Ескерту. Күші жойылды - ҚР Спорт және дене шынықтыру істері агенттігі Төрағасының 25.07.2014 № 288 бұйрығымен (алғаш ресми жарияланған күнінен кейін күнтізбелік он күн өткен соң қолданысқа енгізіледі).
Қазақстан Республикасының "Дене шынықтыру және спорт туралы" Заңына сәйкес БҰЙЫРАМЫН:
1. Қоса беріліп отырған Спортшының бір дене шынықтыру-спорт ұйымынан (спорт клубынан) басқа дене шынықтыру-спорт ұйымына (спорт клубына) ауысуы туралы Ереже бекітілсін.
2. Жоғары жетістіктер спорты және спорт резерві басқармасы (Ю.П.Гуськов) белгіленген тәртіппен осы бұйрықты Қазақстан Республикасының Әділет министрлігіне мемлекеттік тіркеуге ұсынсын.
3. Осы бұйрықтың орындалуын бақылау Төрағаның орынбасары Е.Б.Қанағатовқа жүктелсін.
4. Бұйрық Қазақстан Республикасының Әділет министрлігінде мемлекеттік тіркеуден өткен күннен бастап күшіне енеді.
Төрағаның
міндетін атқарушы
"Спортшының бір дене
шынықтыру - спорт ұйымынан
(спорт клубынан) басқа
дене шынықтыру - спорт
ұйымына (спорт клубына)
ауысуы жөніндегі Ережені
бекіту туралы"
Қазақстан Республикасы
Туризм және спорт
жөніндегі агенттігі
Төрағасы міндетін
атқарушысының
2004 жылғы 15 наурыздағы
N 06-2-2/91 бұйрығымен
бекітілген
Спортшының бір дене шынықтыру-спорт ұйымынан (спорт клубынан) басқа дене шынықтыру-спорт ұйымына (спорт клубына) ауысуы туралы Ереже
1. Жалпы ережелер
1. Осы Спортшының бір дене шынықтыру-спорт ұйымынан (спорт клубынан) басқа дене шынықтыру-спорт ұйымына (спорт клубына) ауысуы туралы Ереже Қазақстан Республикасының "Дене шынықтыру және спорт туралы" Заңына сәйкес әзірленді және Қазақстан Республикасының аумағында және одан тыс жерлерде спортшының бір дене шынықтыру-спорт ұйымынан (спорт клубынан) басқа дене шынықтыру-спорт ұйымына (спорт клубына) (бұдан әрі - ұйым) ауысуының тәртібін анықтайды.
2. Ауысудың бірыңғай тәртібін белгілеу мөлдірлікті қамтамасыз ету және спортшыларды даярлау жүйесін жетілдіру, республика құрама командаларының және жекелеген спортшылардың халықаралық жарыстарда табысты өнер көрсетуін қамтамасыз ету мақсатында жүзеге асырылады.
3. Осы Ережеде мынадай ұғымдар қолданылады:
1) трансферттік карта (сертификат) - спортшының шет елдік спорт клубы үшін өнер көрсетуіне құқық беретін рұқсат;
2) дене шынықтыру-спорт ұйымы (спорт клубы) - меншік нысанына қарамастан дене шынықтыру және спорт саласындағы қызметті жүзеге асыратын заңды тұлға.
4. Қазақстан Республикасының спортшыларын даярлау келісім-шарт негізінде жүзеге асырылуы мүмкін. Спорттық қызмет туралы келісім-шарт Қазақстан Республикасының еңбек заңдарының негізінде жасалады және жазбаша нысандағы келісім болып табылады әрі дене шынықтыру және спорт жөніндегі орталық атқарушы органда (бұдан әрі - орталық орган) есепке алынады.
Спорттық қызмет туралы келісім-шартта спортшының құқықтары мен міндеттері, оның әлеуметтік-медициналық сақтандырылуы, осы келісім-шартты жасаудың және бұзудың шарттары көрсетілуі қажет. Спорттық қызмет туралы келісім-шартта Қазақстан Республикасының заңнамасына қайшы келмейтін басқа да шарттар мен міндеттер болуы мүмкін.
5. Спортшының спорт қызметі туралы келісім-шарттың қолданылу мерзімі аяқталғаннан кейін бір дене шынықтыру-спорт ұйымынан басқа дене шынықтыру-спорт ұйымына немесе шетелдік дене шынықтыру-спорт ұйымына (шетелдік спорт клубына) ауысуға құқығы бар.
Егер спортшы басқа ұйымға спорт қызметі туралы келісім-шарттың қолданылу мерзімі аяқталғанға дейін ауысқан немесе келісім-шарт талаптарында көзделген міндеттемелерін орындамаған жағдайда, спортшы ұйымдардың өзара келісімімен ғана ауысуы мүмкін.
2. Спортшының ауысуы және шарт (келісім-шарт) жасасуы
6. Спортшылардың ауысу мәселелерін дене шынықтыру және спорт саласындағы республикалық қоғамдық бірлестіктер (бұдан әрі - федерация), дене шынықтыру және спорт саласындағы (бұдан әрі - аумақтық орган) аумақтық атқарушы органдар қарайды және дене шынықтыру және спорт саласындағы орталық атқарушы органдар мынадай тәртіпте келіседі:
1) спортшының, облыстық, қалалық құрама команда мүшесінің Қазақстанның шегінде бір ұйымнан басқа ұйымға ауысуы кезіндегі мәселені осы спорт түрі бойынша аккредиттелген федерация, спорт мәселелеріне қарайды және аумақтық органмен келіседі;
2) спортшының, облыстық, қалалық құрама команда мүшесінің шет елдік дене шынықтыру-спорт ұйымға ауысуы кезіндегі мәселені осы спорт түрі бойынша аккредиттелген федерация, спорт мәселелеріне аумақтық орган қарайды және орталық органмен келіседі;
3) спортшының ауысуы кезінде құрама команда мүшесінің бір ұйымнан басқа (соның ішінде шет елдік) ұйымға ауысуы кезіндегі мәселені осы спорт түрі бойынша аккредиттелген федерация қарайды және орталық орган бекітеді.
7. Ауысуға рұқсат алғысы келген спортшы жазбаша түрде өзінің тілегі туралы тиісті ұйымның басшысына және спорт түрі жөніндегі федерацияға шарттың (келісім-шарттың) қолдану мерзімінің аяқталуына кемінде бір ай қалғанда хабарлайды.
8. Спортшы ауыстыру туралы мәселені қарау үшін мынадай құжаттарды:
1) өтінішті;
2) мүдделі ұйымдардың келісілген (келісілмеген);
3) қолданыстағы шарттың көшірмесі;
шарттарын ұсынады.
9. Өтінішті қарау және келісу мерзімі өтініш берілген күннен бастап бір айдан аспауы қажет.
10. Спортшы бір ұйымнан басқа ұйымға мынадай негіздерге байланысты ауыса алады:
1) әскери қызметке шақырылса;
2) тұрғылықты жері өзгерсе;
3) білім беру мекемесінің күндізгі бөлімінде оқыса;
4) спортшымен ұйым арасындағы шарттың (келісім-шарттың) қолдану мерзімі аяқталса;
5) тараптардың келісімі бойынша шарт (келісім-шарт) мерзімінен бұрын бұзылса.
11. Шеттетуі бар спортшы жазалау кезінде басқа ұйымға ауысу құқығынан айрылады.
12. Спортшы спорт клубын (команданы) қайта жасақтаған кезде Қазақстан чемпионаты басталардан бұрын немесе оның барысында өзі қатысатын басқа спорт клубына (командаға) кедергісіз ауысу құқығына ие болады.
13. Бір ұйымнан басқа ұйымға өткен спортшы онымен шарт (келісім-шарт) жасасады.
14. Спортшының бір ұйымнан басқа ұйымға негізгі ұйыммен ұйымдар арасындағы екі жақты келісім-шартпен ресімделетін шартты (келісім-шартты) бұзбай-ақ уақытша ауысуы мүмкін. Аталған келісімде спортшының уақытша ауысу шарттары мен мерзімі көрсетіледі.
15. Орталық органмен келіскеннен кейін спорт түрлері бойынша аккредиттелген республикалық федерациялардан спортшы шет елдік дене шынықтыру-спорт ұйымға ауысқан кезде оған трансферттік карта (сертификат) беріледі, ол спорт түрінен халықаралық федерациялардың талаптарына сай болады және спортшының Қазақстан Республикасының құрама командасы үшін ресми халықаралық жарыстарға қатысуын көздейді.
16. Спортшының бір ұйымнан басқа ұйымға ауысу мәселесі шешілгенше спортшының жаңа ұйым үшін жарыстарға қатысуына рұқсат етілмейді.
17. Осы Ережеге сәйкес спорт түрлері бойынша аккредиттелген республикалық федерациялар тиісті халықаралық спорт федерацияларының талаптарын ескере отырып, спортшылардың бір ұйымнан басқа ұйымға ауысу ережесін әзірлейді және орталық органға келісімге ұсынады.
