БҰЙЫРАМЫН:
1. "Әскери басқару органдарының қауіпсіздік шараларын жүзеге асыру қағидаларын бекіту туралы" Қазақстан Республикасы Қорғаныс министрінің 2014 жылғы 4 қарашадағы № 511 бұйрығына мынадай өзгеріс енгізілсін:
көрсетілген бұйрықпен бекітілген Әскери басқару органдарының қауіпсіздік шараларын жүзеге асыру қағидалары осы бұйрыққа қосымшаға сәйкес жаңа редакцияда жазылсын.
2. Қазақстан Республикасы Қарулы Күштерінің Әскери полициясы бас басқармасы Қазақстан Республикасының заңнамасында белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрықты алғашқы ресми жарияланғанынан кейін Қазақстан Республикасы Қорғаныс министрлігінің интернет-ресурсына орналастыруды;
3) мемлекеттік тіркелген күннен бастап күнтізбелік он күн ішінде осы тармақтың 1) және 2) тармақшаларында көзделген іс-шаралардың орындалуы туралы мәліметтерді Қазақстан Республикасы Қорғаныс министрлігінің Заң департаментіне жолдауды қамтамасыз етсін.
3. Осы бұйрықтың орындалуын бақылау Қазақстан Республикасы Қарулы Күштері Әскери полициясы бас басқармасының бастығына жүктелсін.
4. Осы бұйрық лауазымды адамдарға, оларға қатысты бөлігінде жеткізілсін.
5. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасы Қорғаныс министрінің міндетін атқарушы |
Р. Жаксылыков |
"КЕЛІСІЛДІ"
Қазақстан Республикасының
Бас прокуратурасы
| Қазақстан Республикасы Қорғаныс министрінің міндетін атқарушы 2023 жылғы 31 наурыздағы № 266 Бұйрыққа қосымша |
|
| Қазақстан Республикасы Қорғаныс министрінің 2014 жылғы 4 қарашадағы № 511 бұйрығымен бекітілген |
Әскери басқару органдарының қауіпсіздік шараларын жүзеге асыру қағидалары
1-тарау. Жалпы ережелер
1. Осы Қағидалар әскери басқару органдарының қылмыстық процеске қатысатын адамдарға қатысты қауіпсіздік шараларын жүзеге асыру тәртібін айқындайды.
2. Әскери басқару органдары қауіпсіздік шараларын Қазақстан Республикасы Қарулы Күштерінің, басқа да әскерлері мен әскери құралымдарының әскери бөлімдерінде, құрамаларында немесе мемлекеттік мекемелерінде (бұдан әрі – әскери бөлімдер мен мекемелер) әскери қызмет өткеру және жұмыс ерекшелігін ескере отырып, "Қылмыстық процеске қатысушы адамдарды мемлекеттік қорғау туралы" Қазақстан Республикасының Заңында (бұдан әрі – Заң) белгіленген қауіпсіздік шараларын қолдану жолымен әскери қызметшiлерге, олардың әскери жиындардан өтуi кезінде запастағы азаматтарға, Қазақстан Республикасы Қарулы Күштерi әскери бөлімдерінің, құрамаларының немесе мемлекеттік мекемелерінің азаматтық персонал адамдарына қатысты қолданады.
Одан басқа, қорғалатын адамға қатысты қорғалатын адамды жаңа әскери қызмет орнына әскери бөлім мен мекемеге ауыстыру, әскерге шақыру немесе келісімшарт бойынша әскери қызмет өткеретін әскери қызметшіні ауыстыру (іссапарға жіберу) түрінде қауіпсіздік шаралары да қолданылады.
3. Қауіпсіздік шаралары қорғалатын адам және оған қатысты қолданылатын қауіпсіздік шаралары туралы мәліметтердің құпиялылығын сақтаумен жүзеге асырылады.
2-тарау. Қауіпсіздік шараларын жүзеге асыру тәртібі
4. Заңның 21-бабына сәйкес қауіпсіздік шараларын қолдану туралы шешім қабылдайтын орган шығарылған дәлелді қаулы келіп түскен кезде қауіпсіздік шараларын жүзеге асыратын орган дербес Заңның 7-бабында көзделген өз құзыреті шегінде қажетті қауіпсіздік шараларын қолданады.
5. Қорғалатын адамды ауыстыру (іссапарға жіберу) оның жазбаша түрде білдірген келісімімен жүзеге асырылады.
Қорғалатын адамды тұрғын үймен қамтамасыз ету Қазақстан Республикасының тұрғын үй заңнамасында айқындалған тәртіппен жүзеге асырылады.
6. Қорғалатын адамды ауыстыру (іссапарға жіберу) кезінде қауіпсіздік шараларын жүзеге асыратын орган қорғалатын адамға қатысты төнетін қатердің сипатын ескере отырып, уақытша немесе тұрақты қызмет немесе оқу орнын таңдауға және орналастыруға кадр органына жәрдем көрсетеді және Қазақстан Республикасы Қылмыстық іс жүргізу кодексінің 12-тарауының талаптарына сәйкес дәлелді қаулы шығарады және оны Қазақстан Республикасы Қорғаныс министрлігінің тиісті құрылымдық бөлімшесіне жолдайды.
7. Қауіпсіздік шараларын жүзеге асыратын орган әскери бөлім командирін және мекеме басшысын қорғалатын адамға қатысты оларға сеніп тапсырылған немесе белгілі болған мәліметтерді жарияламау туралы жазбаша ескертеді.
8. Қорғалатын адамды басқа әскери бөлімге және мекемеге іссапарға жіберу Қазақстан Республикасы Үкіметінің 2000 жылғы 22 қыркүйектегі № 1428 қаулысымен бекітілген Мемлекеттік бюджет есебінен ұсталатын мемлекеттік мекемелер қызметкерлерінің, сондай-ақ Қазақстан Республикасының Парламенті депутаттарының Қазақстан Республикасының шегіндегі қызметтік іссапарлары туралы ережеге сәйкес жүзеге асырылады.
9. Әскери қызметшіні ауыстыру Қазақстан Республикасы Президентінің 2006 жылғы 25 мамырдағы № 124 Жарлығымен бекітілген Қазақстан Республикасының Қарулы Күштерінде, басқа да әскерлері мен әскери құралымдарында әскери қызмет өткеру қағидаларына сәйкес жүзеге асырылады.
10. Қорғалатын адамды бұрынғы қызмет немесе оқу орнында қайта қалпына келтіру туралы өтініш жазбаша түрде беріледі және қауіпсіздік шараларын жүзеге асыратын орган оны тіркейді.
Ауыстырылған жағдайда, қауіпсіздік шараларын жүзеге асыратын орган әскери бөлімнің немесе мекеменің кадр органына қорғалатын адамды негізгі немесе бір саладағы мамандығы бойынша пайдаланылуын қамтамасыз ете отырып, тең немесе жоғары тұрған лауазымға тағайындауды қолдауға өтініш білдіреді.
