Қазақстан Республикасының Yкiметi мен Ресей Федерациясының Yкiметi арасындағы Қазақстан-ресей мемлекеттiк шекарасында бiрлескен өткiзу пункттерiн салу туралы келiсiмге қол қою туралы

Қазақстан Республикасы Үкіметінің 2006 жылғы 28 қыркүйектегі N 937 Қаулысы

Қазақстан Республикасының Үкiметi ҚАУЛЫ ЕТЕДI:
1. Қоса берiлiп отырған Қазақстан Республикасының Үкiметi мен Ресей Федерациясының Үкiметi арасындағы Қазақстан-ресей мемлекеттiк шекарасында бiрлескен өткiзу пункттерiн салу туралы келiсiмнiң жобасы мақұлдансын.

2. Қазақстан Республикасының Қаржы министрi Наталья Артемовна Коржоваға оған қағидаттық сипаты жоқ өзгерiстер мен толықтырулар енгiзуге рұқсат бере отырып, Қазақстан Республикасы Үкiметiнiң атынан Қазақстан Республикасының Үкiметi мен Ресей Федерациясының Үкiметi арасындағы Қазақстан-ресей мемлекеттiк шекарасында бiрлескен өткiзу пункттерiн салу туралы келiсiмге қол қоюға өкiлеттiк берiлсiн.

3. "Қазақстан Республикасының Үкiметi мен Ресей Федерациясының Үкiметi арасындағы Қазақстан-ресей мемлекеттiк шекарасында бiрлескен өткiзу пункттерiн салу туралы келiсiм жасасу туралы" Қазақстан Республикасы Yкiметiнiң 2005 жылғы 1 маусымдағы N 543 қаулысының күшi жойылды деп танылсын.

4. Осы қаулы қол қойылған күнінен бастап қолданысқа енгiзiледi.

Қазақстан Республикасының
Премьер-Министрі

Жоба

Қазақстан Республикасы
Үкiметiнiң
2006 жылғы 28 қыркүйектегі
N 937 қаулысымен
мақұлданған

Қазақстан Республикасының Yкiметi мен Ресей Федерациясының
Yкiметi арасындағы Қазақстан-ресей мемлекеттiк шекарасында
бiрлескен өткiзу пункттерiн салу туралы
келiсiм

Бұдан әрi Тараптар деп аталатын Қазақстан Республикасының Үкiметi мен Ресей Федерациясының Үкiметi,
екi мемлекет арасындағы қазiргi достық байланыстарды негiзге ала отырып,
1998 жылғы 23 желтоқсандағы Қазақстан Республикасының Үкiметi мен Ресей Федерациясының Үкiметi арасындағы Қазақстан-ресей мемлекеттiк шекарасы арқылы өткiзу пункттерi туралы келiсiмнiң ережелерiн ескере отырып,
екi мемлекеттiң ынтымақтастығын одан әрi дамыту мақсатында, техникалық әрiптестiк ынтымақтастығы жолымен қатынастарды тереңдетуге тiлек бiлдiре отырып,
төмендегiлер туралы келiстi:

1-бап

1. Тараптар қазақстан-ресей мемлекеттiк шекарасында бiрлескен автомобиль өткiзу пункттерiн салу жөнiндегi iс-қимылдарды үйлестiру мақсатында ынтымақтастықты жүзеге асырады. Бiрлескен автомобиль өткiзу пункттерi орналасатын жерлер жергiлiктi жер рельефiнiң физикалық-географиялық жағдайын, инфрақұрылым мен жол желісінің дамуын ескере отырып, Тараптар мемлекеттерi уәкiлеттi органдарының консультациялары жолымен айқындалады.
2. Осы Келiсiмдi iске асыру жөнiндегi уәкiлеттi органдар мыналар болып табылады:
Қазақстан Тарабынан - Қазақстан Республикасы Қаржы министрлiгi,
Ресей Тарабынан - Федералдық кеден қызметi.
3. Осы Келiсiмнiң ережелерi Тараптар мемлекеттерi уәкiлеттi органдарының арасында техникалық ынтымақтастықты жүзеге асырудың жалпы тәртiбiн айқындайды.
Техникалық ынтымақтастықтың жекелеген жобалары бойынша Тараптар мемлекеттерiнiң уәкiлеттi органдары қосымша келiсiмдер (бұдан әрi - жобалық келiсiмдер) жасасуы мүмкiн. Жобалық келiсiмдерде, атап айтқанда жобаның мақсатын, қатысушылардың мiндеттерi мен ұйымдастырушылық мәртебесiн, сондай-ақ жобаны орындау кестесiн қамтитын жобаның бiрлескен тұжырымдамасы жазылады.
4. Осы Келiсiм сондай-ақ құрылысы аяқталған, осы Келiсiмге 1 және 2-қосымшаларда көрсетiлген қазақстан-ресей мемлекеттiк шекарасындағы автомобиль өткiзу пункттерiне қатысты да қолданылады.

2-бап

Тараптар осы Келiсiмдi орындау барысында туындайтын шығыстарды Тараптар мемлекеттерiнiң заңнамасында көзделген қаражат шегiнде дербес көтередi.

3-бап

1. Бiрлескен автомобиль өткiзу пункттерiн салу Тараптар мемлекеттерiнiң заңнамасына сәйкес жүзеге асырылады.
2. Бiрлескен бақылау үшiн көзделген және осы Келiсiмге 1-қосымшада көрсетiлген бiрлескен автомобиль өткiзу пункттерiн салуды Қазақстан Республикасының аумағында Қазақстан Тарабы жүзеге асырады.
3. Бiрлескен бақылау үшiн көзделген және осы Келiсiмге 2-қосымша көрсетiлген бiрлескен автомобиль өткiзу пункттерiн салуды Ресей Республикасының аумағында Ресей Тарабы жүзеге асырады.
4. Көрсетiлген қосымшалар осы Келiсiмнiң ажырамас бөлiгi болып табылады.

4-бап

1. Осы Келiсiмнiң ережелерiн түсiндiру мен қолдануға қатысты Тараптар арасындағы барлық даулар мен келiспеушiлiктер өзара консультациялар мен келiссөздер жолымен шешiледi.
2. Тараптардың өзара келiсiмi бойынша осы Келiсiмге тиiстi хаттамалармен ресiмделетiн және осы Келiсiмнiң 5-бабының 1-тармағына сәйкес күшiне енетiн өзгерiстер мен толықтырулар енгiзiлуi мүмкiн.

5-бап

1. Осы Келiсiм Тараптардың оның күшiне енуi үшiн қажеттi мемлекетiшiлiк рәсiмдердi орындағаны туралы соңғы жазбаша хабарламаны алған күнiнен бастап күшiне енедi.
2. Осы Келiсiм белгiленбеген мерзiмге жасалады және Тараптардың бiрiнiң басқа Тараптың оның қолданылуын тоқтату ниетi туралы тиiстi жазбаша хабарламасын алған күнiнен бастап алты ай өткенге дейiн күшiнде қалады.

2006 жылғы "___"________ __________ қаласында әрқайсысы қазақ және орыс тiлдерiндегi екi түпнұсқалық данада жасалды, әрi екi мәтiннiң күшi бiрдей.
Осы Келiсiмнiң ережелерiн түсiндiруде келiспеушiлiктер туындаған жағдайда Тараптар орыс тiлiндегi мәтiнге жүгiнетiн болады.

Қазақстан Республикасының Ресей Федерациясының
Yкiметi үшiн Yкiметi үшiн

Қазақстан Республикасының
Үкiметi мен Ресей
Федерациясының Үкiметi
арасындағы Қазақстан-
ресей мемлекеттiк шекарасында
бiрлескен өткiзу
пункттерiн салу туралы
келiсiмнiң жобасына
1-қосымша

Қазақстан-ресей мемлекеттiк шекарасында
өткiзу пункттерiнiң тiзбесi

Р/с N №	Өткізу пунктінің атауы	Шекаралас өткізу пункті	Шекаралас мемлекет	Болжалды жобалық өткізу мүмкіндігі, авт./тәулік				Абаттандыруды аяқтаудың жоспарланған мерзімі
				жалпы	жүк	жолаушылар	жеңіл
1.	Шарбақты	Құлынды	Ресей	485	80	25	380	2004 ж.
2.	Ауыл	Веселоярск	Ресей	255	25	20	200	2004 ж.
3.	Қарақоға	Исилькуль	Ресей	395	30	15	350	2004 ж.
4.	Обаған	Звериноголовское	Ресей	395	80	15	300	2004 ж.
5.	Жайсаң	Сагарчин	Ресей	740	110	30	600	2005 ж.
6.	Өрлітөбе	Ольховка	Ресей	750	120	30	600	2005 ж.
7.	Уба	Михайловка	Ресей	400	70	10	320	2005 ж.
8.	Құрманғазы	Қараөзек	Ресей	340	80	10	250	2006 ж.
9.	Бидайық	Одесское	Ресей	300	70	200	30	2008 ж.

Қазақстан Республикасының
Үкiметi мен Ресей
Федерациясының Үкiметi
арасындағы Қазақстан-
ресей мемлекеттiк шекарасында
бiрлескен өткiзу
пункттерiн салу туралы
келiсiмнiң жобасына
2-қосымша

Ресей-қазақстан мемлекеттік шекарасында
өткізу пункттерінің тізбесі

Р/с N №	Өткізу пунктінің атауы	Шекаралас өткізу пункті	Шекаралас мемлекет	Болжалды жобалық өткізу мүмкіндігі, авт./тәулік				Абаттандыруды аяқтаудың жоспарланған мерзімі
				жалпы	жүк	жолаушылар	жеңіл
1.	Петухово	Жаңа жол	Қазақстан	1500	650	50	800	2004ж.
2.	Бугристое	Қайрақ	Қазақстан	2000	300	100	1600	2004ж.
3.	Озинки	Тасқала	Қазақстан	250	90	6	154	2005ж.
4.	Маштаково	Сырым	Қазақстан	1000	150	30	820	2008ж.
5.	Илек	Ақсай	Қазақстан	500	100	20	380	2008ж.
6.	Павловка	Қосақ	Қазақстан	500	100	20	380	2008ж.
7.	Орск	Әлімбет	Қазақстан	1000	150	50	800	2009ж.
8.	Малиновое озеро	Қоянбай	Қазақстан	500	100	70	330	2010ж.
9.	Горняк	Жезкент	Қазақстан	1000	150	50	800	2010ж.