Ескерту. Бұйрықтың күші жойылды - ҚР Экология, геология және табиғи ресурстар министрінің 09.11.2022 № 688 (алғашқы ресми жарияланған күнінен кейін күнтізбелік алпыс күн өткен соң қолданысқа енгізіледі) бұйрығымен.
РҚАО-ның ескертпесі!
Бұйрық 01.01.2016 ж. бастап қолданысқа енгізіледі
Қазақстан Республикасының 2007 жылғы 9 қаңтардағы Экологиялық кодексінің 285-1-бабы 1-тармағының 1) тармақшасына сәйкес БҰЙЫРАМЫН:
1. Қоса беріліп отырған Қалдықтарды жинаудың, қайта өңдеудің және кәдеге жаратудың меншікті жүйесін қолдану қолдану талаптары бекітілсін.
2. Қазақстан Республикасы Энергетика министрлігінің Қалдықтарды басқару департаменті Қазақстан Республикасының заңнамасында белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрық Қазақстан Республикасының Әділет министрлігінде мемлекеттік тіркелгенінен кейін он күнтізбелік күн ішінде оның көшірмесін мерзімді баспа басылымдарында және "Әділет" ақпараттық-құқықтық жүйесінде ресми жариялауға, сондай-ақ Қазақстан Республикасы нормативтік құқықтық актілернің Эталондық бақылау банкіне енгізу үшін Қазақстан Республикасы Әділет министрлігінің "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына жіберуді;
3) осы бұйрықты Қазақстан Республикасы Энергетика министрлігінің ресми интернет-ресурсында және мемлекеттік органдардың интранет-порталында орналастыруды;
4) осы бұйрықты Қазақстан Республикасының Әділет министрлігінде мемлекеттік тіркегеннен кейін он жұмыс күні ішінде Қазақстан Республикасы Энергетика министрлігінің Заң қызметі департаментіне осы тармақтың 2), 3) және 4) тармақшаларымен көзделген іс-шаралардың орындалуы туралы мәліметтерді беруді қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Энергетика вице-министріне жүктелсін.
4. Осы бұйрық 2016 жылғы 1 қаңтардан бастап қолданысқа енгізіледі және ресми жариялануға тиіс.
Қазақстан Республикасы | |
Энергетика министрі | В. Школьник |
| Қазақстан Республикасы Энергетика министрінің 2015 жылғы 25 желтоқсандағы № 761 бұйрығына қосымша |
Қалдықтарды жинаудың, қайта өңдеудің және кәдеге жаратудың
меншікті жүйесін қолдану талаптары
1. Осы Қалдықтарды жинаудың, қайта өңдеудің және кәдеге жаратудың меншікті жүйесін қолдану талаптары (бұдан әрі – Талаптар) Қазақстан Республикасының 2007 жылғы 9 қаңтардағы Экологиялық кодексінің 285-1-бабы 1-тармағының 1) тармақшасына сәйкес әзірленді және өндірушілердің (импорттаушылардың) кеңейтілген міндеттемелері оған (оларға) таралатын өнімдер (тауарлар) (бұдан әрі – өнімдер (тауарлар)) тұтынушылық қасиеттерінен айырылғаннан кейін түзілетін қалдықтарды және оның (олардың) орамаларын жинау, қайта өңдеу және кәдеге жаратудың меншікті жүйесіне қойылатын талаптарды белгілейді.
2. Қазақстан Республикасының 2007 жылғы 9 қаңтардағы Экологиялық кодексінің 285-1-бабы 1-тармағының 1) тармақшасына сәйкес, осы Талаптар автомобиль көлік құралдарын өндірушілерге және импорттаушыларға қолданылмайды.
3. Қалдықтарды жинаудың, қайта өңдеудің және кәдеге жаратудың меншікті жүйесін қолдану өндірушілердің (импорттаушылардың) кеңейтілген міндеттемелері қолданылатын өнімдер (тауарлар) тізбесіне сәйкес өнімді (тауарды) Қазақстан Республикасының аумағында өндіруді және (немесе) Қазақстан Республикасының аумағына әкелуді жүзеге асыратын жеке және заңды тұлғалардың (бұдан әрі – өндіруші (импорттаушы)) міндеттемелерін орындауын қамтамасыз ету, өнімдердің (тауарлардың) тұтынушылық қасиеттерінен айырылғаннан кейін түзілетін қалдықтарды жинауды, тасымалдауды, қайта өңдеуді, залалсыздандыруды, пайдалануды және (немесе) кәдеге жаратуды қамтамасыз ету болып табылады.
4. Өндіруші (импорттаушы) өткізілген немесе импортталған өнімдердің (тауарлардың) тоқсандық көлемінен кемінде отыз пайызын кәдеге жаратуды қамтамасыз етеді.
5. Қалдықтарды жинаудың, қайта өңдеудің және кәдеге жаратудың меншікті жүйесі өнімдер (тауарлар) тұтынушылық қасиеттерінен айырылғаннан кейін түзілетін қалдықтарды жинау, тасымалдау, қайта өңдеу, залалсыздандыру, пайдалану және (немесе) кәдеге жарату бойынша меншікті инфрақұрылым объектілерін ұйымдастыру жолымен жүзеге асырылады.
6. Қалдықтарды жинаудың, қайта өңдеудің және кәдеге жаратудың меншікті жүйесін қолданған кезде өндіруші (импорттаушы):
1) өнімдер (тауарлар) тұтынушылық қасиеттерінен айырылғаннан кейін түзілетін қалдықтарды қабылдауды қамтамасыз етеді.
Жинау пункттерінде қойма үй-жайлары, залалсыздандыру құралдары болуы тиіс;
2) өнімдер (тауарлар) тұтынушылық қасиеттерінен айырылғаннан кейін түзілетін қалдықтарды одан әрі қайта өңдеу, залалсыздандыру, пайдалану және кәдеге жарату үшін тасымалдауды қамтамасыз етеді.
Тасымалдау кезінде қалдықтардың түрін, мөлшерін, қасиеттерін, тасымалдау мақсаты мен орнын көрсете отырып, оларды есепке алу қамтамасыз етіледі.
3) өнімдерді (тауарларды) пайдаланудан қалдықтарды қайта өңдеуді және кәдеге жаратуды қамтамасыз етеді.
Шикізат ретінде пайдаланылатын қалдықтарды көмуге немесе жоюға жол берілмейді.
Қазақстан Республикасының аумағында олар өндірген (әкелінген) тауарлар (өнімдер) тұтынушылық қасиеттерінен айырылғаннан кейін түзілетін қалдықтарды қайта өңдеу Қазақстан Республикасының аумағында жүзеге асырылады.
4) тауарлар (өнімдер) тұтынушылық қасиеттерінен айырылғаннан кейін түзілетін жиналған, тасымалданған, қайта өңделген, залалсыздандырылған, пайдаланылған және кәдеге жаратылған қалдықтардың (түрі, мөлшері, қасиеттері) тұрақты есебін жүргізуді қамтамасыз етеді.
