1. Вашингтонда 2007 жылғы 13 желтоқсанда қол қойылған Қазақстан Республикасы мен Америка Құрама Штаттарының арасындағы континентаралық баллистикалық ракеталардың шахталық ұшыру қондырғыларын, апатты жағдайлардың салдарын жоюға және ядролық қарудың таралуына жол бермеуге қатысты келісімге Түзету ратификациялансын.
2. Осы Заңның 1993 жылғы 13 желтоқсаннан бастап туындаған құқықтық қатынастарға кері күші бар.
Қазақстан Республикасының
Президенті Н. Назарбаев
Қазақстан Республикасы мен Америка Құрама Штаттарының арасындағы континентаралық баллистикалық ракеталардың шахталық ұшыру қондырғыларын, апатты жағдайлардың салдарын жоюға және ядролық қарудың таралуына жол бермеуге қатысты
Келісімге түзету
(2009 жылғы 16 маусымда күшіне енді - Қазақстан Республикасының
халықаралық шарттары бюллетені, 2014 ж., № 6, 55-құжат)
Төменде Тараптар деп аталатын Қазақстан Республикасы мен Америка Құрама Штаттары төмендегілер жайында келісті:
1993 жылғы 13 желтоқсанда қол қойылып, іс-әрекеті 2000 жылғы 5 желтоқсанда жалғастырылған Қазақстан Республикасы мен Америка Құрама Штаттарының арасындағы континентаралық баллистикалық ракеталардың шахталық ұшыру қондырғыларын, апатты жағдайлардың салдарын жоюға және ядролық қарудың таралуына жол бермеуге қатысты Келісімнің (бұдан әрі - Келісім) XIV бабына сәйкес Тараптар Келісімнің қолданыс мерзімін ұзартуға және оған төмендегідей өзгерістер енгізуге келіседі:
1. Келісімнің тақырыбындағы "ядролық қарудың" деген сөздер "жаппай қырып жоятын қарудың" деген сөздермен ауыстырылсын;
2. Кіріспенің үшінші абзацындағы және І-баптың ә. тармағындағы "Қазақстан Республикасынан ядролық қарудың" деген сөздер "Ядролық, биологиялық, химиялық және радиологиялық қаруды қоса алғанда, жаппай қырып жоятын қарудың" деген сөздермен ауыстырылсын;
3. І-баптың бірінші абзацындағы "ядролық қаруды жоюға және ядролық қарудың таралуына жол бермеуге байланысты әр түрлі мақсаттарға жәрдемдеседі, сонымен бірге:" деген сөздер "жаппай қырып жоятын қарудың және оған байланысты материалдардың, технологиялар мен білімдерді қоса алғанда, бірақ шектеусіз жоюына және таралуына жол бермеуге байланысты әр түрлі мақсаттарға жәрдемдеседі:" деген сөздермен ауыстырылсын;
4. І-баптың в. тармағындағы "Қазақстан Республикасында тұрған стратегиялық шабуыл қаруларын жоюға" деген сөздер "Жаппай қырып жоятын қарудың және оған байланысты материалдардың, технологиялар мен білімдердің таралуына жол бермеуге" деген сөздермен ауыстырылсын;
5. XII баптың 1-тармағы мынадай мазмұндағы сөйлеммен толықтырылсын: "Мұндай босатулардың тәртібін Қазақстан Республикасының Үкіметі айқындайды."; және
6. XIV бап мынадай редакцияда жазылсын: "Осы Келісім оған қол қойылған күннен бастап күшіне енеді және жеті жыл бойы күшінде болады. Егер Тараптардың бір де біреуі екінші Тарапты тиісті жеті жылдық кезең аяқталғанға дейін алты айдан кешіктірмей оның қолданысын ұзартпау туралы өзінің тілегін жазбаша нысанда хабардар етпесе ол кейінгі жеті жылдық кезеңге өзінен-өзі ұзартылады. Осы Келісім өзінің қолданысын осындай хабарды алғаннан кейін үш айдан соң тоқтатады. Осы Келісімге Тараптардың келісімі бойынша түзетулер енгізілуі мүмкін. Егер Тараптар өзгеше келіспесе ғана осы Келісімнің немесе атқарушы келісімдердің қолданысын тоқтатуына байланыссыз, осы Келісімнің VI және VII баптарына сәйкес Қазақстан Республикасының міндеттемесі уақытша шеңберлерге қарамастан күшінде болуын жалғастырады.".
Осы Түзету қол қойылған күнінен бастап уақытша қолданылады, Америка Құрама Штаттарының Үкіметі Қазақстан Республикасының Үкіметінен оның күшіне енуі үшін қажетті мемлекетішілік рәсімдерді орындағаны туралы жазбаша хабарлама алған күннен бастап күшіне енеді және Келісім күшіне енген сәттен бастап қолданылады.
Қойылған қолды куәландырып, төменде қол қойғандар, оған тиісті түрде өздерінің тиісті Үкіметтерінен уәкілеттік алғандар осы Түзетуге қол қойды.
Вашингтон қаласында 2007 жылғы 13 желтоқсанда әрқайсысы қазақ және ағылшын тілдерінде екі данада жасалды. Осы Түзетудің ережелерін түсіндіруде келіспеушіліктер туындаған жағдайда Тараптар ағылшын тіліндегі мәтінге жүгінеді.
ҚАЗАҚСТАН РЕСПУБЛИКАСЫ АМЕРИКА ҚҰРАМА ШТАТТАРЫ
ҮШІН ҮШІН
2007 жылғы 13 желтоқсанда Вашингтонда жасалған Қазақстан Республикасы мен Америка Құрама Штаттарының арасындағы континентаралық баллистикалық ракеталардың шахталық ұшыру қондырғыларын, апатты жағдайлардың салдарын жоюға және ядролық қарудың таралуына жол бермеуге қатысты Келісімге түзетулердің бұл көшірмесінің дәлдігін куәландырамын.
Қазақстан Республикасы
Сыртқы істер министрлігі
Халықаралық-құқық департаментінің
Басқарма бастығы Б. Пискорский
