Ескерту. Күші жойылды - ҚР Үкіметінің 2009.10.02 N 1520 Қаулысымен.
Қазақстан Республикасының 2004 жылғы 24 сәуірдегі Бюджет кодексінің 204-бабына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Республикалық маңызы бар қаланың, астананың жергілікті атқарушы органының ішкі нарықта айналысқа жіберу үшін бағалы қағаздарды шығару ережесі бекітілсін.
2. "Жергілікті атқарушы органдардың орта мерзімді облигацияларын шығару, орналастыру, айналысқа қосу, өтеу және оларға қызмет көрсету ережесін бекіту туралы" Қазақстан Республикасы Үкіметінің 2003 жылғы 8 сәуірдегі N 333 қаулысының (Қазақстан Республикасының ПҮАЖ-ы, 2003 ж., N 15, 159-құжат) күші жойылды деп танылсын.
3. Осы қаулы қолданысқа енгізілген сәтке дейін шығарылған мемлекеттік бағалы қағаздарды соңғы өтеу сәтінен бастап қолданысқа енгізілетін 2-тармақты қоспағанда, осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі
Қазақстан Республикасы
Үкіметінің
2008 жылғы 15 наурыздағы
N 252 қаулысымен
бекітілген
Республикалық маңызы бар қаланың, астананың жергілікті атқарушы органының ішкі нарықта айналысқа жіберу үшін бағалы қағаздарды шығару ережесі
1. Жалпы ережелер
1. Осы Республикалық маңызы бар қаланың, астананың жергілікті атқарушы органының ішкі нарықта айналысқа жіберу үшін бағалы қағаздарды шығару ережесі (бұдан әрі - Ереже) Қазақстан Республикасының 2004 жылғы 24 сәуірдегі Бюджет кодексіне және " Бағалы қағаздар рыногы туралы " Қазақстан Республикасының 2003 жылғы 2 шілдедегі Заңына сәйкес әзірленді және Қазақстан Республикасының аумағында республикалық маңызы бар қаланың, астананың жергілікті атқарушы органдарының мемлекеттік бағалы қағаздарды шығару, орналастыру, айналысқа жіберу, оларға қызмет көрсету және өтеу тәртібін анықтайды.
2. Осы Ережеде мынадай ұғымдар пайдаланылады:
эмитент - республикалық маңызы бар қаланың, астананың жергілікті атқарушы органы;
бағалы қағаздар - республикалық маңызы бар қаланың, астананың жергілікті атқарушы органдары эмиссиялайтын мемлекеттік эмиссиялық бағалы қағаздар;
сауда-саттықты ұйымдастырушы - "Қазақстан қор биржасы" акционерлік қоғамы;
депозитарий - эмитентпен жасалған шартқа сәйкес төлем агентінің функцияларын, бағалы қағаздарға депозитарийлік қызмет көрсету жөніндегі функцияларды және бағалы қағаздарды ұстаушылардың тізілімдері жүйесін жүргізу жөніндегі функцияларды жүзеге асыратын "Бағалы қағаздардың орталық депозитарийі" акционерлік қоғамы;
бағалы қағаздарды орналастырудың ішкі ережелері - сауда-саттықты ұйымдастырушының эмитентпен келісілген ішкі құжаты, оның негізінде сауда-саттықты ұйымдастырушы бағалы қағаздарды орналастыруды жүзеге асырады;
бағалы қағаздарға қызмет көрсетудің және оларды өтеудің ішкі ережелері - депозитарийдің эмитентпен келісілген ішкі құжаты, оның негізінде депозитарий бағалы қағаздарға қызмет көрсетуді және оларды өтеуді жүзеге асырады;
бастапқы дилер - белгіленген тәртіппен бағалы қағаздарды орналастыруға қатысуға сауда-саттықты ұйымдастырушы жіберген бағалы қағаздар нарығына кәсіби қатысушы.
2. Бағалы қағаздарды шығару, орналастыру, айналысқа жіберу, оларға қызмет көрсету және өтеу тәртібі
Параграф 1. Бағалы қағаздарды шығарудың, орналастырудың, айналысқа жіберудің, оларға қызмет көрсетудің және өтеудің жалпы шарттары
3. Бағалы қағаздарды эмитент құжатты және құжатсыз нысанда шығара алады. Бағалы қағаздарға қызмет көрсету (сыйақыны есептеу және төлеу) ұлттық валютамен жүзеге асырылады.
4. Әрбір шығарылымның, Қазақстан Республикасының заңнамасына сәйкес бағалы қағаздар нарығын мемлекеттік реттеуді және қадағалауды жүзеге асыратын уәкілетті орган беретін ұлттық сәйкестендіру нөмірі (ҰСН) болады.
5. Бағалы қағаздар аукционды өткізу, жете орналастыру, қайта ашу, жазылым жүргізу жолымен және бағалы қағаздарды орналастырудың ішкі ережелерінде белгіленген басқа да тәсілдермен орналастырылады.
6. Бағалы қағаздарды және олар бойынша құқықтарды есепке алу бастапқы дилерлердің депозитарийдегі жеке шоттары бойынша және бастапқы дилерлердің жеке шоттарында ашылған инвесторлардың жеке қосалқы шоттарында жүзеге асырылады.
Депозитарий төлем агентінің функцияларын жүзеге асырады, олар бағалы қағаздар бойынша орналастыру кезінде бастапқы нарықта, бағалы қағаздардың айналымы мен оларды өтеу кезінде қайталама нарықта есеп айырысуды жүзеге асырудан, сондай-ақ бағалы қағаздарға қызмет көрсетуден тұрады.
7. Эмитент Қазақстан Республикасының Үкіметі тиісті жылға белгіленген тиісті жергілікті атқарушы орган борышының лимиті шегінде бағалы қағаздар шығарылымының көлемін және нысаналы мақсатын міндетті түрде Қазақстан Республикасының Үкіметімен келіседі.
8. Эмитент орналастыру күніне дейін он күнтізбелік күннен кешіктірмейтін мерзімде орналастыруды жүргізу күні, алдағы шығарылым көлемі туралы Қазақстан Республикасы Қаржы министрлігін хабардар етеді.
9. Бағалы қағаздарды орналастыру, оларға қызмет көрсету және өтеу тәсілдерінің шарттары мен рәсімдері тиісінше бағалы қағаздарды орналастырудың ішкі ережелерінде және бағалы қағаздарға қызмет көрсетудің және оларды өтеудің ережелерінде белгіленеді.
10. Қазақстан Республикасының резиденттері мен резиденттері емес заңды және жеке тұлғалар бағалы қағаздарды бастапқы дилерлер арқылы сатып ала алады.
11. Сыйақы ставкасы, бағалы қағаздарды орналастыру көлемі Қазақстан Республикасы Қаржы министрлігімен келісіледі.
12. Депозитарийдің орналастырылған бағалы қағаздар бойынша есеп айырысуларды жүзеге асыру күні бағалы қағаздар айналымының басталу күні болып саналады. Бағалы қағаздардың айналымы осы бағалы қағаздарды өтеу күнінің алдындағы соңғы күннің аяқталуымен бірге аяқталады.
13. Осы бағалы қағаздар бойынша сыйақы есептелетін бірінші күн - олардың айналымы басталатын күн, ал соңғы күн оларды өтеу күнінің алдындағы соңғы күн болып табылады.
Бағалы қағаздар бойынша сыйақы төлеу бағалы қағаздардың жекелеген түрлерін шығару шарттарында белгіленген күндері жүргізіледі. Сыйақыны соңғы төлеу күні, егер бағалы қағаздарды шығару шарттарында өзгеше мерзім көзделмесе, бағалы қағаздарды өтеу күніне сәйкес келеді. Егер бағалы қағаздар бойынша сыйақыны төлеу күні жұмыс істемейтін күнге келсе, онда төлем жұмыс істемейтін күннен кейінгі бірінші жұмыс күні жүргізіледі.
14. Бағалы қағаздарды өтеу оларды айналымға жіберу мерзімі аяқталған күннен кейінгі бірінші күні атаулы құны бойынша жүргізіледі. Егер бағалы қағаздардың атаулы құнын өтеу күні жұмыс істемейтін күнге келсе, онда төлем жұмыс істемейтін күннен кейінгі бірінші жұмыс күні жүргізіледі.
15. Бағалы қағаздарды өтеу және оларға қызмет көрсету тиісті жергілікті бюджеттің қаражаты есебінен жүзеге асырылады.
16. Бағалы қағаздарды өтегеннен кейін эмитент бес жұмыс күнінің ішінде Қазақстан Республикасы Қаржы министрлігіне депозитарийдің бағалы қағаздарды өтеу туралы мәліметтерінің көшірмесін және жүргізілген өтеуді растайтын құжаттардың көшірмелерін ұсынады.
17. Эмитент қайталама нарықта бағалы қағаздардың белгілі бір шығарылымының барлық көлемін немесе ішінара бөлігін сатып ала алады және өтей ала алады. Эмитенттің бағалы қағаздардың белгілі бір шығарылымының барлық көлемін сатып алуы туралы шешімі осындай сатып алу күніне дейін бір ай бұрын қаржы агентіне жеткізіледі, ол осы хабарламадан кейін бес күнтізбелік күн ішінде бастапқы дилерлерге бұл туралы хабарлайды.
18. Бағалы қағаздармен жасалатын операциялар бойынша салық салу тәртібі Қазақстан Республикасының салық заңнамасына сәйкес айқындалады.
19. Эмитент бағалы қағаздардың мынадай:
1) орта мерзімді;
2) ұзақ мерзімді;
3) орта мерзімді индекстелген;
4) ұзақ мерзімді индекстелген түрлерін шығаруды, орналастыруды, айналымға жіберуді, оларға қызмет көрсетуді және өтеуді жүзеге асырады.
20. Орта мерзімді, ұзақ мерзімді, орта мерзімді индекстелген, ұзақ мерзімді индекстелген бағалы қағаздар купондық эмиссиялық бағалы қағаздар болып табылады, олардың атаулы құны бір мың теңгені құрайды.
21. Орта мерзімді, ұзақ мерзімді, орта мерзімді индекстелген, ұзақ мерзімді индекстелген бағалы қағаздар бойынша купонның сомасын есептеу үшін есеп айырысу базасы - есеп айырысу айында отыз күн, есеп айырысу жылында үш жүз алпыс күн.
22. Бағалы қағаздардың иелері заңнамалық актілерде белгіленген шектеулерді қоспағанда, бағалы қағаздармен кез келген азаматтық-құқықтық мәмілелерді жүзеге асыра алады. Бұл ретте инвестор бағалы қағаздармен жасалатын барлық операцияларды бастапқы дилер арқылы ресімдейді.
Параграф 2. Орта мерзімді бағалы қағаздар
23. Орта мерзімді бағалы қағаздар бір жылдан жоғары бес жылды қоса алғанға дейін айналыс мерзімдерімен шығарылады.
24. Орта мерзімді бағалы қағаздарды орналастыру және өтеу атаулы құн бойынша жүзеге асырылады, бұл ретте айналыс мерзімі ішінде купон деп аталатын орналастыру кезінде белгіленген сыйақы төленеді.
25. Орта мерзімді бағалы қағаздар бойынша купонды төлеу орта мерзімді бағалы қағаздар айналысқа жіберілетін тиісті жылы жылына екі рет эмитент белгіленген күндері жүзеге асырылады.
26. Купон сомасы мынадай формуламен анықталады:
S=N*С*180/360
мұндағы,
S, теңге - кезекті төленуге тиіс орта мерзімді бағалы қағаздар купонының сомасы,
N, теңге - орта мерзімді бағалы қағаздар бойынша сыйақы кезекті төленуге тиіс олардың тиісті санының атаулы құнының сомасы,
С, % - купон ставкасы.
Параграф 3. Ұзақ мерзімді бағалы қағаздар
27. Ұзақ мерзімді бағалы қағаздар бес жылдан жоғары айналыс мерзімімен шығарылады.
28. Ұзақ мерзімді бағалы қағаздарды орналастыру және өтеу атаулы құн бойынша жүзеге асырылады, бұл ретте айналыс мерзімі ішінде купон деп аталатын орналастыру кезінде белгіленген сыйақы төленеді.
29. Ұзақ мерзімді бағалы қағаздар бойынша купонды төлеу бағалы қағаздар айналысқа жіберілетін тиісті жылы жылына бір рет эмитент белгілеген күндері жүзеге асырылады.
30. Купон сомасы мынадай формуламен анықталады:
S=N*С
мұндағы,
S, теңге - кезекті төленуге тиіс ұзақ мерзімді бағалы қағаздар купонының сомасы,
N, теңге - ұзақ мерзімді бағалы қағаздар бойынша сыйақы кезекті төленуге тиіс олардың тиісті санының атаулы құнының сомасы,
С, % - купон ставкасы.
Параграф 4. Орта мерзімді индекстелген бағалы қағаздар
31. Орта мерзімді индекстелген бағалы қағаздар бір жылдан жоғары бес жылға дейін қоса алғанда айналыс мерзімдерімен шығарылады және алты ай еселігі болуға тиіс.
32. Орта мерзімді индекстелген бағалы қағаздарды орналастыру және өтеу атаулы құны бойынша жүзеге асырылады, бұл ретте айналыс мерзімі ішінде индекстелген купон деп аталатын сыйақы төленеді.
33. Егер эмитент бағалы қағаздарды шығарудың өзгеше күнін көздемесе, орта мерзімді индекстелген бағалы қағаздарды орналастыру айдың соңғы күнінің алдындағы жұмыс күні жүргізіледі.
34. Индекстелген купонды төлеу тиісті кезеңділікпен жылына екі рет эмитент белгілеген күндері орта мерзімді индекстелген бағалы қағаздар бойынша жүзеге асырылады.
Бұл ретте орта мерзімді индекстелген бағалы қағаздар бойынша индекстелген купонды төлеу айналыстың әрбір алты толық күнтізбелік айы сайын айдың бесінші жұмыс күнінде жүргізіледі.
35. Орта мерзімді индекстелген бағалы қағаздарға салынған ақшаны индекстеу тіркелген купонды қосудан алынған, орналастыру кезінде анықталған индекстелген купонды және өткен купондық кезең үшін инфляция индексін есептеу арқылы жүргізіледі.
36. Индекстелген купон сомасы мынадай формуламен анықталады:
S=N*I/100+C
мұндағы,
S, теңге - кезекті төленуге тиіс орта мерзімді индекстелген бағалы қағаздардың индекстелген купонының сомасы,
N, теңге - орта мерзімді индекстелген бағалы қағаздар бойынша сыйақы кезекті төленуге тиіс олардың тиісті санының атаулы құнының сомасы,
I, % - өткен купондық кезең үшін инфляция индексі,
бұл ретте,
І =(((І 1 /100)*(І 2 /100)*(І 3 /100)*...*(І n /100))-1)*100,
мұндағы,
І 1 I 2 , I 3 ,..., I n - купондық кезеңнің тиісті айлары үшін тұтыну бағасының индекстері, I мәні үтірден кейін үш (қоса алғанда) санға дейін дөңгелектенеді,
С, - тіркелген купон сомасы,
бұл ретте, С= N*К*180/360,
мұндағы,
К, % - орналастыру кезінде белгіленген тіркелген жылдық купонның мәні.
37. Тұтыну бағаларының индексін Қазақстан Республикасы Статистика агенттігі ай сайын жариялайды.
38. Егер өткен купондық кезең үшін инфляция индексі теріс мәнге тең болса, онда инфляция индексінің мәнін нөлге тең деп қабылдау қажет.
5. Ұзақ мерзімді индекстелген бағалы қағаздар
39. Ұзақ мерзімді индекстелген бағалы қағаздар бес жылдан жоғары айналыс мерзімдерімен шығарылады және он екі ай еселігі болуға тиіс.
40. Ұзақ мерзімді индекстелген бағалы қағаздарды орналастыру және өтеу атаулы құны бойынша жүзеге асырылады, бұл ретте айналыс мерзімі ішінде индекстелген купон деп аталатын сыйақы төленеді.
41. Егер эмитент бағалы қағаздарды шығарудың өзгеше күнін көздемесе, ұзақ мерзімді индекстелген бағалы қағаздарды орналастыру айдың соңғы күнінің алдындағы жұмыс күні жүргізіледі.
42. Индекстелген купонды төлеу тиісті кезеңділікпен жылына бір рет Эмитент белгілеген күндері ұзақ мерзімді индекстелген бағалы қағаздар бойынша жүзеге асырылады.
Бұл ретте ұзақ мерзімді индекстелген бағалы қағаздар бойынша индекстелген купонды төлеу айналыстың әрбір алты толық күнтізбелік айы сайын айдың бесінші жұмыс күнінде жүргізіледі.
43. Ұзақ мерзімді индекстелген бағалы қағаздарға салынған ақшаны индекстеу тіркелген купонды қосудан алынған, орналастыру кезінде анықталған индекстелген купонды және өткен купондық кезең үшін инфляция индексін есептеу арқылы жүргізіледі.
44. Индекстелген купон сомасы мынадай формуламен анықталады:
S=N*I/100+C,
мұндағы,
S, теңге - кезекті төленуге тиіс ұзақ мерзімді индекстелген бағалы қағаздардың индекстелген купонының сомасы,
N, теңге - ұзақ мерзімді индекстелген бағалы қағаздар бойынша сыйақы кезекті төленуге тиіс олардың тиісті санының атаулы құнының сомасы,
I, % - өткен купондық кезең үшін инфляция индексі,
бұл ретте,
І=(((І 1 /100)*(І 2 /100)*(І 3 /100)*...*(І n /100))-1)*100,
мұндағы,
І 1 I 2 , I 3 ,..., I n - купондық кезеңнің тиісті айлары үшін тұтыну бағаларының индекстері, I мәні үтірден кейін үш (қоса алғанда) санға дейін дөңгелектенеді,
С, - тіркелген купон сомасы,
бұл ретте, С=N*К
мұндағы,
К, % - орналастыру кезінде белгіленген тіркелген жылдық купонның мәні.
45. Тұтыну бағаларының индексін Қазақстан Республикасы Статистика агенттігі ай сайын жариялайды.
46. Егер өткен купондық кезең үшін инфляция индексі теріс мәнге тең болса, онда инфляция индексінің мәнін нөлге тең деп қабылдау қажет.
