"Халық денсаулығы және денсаулық сақтау жүйесі туралы" Қазақстан Республикасының 2020 жылғы 7 шілдедегі Кодексінің 90-бабының 2-тармағына сәйкес БҰЙЫРАМЫН:
1. Қоса беріліп отырған Қазақстан Республикасының азаматтарын алғашқы көмек көрсету дағдыларына оқыту үшін сертификатталған жаттықтырушыларды даярлауды жүзеге асыратын денсаулық сақтау ұйымдарына қойылатын талаптар бекітілсін.
2. Қазақстан Республикасы Денсаулық сақтау министрлігінің Санитариялық-эпидемиологиялық бақылау комитеті Қазақстан Республикасының заңнамасында белгіленген тәртіппен:
1) осы бұйрықты Қазақстан Республикасы Әділет министрлігінде мемлекеттік тіркеуді;
2) осы бұйрық ресми жарияланғаннан кейін оны Қазақстан Республикасы Денсаулық сақтау министрлігінің интернет-ресурсында орналастыруды;
3) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде осы тармақтың 1) және 2) тармақшаларында көзделген іс-шаралардың орындалуы туралы мәліметтерді Қазақстан Республикасы Денсаулық сақтау министрлігінің Заң департаментіне ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Денсаулық сақтау вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасы Денсаулық сақтау министрінің міндетін атқарушы |
М. Шоранов |
| Қазақстан Республикасы Денсаулық сақтау министрінің міндетін атқарушы 2020 жылғы 25 желтоқсандағы № ҚР ДСМ-330/2020 бұйрығына қосымша |
Қазақстан Республикасының азаматтарын алғашқы көмек көрсету дағдыларына оқыту үшін сертификатталған жаттықтырушыларды даярлауды жүзеге асыратын денсаулық сақтау ұйымдарына қойылатын талаптар
1-тарау. Жалпы ережелер
1. Осы Қазақстан Республикасының азаматтарын алғашқы көмек көрсету дағдыларына оқыту үшін сертификатталған жаттықтырушыларды даярлауды жүзеге асыратын денсаулық сақтау ұйымдарына қойылатын талаптар (бұдан әрі – талаптар) "Халық денсаулығы және денсаулық сақтау жүйесі туралы" Қазақстан Республикасының 2020 жылғы 7 шілдедегі Кодексінің (бұдан әрі – Кодекс) 90-бабының 2-тармағына сәйкес әзірленді.
2. Осы талаптарда мынадай анықтамалар пайдаланылады:
1) алғашқы көмек – оқиға орнында зардап шегушінің өзі (өзіне-өзі көмек көрсету) немесе жақын жердегі басқа адам (өзара көмек) медицина қызметкерлері келгенге дейін жүргізетін, шұғыл жағдайлар кезінде адамның өмірін құтқаруға және асқынулардың алдын алуға арналған жедел базалық іс-шаралар кешені;
2) алғашқы көмек бойынша сертификатталған жаттықтырушы – алғашқы көмек пен базалық жүрек-өкпе реанимациясы бойынша қосымша даярлықтан өткен адам;
3) кадрлардың біліктілігін арттыру – бұрын алған кәсіби білімдерін, іскерліктері мен дағдыларын қолдауға, кеңейтуге, тереңдетуге және жетілдіруге мүмкіндік беретін кәсіби білім беру нысаны;
4) практикада оқыту – денсаулық сақтау ұйымдарында жаңа практикалық дағдыларды игеру және қолданыстағыларын жетілдіру;
5) симуляциялық технологиялар – автоматты түрде қайталанатын іс-қимылдарды әзірлеуді, клиникалық және өзге де жағдайларды, оның ішінде нақты жағдайларға барынша жақындатылған кезек күттірмейтін жағдайларды модельдеуге негізделген барабар шешімдерді жедел қабылдауды қамтитын кадрларды оқытудың және дағдыларын бағалаудың қазіргі заманғы технологиялары.
2-тарау. Сертификатталған жаттықтырушыларды даярлауды жүзеге асыратын денсаулық сақтау ұйымдарына қойылатын талаптар
3. Қазақстан Республикасының азаматтарын алғашқы көмек көрсету дағдыларына оқыту үшін сертификатталған жаттықтырушыларды даярлауды меншік нысанына қарамастан, мынадай талаптарға сәйкес келетін денсаулық сақтау ұйымдары (бұдан әрі – тренинг орталығы) жүзеге асырады:
материалдық-техникалық жабдықтауға қойылатын талаптар:
1) меншік құқығында не сенімгерлік басқару, жалға алу (жалдау) туралы шарттар бойынша бір білім алушыға 2,5 шаршы метр нормасы сақталған жағдайда оқу кабинеттерінің болуы;
2) оқу кабинеттері Қазақстан Республикасы Денсаулық сақтау министрінің 2020 жылғы 19 қазандағы № ҚР ДСМ-138/2020 бұйрығмен бекітілген Қазақстан Республикасының азаматтарын алғашқы көмек көрсету дағдыларына оқыту қағидаларын, сондай-ақ алғашқы көмек көрсетілетін шұғыл және кезек күттірмейтін жағдайлар тізбесіне (Нормативтік құқықтық актілерді мемлекеттік тіркеу тізілімінде № 21464 болып тіркелген, Қазақстан Республикасының нормативтік құқықтық актілерінің эталондық бақылау банкінде 2020 жылғы 23 қазанда жарияланған) сәйкес оқу бағдарламаларымен көзделген теориялық және клиникалық даярлықты өткізуді қамтамасыз ететін әр білім алушыға үстелдермен, арқалықтары бар орындықтармен, креслолармен, интернет желісіне қолжетімділігі бар баспа, аудио, бейне-материалдарды көрсетуге арналған компьютер жабдығымен және симуляциялық жабдықтармен жабдықталады;
оқу-әдістемелік қамтамасыз етуге қойылатын талаптар:
1) оқу бағдарламасының болуы;
2) бейінді электрондық дерекқорларға, кітапхана қорларына, оқу-әдістемелік және ғылыми әдебиетке қолжетімділіктің болуы;
3) жаттықтырушыларды даярлау инновациялық технологиялар мен оқытудың интерактивті әдістерін пайдалана отырып жүргізіледі;
4) практикалық сабақтар кемінде 80% көлемінде, оның ішінде симуляциялық технологияларды пайдалана отырып жүргізіледі.
4. Тренинг орталығында жоғары медициналық білімі бар және (немесе) алғашқы көмек көрсету бойынша білім беру бағдарламаларына сәйкес жаттықтырушыларды даярлауды іске асыратын халықаралық ұйымдарда азаматтарды алғашқы көмек көрсету дағдыларына оқыту үшін даярлықтан өткен кемінде екі штаттық қызметкер болуы қажет.
5. Оқыту үшін бірлескен қызмет туралы шарт бойынша талаптардың 4-тармағында көрсетілген талаптарға сәйкес келетін денсаулық сақтау саласындағы білім беру ұйымдарының қызметкерлерін тартуға жол беріледі.
6. Оқыту симуляциялық технологияларды пайдалана отырып, практикалық дағдыларды пысықтай отырып, проекциялық экранда презентациялық материалды көрсету арқылы интерактивті курс түрінде жүргізіледі, оның барысында білім алушылар қажетті теориялық даярлықпен қатар практикада имитациялайды және симуляциялық жабдықты және бір-бірін пайдалана отырып, әртүрлі жағдайлардағы іс-қимыл алгоритмін пысықтайды.
7. Оқыту үлестіру материалын бере отырып, қазақ және (немесе) орыс тілдерінде жүргізіледі.
8. Курс бағдарламасы халықаралық стандарттарға сәйкес келеді және Кодекстің 90-бабының 4-тармағына сәйкес бекітілетін Шұғыл және кезек күттірмейтін жағдайлар тізбесіне сәйкес азаматтарды оқыту әдістемесін және алғашқы көмек көрсетудің практикалық дағдыларын қамтиды.
9. Сертификатталған жаттықтырушыларды даярлау Кодекстің 7-бабының 80) тармақшасына сәйкес бекітілетін қосымша медициналық және фармацевтикалық білім беру бағдарламаларын іске асыратын ұйымдарға қойылатын біліктілік талаптарына сәйкес бағдарламалар бойынша кадрлардың біліктілігін арттыру шеңберінде жүзеге асырылады.
10. Оқытудың міндеті білікті медициналық көмек көрсетілгенге (жедел жәрдем көлігі келгенге) дейін немесе зардап шегуші медициналық ұйымға жеткізілгенге дейін зардап шегушінің өмірін сақтауға бағытталған дағдыларды пысықтау және білімді игеру болып табылады.
11. Алғашқы көмек көрсету дағдыларына:
1) экстремалдық жағдайда тәуекелдерді дұрыс бағалау және шешім қабылдау (жедел жәрдем шақыру, зардап шегушіні қауіпсіз жерге тасымалдау);
2) организмнің өмірлік маңызды функцияларын тексеру және бас және омыртқа жарақаттарын қоса алғанда, зақымданулардың сипатын анықтау;
3) зардап шегушінің өміріне қауіп төндіретін жағдайды анықтау (есін жоғалту, тыныс алуының және жүрек қызметінің тоқтауы, қатты қан кету) және тиісті көмек көрсету;
4) тұрмыста, демалыста, жұмыста, жолда, оқу және спортпен айналысу кезінде зардап шегушінің денсаулығы мен өміріне қауіп төнген жағдайда алғашқы көмекті қолдану кіреді.
12. Тренингтерде алғашқы көмек көрсетудің құқықтық аспектілері зерделенеді.
13. Оқыту аяқталғаннан кейін материалды білуге емтихан өткізіледі және тиісті логотипі мен нөмірі бар бес жыл мерзімге осы талаптарға қосымшаға сәйкес нысан бойынша сертификат беріледі.
Нысан
Біліктілігін арттырғаны туралы сертификат № _____
Осы куәлік __________________________________________________________
(тегі, аты, әкесінің аты (болған кезде))
________________________________________________________ жанында
(оқытқан ұйымның атауы)
20__ жылғы "___"____________ бастап "___" _______________ дейін
______________________________________________ мамандығы бойынша
__________________________________________________ циклі бойынша
_______ сағат көлемінде біліктілігін арттырудан өткенін растайды
_______________________________________________________________
(басшының Т.А.Ә. (болған кезде), қолы)
Мөрдің орны
Берілген күні 20___ жылғы "____" ______________
