ЗҚАИ-ның ескертпесі!
Осы бұйрықтың қолданысқа енгізілу тәртібін 4-т. қараңыз.
"Лотереялар және лотерея қызметі туралы" Қазақстан Республикасы Заңының 7-бабының 3-1) тармағына сәйкес БҰЙЫРАМЫН:
1. Осы бұйрыққа қосымшаға сәйкес Лотереяларды өткізу қағидалары бекітілсін.
2. Қазақстан Республикасы Мәдениет және спорт министрлігінің Туризм индустриясы комитеті заңнамада белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрық қолданысқа енгізілгеннен кейін үш жұмыс күні ішінде оны Қазақстан Республикасы Мәдениет және спорт министрлігінің интернет-ресурсында орналастыруды;
3) осы тармақпен көзделген іс-шаралардың орындалуы туралы мәліметтерді іс-шараларды орындағаннан кейін үш жұмыс күні ішінде Қазақстан Республикасы Мәдениет және спорт министрлігінің Заң қызметі департаментіне ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Мәдениет және спорт вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік алпыс күн өткен соң қолданысқа енгізіледі.
|
Қазақстан Республикасы Мәдениет және спорт министрі |
А. Оралов |
| Қазақстан Республикасы Мәдениет және спорт министрі 2023 жылғы 8 ақпандағы № 45 бұйрығына қосымша |
Лотереяларды өткізу қағидалары 1-тарау. Жалпы ережелер
1. Осы лотереяларды өткізу қағидалары (бұдан әрі – Қағидалар) "Лотереялар және лотерея қызметі туралы" Қазақстан Республикасы Заңының (бұдан әрі – Заң) 7-бабының 3-1) тармақшасына сәйкес әзірленді және лотереяларды өткізу тәртібін айқындайды.
2. Осы Қағидаларда негізгі ұғымдар пайдаланылады:
1) бас жүлде – тираждың ұтыс ойынын өткізу барысында ойнатылмаған және лотереяны өткізу шарттарына сәйкес бір тираждан келесі тиражға ауысатын тираждық лотереяның жүлде қорының бір бөлігі;
2) жүлде қоры – лотерея билеттерін, түбіртектерді немесе өзге де құжаттарды тарату (өткізу) есебінен не лотерея операторының дербес қаражаты есебінен қалыптастырылатын және лотереяға қатысушыларға ұтыс түрінде төленетін ақша және (немесе) өзге де мүлік;
3) жүлде қорының ұтыс ойыны – лотерея билеттері, түбіртектер немесе өзге де құжаттар таратылғаннан (өткізілгеннен) кейін жүргізілетін және ұтқан лотереяға қатысушыны (қатысушыларды) анықтауға бағытталған процесс;
4) лотерея әмияны – лотерея операторының интернет-ресурсындағы құрал, оның шеңберінде лотеряға қатысушы лотерея билеттеріне, түбіртектерге және өзге де құжаттарға ақы төлеуді жүзеге асыруға және ұтыстар төлемін алады;
5) лотерея – Заңға, лотереяны өткізу талаптарына және шарттарына сәйкес өткізілетін, егер ол лотереяны өткізу шарттарына сәйкес ұтқан деп танылатын болса, бір тарап (лотерея операторы) жүлде қорының ұтыс ойынын өткізетін, ал екінші тарап (лотереяға қатысушы) ұтысқа құқық алатын ойын. Коммерциялық ұйымдардың тауарларды (көрсетілетін қызметтерді) сатуын ынталандыруға бағытталған жүлделердің ұтыс ойыны лотерея болып табылмайды;
6) лотереялық ақпаратты өңдеу орталығы – байланыс желілеріне қосылған және таратылған (өткізілген) лотерея билеттері, түбіртектер немесе өзге де құжаттар, өткізілген лотерея билеттерінен, түбіртектерден немесе өзге де құжаттардан түскен түсім, төленген ұтыстар туралы ақпаратты алуға, сақтауға және есепке алуға және оны лотерея операторынан лотереялық есептілік орталығына беруге арналған аппараттық-бағдарламалық кешен;
7) лотерея билеті, түбіртек немесе өзге де құжат – лотереяны өткізу шарттарында көзделген, лотереяға қатысу құқығын куәландыратын, оның ішінде электрондық нысандағы құжат;
8) лотереялық билеттің электрондық нысаны – лотереяға қатысу құқығын куәландыратын, лотерея операторы мен лотереяға қатысушы арасында шарт жасасуды растайтын, лотереялық ақпаратты өңдеу орталығында орналастырылған, тіркелген лотерея билеті туралы қорғалған ақпаратты қамтитын және лотерея билетін төленген лотереяға қатысушыны сәйкестендіруге мүмкіндік беретін құжат;
9) лотерея жабдығы – ұтыс комбинациясын анықтауға арналған құрылғы немесе құрылғылар (кездейсоқ сандардың генераторы, механикалық, электрлік, электрондық немесе өзге де техникалық құрылғылар);
10) лотерея операторы – лотереяларды жүргізу жөніндегі қызметті жүзеге асыратын, Қазақстан Республикасының Үкіметі айқындайтын заңды тұлға;
11) лотерея комбинациясы – лотереяны өткізу шарттарында көзделген, лотерея билетінде, түбіртекте немесе өзге де құжатта көрсетілген нышандар (жазбалар, сандар, белгілер, суреттер) жиынтығы;
12) лотереяға қатысушы – жүлде қорының ұтыс ойынына қатысу құқығын беретін лотерея билетін, түбіртекті немесе өзге де құжатты иеленген, он сегіз жасқа толған жеке тұлға;
13) лотереяны өткізу – лотерея билеттерін, түбіртектерді немесе өзге де құжаттарды дайындау не оларды дайындауға арналған шарттарды жасасу, сондай-ақ лотереялық жабдықты және лотереяны өткізу үшін қажетті өзге де жабдықты, бағдарламалық өнімдерді дайындаушымен шарттарды және (немесе) лотереяны өткізу үшін қажетті өзге де шарттарды (келісімшарттарды) жасасуды, лотерея билеттерін, түбіртектерді немесе өзге де құжаттарды таратуды (өткізуді) және есепке алуды, жүлде қорының ұтысын ойнатуды, ұтыс шыққан лотерея билеттеріне, түбіртектерге немесе өзге де құжаттарға сараптама жасауды, лотереяға қатысушыларға ұтыстарды төлеуді, лотереяны өткізу үшін қажетті өзге де іс-қимыл мен іс-шараларды жүзеге асыруды қамтитын іс-шараларды жүзеге асыру;
14) лотерея таратушы (агенті) – сыйақы үшін лотерея билеттерін, түбіртектерді немесе өзге де құжаттарды таратуды (өткізуді), ұтыс шыққан лотерея билеттерін, түбіртектерді немесе өзге де құжаттарды тексеруді, сондай-ақ лотерея операторы атынан және есебінен ұтыстар төлеуді жүзеге асыратын дара кәсіпкер немесе заңды тұлға;
15) мезеттік лотерея – ұтыстарды анықтауға мүмкіндік беретін нышандар (жазбалар, сандар, белгілер, суреттер) жиынтығы лотерея билеттеріне, түбіртектерге немесе өзге де құжаттарға дайындау сатысында және олар лотереяға қатысушылар арасында таратылғанға (өткізілгенге) дейін салынатын лотерея түрі. Мезеттік лотереяны өткізу кезінде мұндай лотереяға қатысушы лотерея билеті, түбіртек немесе өзге де құжат ақысы төленгеннен кейін және лотерея билеті, түбіртек немесе өзге де құжат берілгеннен (ресімделгеннен) кейін тікелей өз ұтысының бар екенін және мөлшерін немесе оның жоқ екенін анықтайды;
16) тираж – лотереяны өткізу шарттарына сәйкес жүлде қорының (жүлде қорының бір бөлігінің) ұтыс ойынына қатысатын таратылған (өткізілген) лотерея билеттерінің, түбіртектердің немесе өзге де құжаттардың саны;
17) тираждық лотерея – лотереяға қатысушылар арасында жүлде қорының ұтыс ойыны лотерея жабдығын пайдалану арқылы лотерея билеттері, түбіртектер немесе өзге де құжаттар таратылғаннан (өткізілгеннен) кейін бір мезгілде өткізілетін лотерея түрі;
18) ұтыс – лотерея операторы лотереяны өткізу шарттарына сәйкес жеңімпаз деп танылған лотереяға қатысушыға лотереяны өткізу шарттарына сәйкес мөлшермен және нысанда (ақшамен немесе заттай) төлейтін жүлде қорының бір бөлігі;
3. Лотереяны өткізуді лотерея операторы жүзеге асырады.
2 тарау. Лотереяны өткізу тәртібі
4. Мезеттік лотереяны өткізу кезінде лотереяға қатысушы тиісті ойынды таңдау арқылы өзі қатысатын лотерея операторы белгілеген бағалар бойынша лотерея ойынын өз бетінше таңдайды.
Лотереяға қатысушы ұтысты бірден анықтауға мүмкіндік беретін символдар (жазулар, сандар, белгілер, суреттер) жиынтығы салынған лотерея билетін, түбіртекті немесе өзге де құжатты таңдайды.
5. Тираждық лотереяны өткізу:
1) лотерея операторының интернет-ресурсы арқылы лотереяға қатысушыларды лотереяға қатысу қағидалары мен шарттары туралы хабардар ету;
2) лотереялық ақпаратты өңдеу орталығында лотерея тиражының әрбір ұтыс ойыны бойынша қатысушы лотерея комбинациялары туралы ақпарат жинау;
3) лотереяға қатысушыға ұялы байланыс операторының желілері бойынша ұялы телефонға лотерея комбинациясын қабылдау және лотерея билетін, түбіртекті немесе өзге де құжатты тіркеу туралы ақпараттық хабарлама жіберу;
4) лотереяға қатысушы лотерея комбинациясын өз бетінше таңдау жолымен жүзеге асырылады.
Ұтыс лотерея комбинацияларының нөмірлері кездейсоқ сандарды құру арқылы лотерея жабдығын пайдалану арқылы қалыптасады.
6. Лотерея билетін электрондық нысанда дайындау лотереялық ақпаратты өңдеу орталығында жүзеге асырылады.
7. Лотерея билеттерінің, түбіртектердің немесе өзге де құжаттардың электрондық нысанында Заңның 12-бабы 1-1-тармағында көрсетілген ақпаратты қамтиды.
8. Электрондық лотереяны өткізу:
1) электрондық лотереяға қатысу үшін лотереяға қатысушы лотерея операторының интернет-ресурсында тіркеуден өту;
2) тіркелгеннен кейін лотереяға қатысушыға ұялы байланыс операторының желілері бойынша лотерея әмиянға кіру үшін құпия коды бар ұялы телефонға қысқа мәтіндік хабарлама жіберу;
3) лотерея операторының лотереялық ақпаратты өңдеу орталығы арқылы электрондық лотерея ұтыс ойыны жолымен жүзеге асырылады.
9. Ұтқан қатысушыға ұтысты төлеу осы Қағидалардың 43 және 44-тармақтарына сәйкес жүзеге асырылады
3-тарау. Лотерея билеттерін, түбіртектерді немесе өзге де құжаттарды дайындау тәртібі
10. Лотерея операторы мынадай түрдегі лотерея билеттерді, түбіртектерді немесе өзге де құжаттарды дайындауды жүзеге асырады:
1) қағаз жеткізгіштегі лотерея билеті, түбіртек немесе өзге де құжат;
2) лотерея билетінің, түбіртектің немесе өзге де құжаттардың электрондық нысаны.
11. Электрондық нысанын қоспағанда, лотерея билеттері, түбіртектер немесе өзге де құжаттар Заңның 12-бабы 1-тармағында көрсетілген ақпаратты қамтиды.
12. Қағаз жеткізгіштегі лотерея билеттерінің, түбіртектердің немесе өзге де құжаттардың алдыңғы және артқы жақтары болады.
13. Лотерея билетінің, түбіртектің немесе өзге де құжаттың артқы жағында лотерея өткізу шарттары, сондай-ақ айырым белгілері бар: сериялық нөмір, реттік нөмір, айнымалы жарамдығы бар штрих кодтар, айнымалы ЕАN штрих-коды.
14. Лотерея операторының логотипі және осы Қағидалардың 11-тармағында көрсетілген ақпарат флексографиялық басып шығару әдістерін пайдалана отырып, қағаз картасына сиямен жазылады.
15. Қағаз тасығыштағы лотерея билеті, түбіртек немесе өзге де құжаттар картонды және ультракүлгін және су жабыны бар сияның комбинациясын пайдалана отырып дайындалады.
16. Ұтыс лотереясы үшін қағаз тасығыштағы лотерея билеттері, түбіртектер немесе өзге де құжаттар термопринтердің техникалық сипаттамаларына сәйкес дайындалады.
17. Лотерея билеттерінде, түбіртектерде немесе өзге де құжаттарда қамтылған ақпарат қазақ және орыс тілдерінде ресімделеді.
18. Қағаз жеткізгіштердегі лотерея билетінің, түбіртектің немесе өзге де құжаттың сыртқы дизайнын лотерея операторы өз бетінше әзірлейді.
19. Бір лотерея билеті, түбіртек немесе өзге де құжат лотереяға қатысу үшін бір рет қолданылатын құжат болып табылады.
4-тарау. Лотерея билеттерін, түбіртектерді немесе өзге де құжаттарды тарату (өткізу) және есепке алу тәртібі
20. Лотерея билеттерді, түбіртектерді немесе өзге де құжаттарды тарату (өткізу) лотерея операторының интернет-ресурсында, сондай-ақ лотерея операторымен жасалған азаматтық құқықтық шарт негізінде таратушылармен (агенттермен) жүзеге асырылады.
21. Ұтыс ойынын өткізу кезінде жүлде қорының ұтыс ойынына қатысатын лотерея билеттерін, түбіртектерді немесе өзге де құжаттарды тарату (өткізу) тоқтатылады.
22. Лотерея билеттерді, түбіртектерді немесе өзге де құжаттарды есепке алу лотерея операторының лотереялық ақпаратты өңдеу орталығында жүргізіледі.
5-тарау. Жүлде қорын ұтысқа салу тәртібі
23. Жүлде қорының ұтыс ойынын өткізу Заңға және лотереяны өткізу шарттарына сәйкес жүзеге асырылады.
24. Лотерея операторы өткізілген нақты лотереяның лотерея билеттерінен, түбіртектерден немесе өзге де құжаттарынан түскен түсімнің кемінде елу пайызы мөлшерінде не өз қаражаты есебінен жүлде қорын қалыптастыруды қамтамасыз етеді.
25. Лотереяның жүлде қорының ұтыс ойыны тираж өткізу сәтінде лотереяның барлық қатысушылары арасында бір мезгілде өткізіледі.
26. Лотереяның жүлде қорының ұтыс ойыны ұтыстың болуын анықтауға негізделген:
1) кездейсоқ сандарды құру (лотерея жабдықтарын пайдаланумен);
2) ұтысты анықтауға мүмкіндік беретін символдар (жазулар, сандар, белгілер, суреттер) жиынтығы салынған лотерея билетін таңдау.
27. Мезеттік лотереяның жүлде қорының ұтыс ойыны лотерея өткізілген сәтте ұтыс билетінің, түбіртектің немесе өзге құжаттың болуын анықтау тәсілімен айқындалады.
28. Тираждық лотереяның жүлде қорының ұтыс ойыны ұтыс билетінің, түбіртектің немесе өзге де құжаттың болуын анықтау тәсілімен лотерея комбинацияларындағы сандарды ұтыс лотерея комбинацияларының нөмірлерімен сәйкестендіру тәсілімен айқындалады.
29. Лотереяның жүлде қорының ұтыс ойыны тираж өткізу сәтінде лотереяның барлық қатысушылары арасында бір мезгілде өткізіледі.
30. Ұтыс ойынының нәтижелері туралы хабарлау лотереяға қатысушыға ұялы байланыс операторының желілері бойынша қысқа мәтіндік хабарлама арқылы ұялы телефонға жіберіледі.
31. Тираждық лотереяның жүлде қоры өткізу шарттарында бірнеше тираж (суперприз) ішінде жүлде қорын жинақтаушы қалыптастыру қағидатын пайдаланатын тираждық лотереяны қоспағанда, ол өзіне жататын тираж шеңберінде толығымен ойналады.
32. Егер тираж (тираждар) бойынша төлемдердің мөлшері онда (оларда) қалыптастырылған жүлде қорының мөлшерінен асып кетсе, бас жүлденің қаражаты тираж (тираждар) бойынша ұтыстарды төлеу үшін пайдаланылады.
33. Белгілі бір тираждық лотереяны өткізу тоқтатылған кезде оның жүлде қоры белгілі бір лотерея тиражы тоқтатылған күнге бас жүлдені қоса алғанда, толық ойналады.
6-тарау. Ұтыс лотерея билеттеріне, түбіртектерге немесе өзге де құжаттарға сараптама жүргізу тәртібі
34. Ұтыс шыққан лотерея билеттеріне, түбіртектерге немесе өзге де құжаттарға сараптама жасауды лотерея операторы лотерея билетін, түбіртекті немесе өзге де құжатты ұтып алу мөлшері айлық есептік көрсеткіштің 6 еселенген мөлшерінен асып кеткен жағдайда жүргізеді.
35. Лотереяға қатысушының лотерея билетін, түбіртекті немесе өзге де құжатты лотерея операторына сараптама жүргізу үшін ұсыну мерзімі лотереяға қатысушы қатысқан тираж аяқталған күннен бастап 6 (алты) айды құрайды.
36. Лотерея операторы ұтыстың лотерея билеттеріне, түбіртектерге немесе өзге де құжаттарға тұтастық және бұрмалау белгілерінің болмауы тұрғысынан сараптама жүргізеді, атап айтқанда:
1) ойын алаңдары (өшірілетін жабындар, лотерея билетінің өшірілетін алаңдарына әсер ету нысандары);
2) тазалау;
3) сурет салу;
4) бөліну;
5) сыну;
6) жылу іздері.
Бұрмалау фактісін, ұтыстың лотерея билетін, түбіртекті немесе өзге де құжатты анықтау қиын болған кезде лотерея операторы тәуелсіз сарапшыны тартады.
37. Лотерея билетіне, түбіртекке немесе өзге құжатқа сараптама жүргізу мерзімі лотерея операторына сараптамаға лотерея билеті келіп түскеннен кейін 2 (екі) жұмыс күнін құрайды.
Тәуелсіз сарапшы тартылған жағдайда, сараптама мерзімі лотерея билеті, түбіртек және сараптамаға өзге құжат лотерея операторына келіп түскеннен кейін 30 (отыз) жұмыс күнінен аспайды.
Лотерея билетінің, түбіртектің және өзге құжаттың лотерея операторына сараптамаға келіп түскен сәті оны лотереяға қатысушының лотерея операторына беруі болып табылады.
7-тарау. Лотереяға қатысушыларға ұтыстарды төлеу тәртібі
38. Әрбір жеке өткізілген лотерея шарттарына сәйкес лотерея билеттерді, түбіртектерді немесе өзге де құжаттардың ұтыстарын лотерея операторы немесе таратушы (агент) төлейді.
39. Ұтқан қатысушы лотерея операторына:
1) жеке басын куәландыратын құжатты;
2) ұтыс лотерея билетін, түбіртекті немесе өзге де құжаттарды ұсынады.
40. Ұтыстарды төлеу Қазақстан Республикасының ұлттық валютасында қолма-қол (немесе) қолма-қол ақшасыз есеп айырысу арқылы жүзеге асырылады.
41. Ұтыстарды талап ету мерзімі лотереяға қатысушы қатысқан таралым нәтижелері жарияланған сәттен бастап 6 (алты) айды құрайды.
42. Лотерея өткізу шарттарында белгіленген мерзімде талап етілмеген ұтыстарды лотерея операторы нәтижелер жарияланған сәттен бастап 3 (үш) жыл бойы сақтайды, содан кейін мемлекет бюджетінің кірісіне салықтық емес төлем түрінде есептеледі.
43. Ұтқан қатысушыға айлық есептік көрсеткіштің 6 еселенген мөлшеріне дейін ұтысты төлеу банк карталарына немесе билеттерді сату нүктелерінде немесе Қазақстан Республикасының аумағында тіркелген басқа төлем жүйесіне қолма-қол төлеммен жүргізіледі.
44. Ұтқан қатысушы айлық есептік көрсеткіштің 6 еселенген мөлшерінен жоғары ұтысты алу үшін лотерея операторына жүгінеді.
45. Айлық есептік көрсеткіштің мөлшерін айқындау күні ұтысты лотереяға қатысушыға төлеу сәтінде белгіленеді.
46. Айлық есептік көрсеткіштің 6 еселенген мөлшерінен жоғары ұтысқа төлем көзінен алынатын жеке табыс салығы салынады.
47. Лотерея операторы лотереялық ақпаратты өңдеу орталығы арқылы ақпаратты қабылдау, есепке алу, сақтау және беру кезінде Қазақстан Республикасының дербес деректерді қорғау және таратпау, коммерциялық, салықтық және Қазақстан Республикасының заңдарымен қорғалатын өзге де құпияны жария етпеу жөніндегі заңнамасын, сондай-ақ Қазақстан Республикасының қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл туралы заңнамасын сақтауды қамтамасыз етеді.
