығын және қаржы ұйымдарын реттеу мен қадағалау жөніндегі агенттігі Басқармасының 2004 жылғы 25 қазандағы N 304 қаулысымен .

14. Сақтандыру ұйымы филиалды немесе өкiлдiктi есептiк тiркеуден өткізгеннен кейін екі апта мерзiмде Сақтандыру ұйымдарының филиалын немесе өкiлдiгiн ашу туралы ереженiң бiр данасын филиалдың немесе өкiлдiктiң есептiк тiркеуден өткенi туралы куәлiктiң нотариат куәландырған көшiрмесiмен бiрге уәкiлеттi мемлекеттiк органға беруге мiндеттi.
Ескерту: 14-тармақ өзгертілді - ҚР Ұлттық Банкі Басқармасының 2001 жылғы 20 сәуірдегі N 107 қаулысымен .

4-тарау. Қорытынды ережелер

15. Сақтандыру ұйымы әділет органдарына филиалды немесе өкілдікті тарату туралы мәліметтер бергенге дейін филиалды немесе өкілдікті тарату жөніндегі іс-шараларды аяқтау мерзімі туралы ақпаратты алдын ала уәкілетті мемлекеттік органға беруге міндетті.
Сақтандыру ұйымының филиалды немесе өкілдікті тарату туралы шешімі осы шешім қабылданған күннен бастап бір апталық мерзімде уәкілетті мемлекеттік органға берілуге тиіс.
Ескерту: 15-тармақ жаңа редакцияда жазылды - ҚР Ұлттық Банкі Басқармасының 2001 жылғы 20 сәуірдегі N 107 қаулысымен .

16. Сақтандыру ұйымдарының филиалдары мен өкiлдiктерi Қазақстан Республикасының заңдарына сәйкес жабылды.
Ескерту: 16-тармақ өзгертілді - ҚР Ұлттық Банкі Басқармасының
2001 жылғы 20 сәуірдегі N 107 қаулысымен .

17. Уәкiлеттi мемлекеттiк органның филиал және өкiлдiк ашуға келiсiм беруден бас тарту туралы шешiмi жөнiнде Қазақстан Республикасының заңдарында көзделген тәртiппен сотқа шағымдануға болады.

18. Осы ережемен реттелмеген мәселелер Қазақстан Республикасының заңдарына сәйкес шешiлуге тиiс.

Төраға