ЗҚАИ-ның ескертпесі!
Қолданысқа енгізілу тәртібін 3-тармақтан қараңыз
"Салық және бюджетке төленетін басқа да міндетті төлемдер туралы" Қазақстан Республикасы Кодексінің (Салық кодексі) 686-1-бабы 5-тармағына сәйкес БҰЙЫРАМЫН:
1. Қоса беріліп отырған Уәкілеттік берілген екінші деңгейдегі банктердің, банк операцияларының жекелеген түрлерін жүзеге асыратын ұйымдардың, электрондық алаң операторларының арнаулы мобильді қосымшаға операциялар бойынша мәліметтерді беру мақсаттары үшін мемлекеттік кірістер органдарымен өзара іс-қимыл жасау қағидалары бекітілсін.
2. Қазақстан Республикасы Қаржы министрлігінің Мемлекеттік кірістер комитеті Қазақстан Республикасының заңнамаcында белгіленген тәртіппен:
1) осы бұйрықтың Қазақстан Республикасының Әділет министрлігінде мемлекеттік тіркелуін;
2) осы бұйрықтың Қазақстан Республикасы Қаржы министрлігінің интернет-ресурсында орналастырылуын;
3) осы бұйрық Қазақстан Республикасының Әділет министрлігінде мемлекеттік тіркелгеннен кейін он жұмыс күні ішінде осы тармақтың 1) және 2) тармақшаларында көзделген іс-шаралардың орындалуы туралы мәліметтерді Қазақстан Республикасы Қаржы министрлігінің Заң қызметі департаментіне ұсынуды қамтамасыз етсін.
3. Осы бұйрық 2022 жылғы 1 қаңтардан бастап қолданысқа енгізіледі және ресми жариялауға тиіс.
| Қаржы министрінің міндетін атқарушы | М. Султангазиев |
"КЕЛІСІЛДІ"
Қазақстан Республикасының
Ұлттық Банкі
| Қаржы министрінің міндетін атқарушы 2021 жылғы 30 қазандағы № 1125 бұйрығымен бекітілген |
Уәкілеттік берілген екінші деңгейдегі банктердің, банк операцияларының жекелеген түрлерін жүзеге асыратын ұйымдардың, электрондық алаң операторларының арнаулы мобильді қосымшаға операциялар бойынша мәліметтерді беру мақсаттары үшін мемлекеттік кірістер органдарымен өзара іс-қимыл жасау қағидалары 1-тарау. Жалпы ережелер
1. Осы Уәкілеттік берілген екінші деңгейдегі банктердің, банк операцияларының жекелеген түрлерін жүзеге асыратын ұйымдардың, электрондық алаң операторларының арнаулы мобильді қосымшаға операциялар бойынша мәліметтерді беру мақсаттары үшін мемлекеттік кірістер органдарымен өзара іс-қимыл жасау қағидалары (бұдан әрі – Қағидалар) "Салық және бюджетке төленетін басқа да міндетті төлемдер туралы" Қазақстан Республикасы Кодексінің (Салық кодексі) 686-1-бабының 5-тармағына сәйкес әзірленді және уәкілеттік берілген екінші деңгейдегі банктердің, банк операцияларының жекелеген түрлерін жүзеге асыратын ұйымдардың, электрондық алаң операторларының арнаулы мобильді қосымшаға операциялар бойынша мәліметтерді беру мақсаттары үшін мемлекеттік кірістер органдарымен өзара іс-қимыл жасау тәртібін айқындайды.
2. Ақпараттық өзара іс-қимыл Қазақстан Республикасы Қаржы министрлігінің Мемлекеттік кірістер комитеті (бұдан әрі – Комитет), екінші деңгейдегі банктер, банк операцияларының жекелеген түрлерін жүзеге асыратын ұйымдар (бұдан әрі – Банктер мен ұйымдар) және электрондық алаң операторлары (бұдан әрі – Операторлар) арасында жүзеге асырылады.
3. Осы Қағидалардың шеңберінде арнаулы мобильді қосымшаны пайдаланатын дара кәсіпкерлердің (бұдан әрі – дара кәсіпкерлер) пайдасына банктік шоттарға келіп түскен төлемдер сомалары, сондай-ақ, дара кәсіпкерлердің Операторлардан алған кірістер сомалары туралы ақпараттар арнаулы мобильді қосымшаға операциялар бойынша мәліметтер (бұдан әрі – Мәліметтер) деп танылады.
2-тарау. Уәкілеттік берілген екінші деңгейдегі банктердің, банк операцияларының жекелеген түрлерін жүзеге асыратын ұйымдардың, электрондық алаң операторларының арнаулы мобильді қосымшаға операциялар бойынша мәліметтерді беру мақсаттары үшін мемлекеттік кірістер органдарымен өзара іс-қимыл жасау тәртібі
4. Мәліметтер Банктер мен ұйымдардың ақпараттық жүйелерінен (Банктер мен ұйымдардың АЖ), Операторлардың ақпараттық жүйелерінен (Операторлардың АЖ) дара кәсіпкерлердің келісімі негізінде Комитеттің "Интеграцияланған деректер базасы" ақпараттық жүйесіне (ИДБ АЖ) жіберіледі.
Ақпарат алмасу мынадай ақпараттық жүйелердің көмегімен жүзеге асырылады:
Банктер мен ұйымдардың ақпараттық жүйелері (Банктер мен ұйымдардың АЖ) – ақпарат алмасудың бастамашысы және деректерді жеткізуші;
Операторлардың ақпараттық жүйелері (операторлардың АЖ) – ақпарат алмасудың бастамашысы және деректерді жеткізуші;
"Интеграцияланған деректер базасы" ақпараттық жүйесі (ИДБ АЖ) – ақпарат алушы және ақпарат алмасудың бастамашысы.
5. Банктер мен ұйымдардың АЖ-дан, Операторлардың АЖ-дан ИДБ АЖ-ға мәліметтерді жіберу күн сайын XML-форматта электрондық құжаттар арқылы жүргізіледі.
Банктер мен ұйымдар, Операторлар ИДБ АЖ-ға дара кәсіпкерлердің тізімін ұсыну туралы сұрау салу жібереді.
6. Арнаулы мобильді қосымшаның платформасымен интеграцияланған Банктер мен ұйымдар мынадай сервистерді пайдаланады:
дара кәсіпкер үшін банктік шотын ашу бойынша сервис;
дара кәсіпкердің банктік шотына төлемдерді есептеу туралы деректерді беру бойынша сервис;
арнаулы мобильді қосымшада қолма-қол және қолма-қол ақшасыз операциялар бойынша чектерді қалыптастыру, беру және жою;
салықтар мен әлеуметтік төлемдерді төлеу.
7. Банктер мен ұйымдармен, Операторлармен интеграциялық өзара іс-қимыл болмаған жағдайда:
Комитет Microsoft Excel форматында жеке сәйкестендіру нөмірін көрсете отырып, дара кәсіпкерлердің тізімін қалыптастырады;
Комитет тізімді қалыптастырған күннен бастап күнтізбелік 10 (он) күн ішінде Банктер мен ұйымдарға, Операторларға дара кәсіпкерлердің тізімін қоса бере отырып, Мәліметтерді беру туралы сұрау салу жібереді.
Банктер және ұйымдар, Операторлар Мәліметтер беру туралы сұрау салуды алған күннен бастап, дара кәсіпкерлердің келісімі негізінде 20 (жиырма) жұмыс күні ішінде Комитетке осы Қағидаларға қосымшаға сәйкес нысан бойынша Microsoft Excel немесе CSV-форматында арнаулы мобильді қосымшаны пайдаланатын дара кәсіпкерлердің шоттарына келіп түскен төлемдердің жиынтық сомалары бойынша мәліметтерді электрондық құжат түрінде береді.
Арнаулы мобильді қосымшаны пайдаланатын дара кәсіпкерлердің банктік шоттарына келіп түскен төлемдердің жиынтық сомалары бойынша мәліметтер
|
№ р/с | Ай | Жыл | Дара кәсіпкер | Банк шоттары ашылған банктің (филиалының, құрылымдық бөлімшесінің), деректемелері | Банк шотының түрі | Банк шотының валютасы | Банк шотының нөмірі | Күнтізбелік айда келіп түскен төлемдердің жиынтық сомалары (теңге) | |||
|---|---|---|---|---|---|---|---|---|---|---|---|
| ЖСН | атауы | БСН | БСК | атауы | |||||||
| 1 | 2 | 3 | 4 | 5 | 6 | 7 | 8 | 9 | 10 | 11 | 12 |
_______________________________________________________________________
(нысанды жасауға жауапты адамның тегі, аты, әкесінің аты (болған кезде), қолы)
_______________________________________________________________________
(басшының тегі, аты, әкесінің аты (болған кезде), қолы)
Ескертпе:
аббревиатураларды таратып жазу:
БСК – банктің сәйкестендіру коды;
БСН – бизнес сәйкестендіру нөмірі;
ЖСН – жеке сәйкестендіру нөмірі;
р/с – реттік саны.
