Ескерту. Күші жойылды - Павлодар облысы әкімдігінің 2009 жылғы 18 қыркүйектегі N 178/13 қаулысымен.
Қазақстан Республикасының 2001 жылғы 23 қаңтардағы "Қазақстан Республикасындағы жергiлiктi мемлекеттiк басқару туралы" Заңына сәйкес, бiрыңғай табиғатты қорғау саясатын жүзеге асыру және облыстың экология, табиғатты пайдалану және қоршаған ортаны қорғау мәселелерiмен айналысатын мемлекеттiк органдарының, кәсiпорындары мен ұйымдарының, сондай-ақ үкiметтiк емес ұйымдардың қызметiн үйлестiру мақсатында облыс әкiмдiгi ҚАУЛЫ ЕТЕДI:
1. Экология және қоршаған ортаны қорғау жөнiндегi облыстық кеңес (бұдан әрi - Кеңес) құрылсын.
2. Кеңестiң қоса берiлiп отырған Ережесi бекiтiлсiн.
3. Облыс табиғатты қорғау бағдарламалары департаментi Кеңестiң дербес құрамын заңнамамен белгiленген тәртiпте облыстық Мәслихаттың бекiтуiне ұсынсын.
4. Осы қаулының орындалуын бақылау облыс әкiмiнiң орынбасары Ж.Ж. Нұрғалиевке жүктелсiн.
Облыс әкiмi Қ. Нұрпейiсов
Облыс әкiмдiгiнiң
2004 жылғы 22 сәуірдегі
N 113/5 қаулысымен бекiтiлген
Экология және қоршаған ортаны
қорғау жөнiндегi облыстық кеңестiң
ережесi
1. Экология және қоршаған ортаны қорғау жөнiндегi облыстық кеңес (бұдан әрi - Кеңес) қоршаған ортаны жақсарту және экологиялық мәселелердi, табиғатты қорғау бағдарламаларын және жобаларды қарау жөнiндегi консультативтiк-кеңесшi орган болып табылады.
2. Кеңес өз қызметiн Қазақстан Республикасының Конституциясына, Заңдарына, Қазақстан Республикасы Президентi мен Үкiметiнiң актiлерiне, облыс әкiмдiгi мен әкiмiнiң актiлерiне, Қазақстан Республикасының өзге де нормативтiк құқықтық актiлерiне, сондай-ақ осы Ережеге сәйкес жүзеге асырады.
3. Кеңестiң дербес құрамын облыс табиғатты қорғау бағдарламалары департаментi құрастырады және оны облыстық Мәслихат бекiтедi.
4. Кеңес шешiмдерi ұсыныстық сипатта болады.
2. Кеңестiң мақсаты, мiндеттерi мен функциялары
5. Кеңестiң мақсаты аймақтың экологиялық қауiпсiздiгiн және тұрақты дамуын қамтамасыз ету болып табылады.
6. Мыналар:
1) жобалау, құрылыс және зарарсыздандыру жұмыстарын, радиологиялық зерттеулердi орындайтын облыс мемлекеттiк органдарының, кәсiпорындарының, мекемелерiнiң, үкiметтiк емес ұйымдардың және субъектiлердiң меншiк түрiне қарамастан табиғатты қорғау қызметiн үйлестiру;
2) қоршаған ортаны қорғау саласында экологиялық бiлiм мен ағартуды насихаттау жөнiндегi iс-шараларды өткiзу;
3) облыстың экологиялық жағдайын жақсартуға бағытталған табиғатты қорғау iс-шараларын өткiзу жөнiндегi негiзделген ұсыныстарды, ұсынымдарды пысықтау;
4) жобаларды қоғамдық тәуелсiз сараптауларды ұйымдастыру;
5) табиғатты қорғау iс-шараларын жоспарлау және оларды iске асыруды ұйымдастыру мәселелерiн талқылау;
6) қоршаған ортаны қорғау, табиғатты пайдалану, жер, су ресурстары мәселелерi жөнiндегi нормативтiк құқықтық актiлердi әзiрлеуге қатысу және қоршаған ортаны қорғау жөнiндегi бағдарламаларды iске асыру барысын талқылау;
7) облыс әкiмдiгiне және әкiмiне ұсыныстар мен ұсынымдарды тұжырымдау, енгiзу, қоршаған ортаны қорғау мәселелерi жөнiнде облыс әкiмдiгiнiң және әкiмiнiң актiлерiн дайындауға қатысу;
8) Қазақстан Республикасы Президентi мен Үкiметiнiң, облыс әкiмдiгi мен әкiмiнiң қоршаған ортаны қорғау мәселелерi жөнiндегi актiлерiнiң iске асырылуын талқылау;
9) қоршаған ортаны қорғауға арналған қаражатты кешендi пайдалану сұлбаларын келiстiру және бекiту дайындығына қатысу;
10) қоршаған ортаны қорғау жөнiндегi насихатты ұйымдастыруға көмектесу;
11) мемлекеттiң және қоғамның қоршаған ортаны қорғау саласындағы мүдделерiн қорғау;
12) Қазақстан Республикасының қолданылып жүрген заңнамасына сәйкес өзге де өкiлеттiктердi жүзеге асыру Кеңестiң негiзгi мiндеттерi болып табылады.
7. Кеңестiң:
1) облыс әкiмдiгiне және әкiмiне облыстағы экологиялық тұрақтылықты қамтамасыз ету, табиғатты қорғау iс-шараларына арналған қаражатты бөлу және қолдану жөнiндегi ұсыныстар енгiзуге;
2) өз құзыретi шеңберiнде мүдделi мемлекеттiк органдар мен ведомстволардың мамандарын тарта отырып (келiсiм бойынша) облыстағы экология мен қоршаған ортаны қорғау жөнiндегi ұсыныстарды әзiрлеу және енгiзу үшiн экологиялық бағыттағы жұмыс топтарын құруға;
3) Кеңестiң құзыретiне енетiн мәселелердi шешу үшiн ғалымдарды, жоғары бiлiктi мамандарды (келiсiм бойынша) тартуға;
4) заңнамамен белгiленген тәртiпте Кеңес құзыретiне енетiн мәселелер бойынша тиiстi ақпаратты сұратуға және алуға;
5) өз құзыретi шеңберiнде келiсiм бойынша мемлекеттiк органдардың, бұқаралық ақпарат құралдарының, облыстың өзге де ұйымдарының өкiлдерiн (келiсiм бойынша) Кеңестiң құзыретiне енетiн мәселелердi шешуге тартуға;
6) заңнамамен белгiленген тәртiпте Кеңес құрамын өзгерту туралы ұсыныстарды енгiзуге;
7) табиғатты пайдаланушылардың, табиғатты қорғау органдарының ақпаратын (есебiн) тыңдауға құқығы бар.
4. Кеңестiң қызметiн ұйымдастыру
8. Кеңестi облыс әкiмiнiң орынбасары - төраға басқарады. Төраға Кеңестiң жұмысын ұйымдастырады және оның қызметiн басқарады, Кеңеске жүктелген мiндеттердiң орындалуына және оның өз функцияларын жүзеге асыруға дербес жауап бередi, өз құзыретi шеңберiнде Кеңестiң мүшелерiне тапсырмалар мен нұсқаулар бередi.
9. Кеңестiң мәжiлiсi тоқсан сайын өткiзiледi, жұмыс жоспары Кеңес мәжiлiсiнде бекiтiледi.
10. Кеңес жұмысының ұйымдастырылуын қамтамасыз етудi облыс табиғатты қорғау бағдарламалары департаментi жүзеге асырады.
