Ескерту. Күші жойылды - ҚР Үкіметінің 19.11.2015 № 925 (алғашқы ресми жарияланған күнінен бастап қолданысқа енгізіледі) қаулысымен.
Қазақстан Республикасы Қылмыстық-атқару кодексінің 19-1-бабына сәйкес Қазақстан Республикасының Үкiметi ҚАУЛЫ ЕТЕДI:
1. Қоса беріліп отырған Облыстық (республикалық маңызы бар қаланың, астананың) қоғамдық байқау комиссияларын құру ережесi бекiтiлсiн.
2. Осы қаулы қол қойылған күнiнен бастап қолданысқа енгiзiледi және жариялануға тиiс.
Қазақстан Республикасының
Премьер-Министрі
Қазақстан Республикасы
Үкіметінің
2005 жылғы 16 қыркүйектегі
N 924 қаулысымен
бекітiлген
Облыстық (республикалық маңызы бap қаланың, астананың)
қоғамдық байқау комиссияларын құру ережесi
Осы Ереже Қазақстан Республикасының Қылмыстық-атқару кодексiне сәйкес әзiрлендi және облыстық (республикалық маңызы бар қаланың, астананың) қоғамдық байқау комиссияларын құру тәртiбiн айқындайды.
Ескерту. Кіріспе жаңа редакцияда - ҚР Үкіметінің 2011.11.09 № 1313 Қаулысымен.
1. Жалпы ережелер
1. Қоғамдық байқау комиссиясы (бұдан әрi - Комиссия) түзеу мекемелерi мен тергеу изоляторларында ұсталатын адамдардың Қазақстан Республикасының заңнамасында , жалпы танылған қағидаттарда және халықаралық құқық нормаларында , Қазақстан Республикасы бекiткен халықаралық шарттарда көзделген құқықтары мен заңды мүдделерiн қамтамасыз ету мақсатында қоғамдық бақылауды жүзеге асыру үшін құрылады.
2. Комиссия өз қызметiн Қазақстан Республикасының заңнамасына және осы Ережеге сәйкес жүзеге асырады.
3. Комиссия еріктілік, тең құқылық, өзін-өзi басқару және заңдылық негiзінде әрекет етедi.
4. Қоғамдық бақылауды жүзеге асыру кезiнде түзеу мекемелерi мен тергеу изоляторларының қызметiне, сондай-ақ жедел-іздестiру, қылмыстық iс жүргізу қызметіне және әкiмшiлiк құқық бұзушылық туралы iстер бойынша iс жүргiзуге араласуға жол берiлмейдi.
5. Комиссияның өкiлеттiгі Қазақстан Республикасының қылмыстық-атқару заңнамасымен айқындалады.
2. Комиссияны құру тәртібi
6. Комиссиялар түзеу мекемелерi мен тергеу изоляторларында ұсталатын адамдарға медициналық-санитарлық қамтамасыз етудi ұстау шарттары, еңбектi, демалыс пен оқуды ұйымдастыру бөлiгiнде олардың құқықтары мен заңды мүдделерiн жүзеге асыруда жәрдем көрсету мақсатында қоғамдық бақылауды жүзеге асыруға және түзеу мекемелерi мен тергеу изоляторларының әкiмшiлігiне түзеу мекемелерi мен тергеу изоляторларында ұсталатын адамдардың құқықтарын, бостандықтары мен заңды мүдделерін қамтамасыз ету үшiн жағдай жасау мақсатында жәрдем көрсетуге ниет бiлдiрген қоғамдық бiрлестiктiң, қоғамдық бiрлестіктер одақтарының (қауымдастықтарының) бастамасы бойынша құрылады. Комиссиялар заңды тұлғалар болып табылмайды.
7. Облыс (республикалық маңызы бар қала, астана) аумағында бiр ғана облыстық (республикалық маңызы бар қаланың, астананың) Комиссия құрылады және әрекет етедi. Оның жұмысына қатысуға ниет бiлдiрген басқа қоғамдық бiрлестіктердiң құқықтарын қамтамасыз ету мақсатында бастамашылар бұқаралық ақпарат құралдары арқылы және өзге де тәсiлдермен басқа қоғамдық бiрлестіктерге Комиссияның құрылуы туралы ақпарат бередi және оның жұмысына қатысуға ұсыныс жасайды.
8. Комиссия 3-тен 9 адамға дейiнгі құрамда құрылады. Комиссияны Комиссия мүшелерiнің көпшiлiк дауысымен сайланатын төраға басқарады, ол жұмысты жоспарлайды, Комиссия қызметіне басшылықты және бақылауды жүзеге асырады.
9. Мынадай азаматтар Комиссия мүшелерi бола алмайды:
1) өтелмеген немесе алынбаған сотталғандығы бар;
2) қылмыс жасауда күдіктi немесе айыпталушы;
3) түзеу мекемелерi мен тергеу изоляторларында ұсталатын адамдардың жұбайы немесе зайыбы, жақын туыстары;
4) құқық қорғау органдарының қызметкерлерi;
5) сот әрекет етуге қабiлетсiз деп таныған адамдар.
10. Комиссия мүшесiнiң өкiлеттiгi осы Ереженiң 9-тармағында көзделген жағдайлар орын алған кезде, сондай-ақ мына кезде тоқтатылады:
1) Комиссия мүшесi өз өкілеттігін тапсыру туралы жазбаша өтiнiш берген;
2) Комиссия мүшесi қайтыс болған немесе оны қайтыс болды деп жариялау туралы сот шешімi заңды күшіне енген;
3) Комиссия мүшесiнiң кандидатурасын ұсынған қоғамдық бiрлестiк шешiм шығарған;
4) Комиссия мүшесiнің кандидатурасын ұсынған қоғамдық бiрлестiк таратылған;
5) Комиссия шешiм шығарған.
Көрсетiлген жағдайлар орын алған кезде Комиссия мүшесi немесе Комиссия төрағасы қылмыстық-атқару жүйесінің аумақтық органына хабарлайды.
11. Қылмыстық-атқару жүйесiнің аумақтық органына Комиссияның дербес құрамы бекітілген және оның төрағасы сайланған бiрiншi отырысының хаттамасын ұсынуы Комиссия қызметiнiң басталуы болып табылады.
