БҰЙЫРАМЫН:
1. "Әскери қызметшілер мен олардың отбасы мүшелеріне әуе көлігімен ішкі және халықаралық авиамаршруттармен мемлекет есебінен жол жүру құқығын беру қағидаларын бекіту туралы" Қазақстан Республикасы Ішкі істер министрінің 2017 жылғы 17 тамыздағы № 562 бұйрығына (Нормативтік құқықтық актілерді мемлекеттік тіркеу тізілімінде № 15699 болып тіркелген, 2017 жылғы 22 қыркүйекте Қазақстан Республикасы нормативтік құқықтық актілердің эталондық бақылау банкінде жарияланған) мынадай өзгерістер енгізілсін:
бұйрықтың тақырыбы мынадай редакцияда жазылсын:
"Әскери қызметшілер мен олардың отбасы мүшелеріне әуе көлігімен мемлекет есебінен жол жүру құқығын беру қағидаларын бекіту туралы";
1-тармақ мынадай редакцияда жазылсын:
"1. Қоса беріліп отырған Әскери қызметшілер мен олардың отбасы мүшелеріне әуе көлігімен мемлекет есебінен жол жүру құқығын беру қағидалары бекітілсін";
Көрсетілген бұйрықпен бекітілген Әскери қызметшілер мен олардың отбасы мүшелеріне әуе көлігімен ішкі және халықаралық авиамаршруттармен мемлекет есебінен жол жүру құқығын беру қағидалары осы бұйрыққа қосымшаға сәйкес жаңа редакциядада жазылсын.
2. Қазақстан Республикасы Ұлттық ұланының Бас қолбасшылығы (Р.Ф. Жақсылықов) Қазақстан Республикасының заңнамасында белгіленген тәртіпте:
1) осы бұйрықты Қазақстан Республикасы Әділет министрлігінде мемлекеттік тіркеуді;
2) осы бұйрық мемлекеттік тіркелген күннен бастап күнтізбелік он күн ішінде қазақ және орыс тілдерінде ресми жариялау және Қазақстан Республикасы нормативтік құқықтық актілерінің эталондық бақылау банкіне енгізу үшін "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына жолдауды;
3) осы бұйрықты Қазақстан Республикасы Ішкі істер министрлігінің интернет-ресурсына орналастыруды;
4) осы бұйрықты Қазақстан Республикасы Әділет министрлігінде мемлекеттік тіркегеннен кейін он жұмыс күні ішінде осы тармақтың 1), 2) және 3) тармақшаларында көзделген іс-шаралардың орындалуы туралы мәліметтерді Қазақстан Республикасы Ішкі істер министрлігінің Заң департаментіне ұсынуды қамтамасыз етсін.
3. Осы бұйрықтың орындалуын бақылау Қазақстан Республикасы Ішкі істер министрінің жетекшілік ететін орынбасарына жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасының Ішкі істер министрі полиция генерал-полковнигі |
Қ. Қасымов |
| Қазақстан Республикасы Ішкі істер министрінің 2018 жылғы 4 қазандағы № 684 бұйрығына қосымша |
|
| Қазақстан Республикасы Ішкі істер министрінің 2017 жылғы 17 тамыздағы № 562 бұйрығымен бекітілген |
Әскери қызметшілер мен олардың отбасы мүшелеріне әуе көлігімен мемлекет есебінен жол жүру құқығын беру қағидалары
1. Осы Әскери қызметшілер мен олардың отбасы мүшелеріне әуе көлігімен мемлекет есебінен жол жүру құқығын беру қағидалары (бұдан әрі - Қағидалар) Қазақстан Республикасы Ішкі істер органдарының әскери қызметшілеріне және олардың отбасы мүшелеріне мемлекет есебінен әуе көлігімен жол жүру құқығын беру тәртібін айқындайды.
2. Әскери қызметшілерге:
1) басқа жергілікті жерге, оның ішінде əскери бөлімнің немесе бөлімшенің құрамында жаңа қызмет орнына ауысқан;
2) оқуға жіберілген және каникулярлық демалысқа және кері қайтқанда (шетелдік әскери оқу орындарында оқитын курсанттарға);
3) оқу-жаттығуларға, далалық шығуға (теңізге шығуға), əскерлер парадтарына жəне кері жол жүрген;
4) төтенше жағдайларды жоюға қатысқан жəне кері қайтқан;
5) ұрыс қимылдарына қатысқан, төтенше немесе соғыс жағдайларында, сондай-ақ қарулы қақтығыстар жағдайларында міндеттерді орындаған;
6) бейбітшілік пен қауіпсіздікті қолдау жөніндегі бітімгершілік операцияларға қатысқан;
7) терроризмге қарсы операцияларға қатысқан;
8) əскери жүктерді, оның ішінде мемлекеттік құпияларды құрайтын мəліметтерден тұратын құжаттарды, бұйымдарды жəне əскери жүктерді күзету жəне ілесіп жүру бойынша қарауыл құрамында қабылдау (тапсыру) орындарына дейін барған жəне кері қайтқан;
9) қаза тапқан (қайтыс болған) əскери қызметшінің мəйіті салынған табытпен жерлеу орнына дейін ілесіп жүрген жəне кері қайтқан жағдайларда мемлекет есебінен әуе көлігімен жол жүру құқығы беріледі.
3. Әскери қызметшіні басқа жерге жаңа қызмет орнына, оның ішінде әскери бөлімнің немесе бөлімшенің құрамында ауыстырған кезде әскери қызметшінің отбасы мүшелері әуе көлігімен мемлекет есебінен жол жүруге құқылы.
4. Мемлекет есебінен жол жүруге құқылы әскери қызметшінің отбасы мүшелеріне:
1) зайыбы (жұбайы);
2) кәмелет жасқа толмаған балалары;
3) кәмелет жасқа толған бірінші және екінші топтағы мүгедек болып қалған немесе орта, арнайы орта және жоғары оқу орындарында күндізгі бөлімде оқитын балалары;
4) әскери қызметшінің асырауындағы және күтімді қажет ететін адамдар – ата-анасы, зайыбының (жұбайының) ата-анасы жатады.
Отбасы мүшелеріне тиесілігі және олардың жасы кадр аппаратының анықтамасымен (еркін түрде), ал асырауындағы кәмелетке толған балалардың оқитындығы оқу орнының анықтамасымен расталады (еркін түрде).
5. Осы Қағидалардың 7-тармағында көрсетілген тиісті лауазымды адамның атына жазылған дәлелді баянат әуе көлігімен жол жүру құқығын беруге негіз болып табылады.
6. Әскери қызметшілер мен олардың отбасы мүшелеріне жол жүру жағдайлары экономикалық сыныптың тарифі бойынша белгіленеді.
7. Әскери қызметшілердің және олардың отбасы мүшелерінің әуе көлігімен жол жүруі дәлелді баянаты мынадай лауазымды адамдардың (бұдан әрі - лауазымды адам) келісімдерінен кейін жүзеге асырылады:
1) Қазақстан Республикасы Ішкі істер министрі не оны алмастыратын адам – Қазақстан Республикасы Ішкі істер министрлігінің әскери-тергеу бөліністерінің әскери қызметшілеріне;
2) Қазақстан Республикасы Ұлттық ұланының Бас қолбасшысы не оны алмастыратын адам – Қазақстан Республикасы Ұлттық ұланының әскери қызметшілеріне;
3) Қазақстан Республикасы Ішкі істер министрлігі Төтенше жағдайлар комитетінің төрағасы не оны алмастыратын адам – Қазақстан Республикасы Ішкі істер министрлігінің Төтенше жағдайлар комитеті бөліністерінің әскери қызметшілеріне.
Әскери қызметшілердің және олардың отбасы мүшелерінің әуе көлігімен мемлекет есебінен жол жүруі (тасымалдау) дәлелді баянаты келісілген кезде лауазымды адамның және (немесе) уәкілетті адамның актісі бойынша жүзеге асырылады.
