БҰЙЫРАМЫН:
1. "Шетелге, оның ішінде академиялық оралымдылық шеңберінде оқытуға жіберу қағидаларын бекіту туралы" Қазақстан Республикасы Білім және ғылым министрінің 2008 жылғы 19 қарашадағы № 613 бұйрығына (Нормативтік құқықтық актілерді мемлекеттік тіркеу тізілімінде № 5499 болып тіркелген) мынадай өзгерістер енгізілсін:
кіріспе мынадай редакцияда жазылсын:
""Білім туралы" Қазақстан Республикасының Заңына, "Мемлекеттік көрсетілетін қызметтер туралы" Қазақстан Республикасының Заңының 10-бабының 1) тармақшасына, "Қазақстан Республикасы Ғылым және жоғары білім министрлігінің кейбір мәселелері туралы" Қазақстан Республикасы Үкіметінің 2022 жылғы 19 тамыздағы № 580 қаулысымен бекітілген Қазақстан Республикасы Ғылым және жоғары білім министрлігі туралы ереженің 15-тармағының 54) тармақшасына сәйкес БҰЙЫРАМЫН:";
көрсетілген бұйрықпен бекітілген Шетелде, оның ішінде академиялық оралымдылық шеңберінде оқытуға жіберу қағидаларында:
1-тармақ мынадай редакцияда жазылсын:
"1. Осы Қағидалар (бұдан әрі – Қағидалар) "Білім туралы" Қазақстан Республикасы Заңына, "Мемлекеттік көрсетілетін қызметтер туралы" Қазақстан Республикасы Заңының (бұдан әрі – Заң) 10-бабының 1) тармақшасына және "Қазақстан Республикасы Ғылым және жоғары білім министрлігінің кейбір мәселелері туралы" Қазақстан Республикасы Үкіметінің 2022 жылғы 19 тамыздағы № 580 қаулысымен бекітілген Қазақстан Республикасы Ғылым және жоғары білім министрлігі туралы ереженің 15-тармағының 54) тармақшасына сәйкес әзірленді және Қазақстан Республикасының азаматтарын шетелде, оның ішінде академиялық оралымдылық шеңберінде оқытуға жіберу тәртібін, сондай-ақ мемлекеттік қызметтер көрсету тәртібін айқындайды.";
3, 4 және 5-тармақтар мынадай редакцияда жазылсын:
"3. Осы Қағидаларда мынадай ұғымдар пайдаланылады:
1) академиялық оралымдылық – білім алушыларды немесе оқытушы-зерттеушілерді, педагогтерді оқыту, тағылымдамадан өту немесе зерттеулер жүргізу үшін белгілі бір академиялық кезеңге (семестрге немесе оқу жылына) өзінің жоғары және (немесе) жоғары оқу орнынан кейінгі білім беру ұйымында немесе оқуды жалғастыру үшін басқа жоғары және (немесе) жоғары оқу орнынан кейінгі білім беру ұйымында академиялық кредиттер түрінде меңгерген оқыту нәтижелерін (модульдерін), оқу бағдарламаларын, пәндерін міндетті түрде қайта есепке ала отырып, басқа жоғары және (немесе) жоғары оқу орнынан кейінгі білім беру ұйымына (ел ішінде немесе шет елге) ауыстыру;
2) әкімші (бұдан әрі – Әкімші) – құжаттар қабылдауды және Тәуелсіз сараптамалық комиссия (бұдан әрі – ТСК) мен Үміткерлерді іріктеу жөніндегі қорытынды комиссияның жұмысын ұйымдастыруды жүзеге асыратын ғылым және жоғары білім саласындағы уәкілетті органның ведомстволық бағынысты заңды тұлғасы;
3) ғылым және жоғары білім саласындағы уәкілетті орган – жоғары және жоғары оқу орнынан кейінгі білім беру саласындағы басшылықты және салааралық үйлестіруді жүзеге асыратын Қазақстан Республикасының орталық атқарушы органы;
4) "электрондық үкіметтің" веб-порталы – нормативтік құқықтық базаны қоса алғанда, бүкіл шоғырландырылған үкіметтік ақпаратқа және электрондық нысанда көрсетілетін мемлекеттік қызметтерге, табиғи монополиялар субъектілерінің желілеріне қосуға техникалық шарттарды беру жөніндегі қызметтерге және квазимемлекеттік сектор субъектілерінің қызметтеріне қол жеткізудің бірыңғай терезесі болатын ақпараттық жүйе (бұдан әрі – портал);
5) электрондық цифрлық қолтаңба – электрондық цифрлық қолтаңба құралдарымен жасалған және электрондық құжаттың дұрыстығын, оның тиесілілігін және мазмұнының өзгермейтіндігін растайтын электрондық цифрлық таңбалар жиынтығы (бұдан әрі – ЭЦҚ).
4. Жоғары және жоғары оқу орнынан кейінгі білім беру бағдарламалары бойынша шетелге оқуға жіберуді ғылым және жоғары білім саласындағы уәкілетті орган Қазақстан Республикасының және шет елдердің үкіметтері немесе ведомстволары арасында жасалған шарттар мен келісімдер негізінде үйлестіреді.
5. Ғылым және жоғары білім саласындағы уәкілетті орган мен Әкімші 5 (бес) жұмыс күні ішінде Қазақстан Республикасының және шет елдердің үкіметтері немесе ведомстволары арасында жасалған шарттар мен келісімдер шеңберінде шетелде оқу үшін үміткерлерді іріктеу жөніндегі құжаттарды қабылдаудың басталғаны туралы өзінің ресми сайттарында дипломатиялық нотаны алған күннен бастап хабарландыру орналастырады.";
9-тармақ мынадай редакцияда жазылсын:
"9. Қазақстан Республикасы Үкіметі немесе ведомстволары мен шетелдік мемлекеттер арасында қол қойылған жоғары және (немесе) жоғары оқу орнынан кейінгі білім беру саласындағы халықаралық шарттар шеңберінде шетелде оқуға ұсынылатын және резервтік тізімге қосылатын үміткерлерді іріктеуді Үміткерлерді іріктеу жөніндегі қорытынды комиссия жүзеге асырады.";
11 және 12-тармақтар мынадай редакцияда жазылсын:
"11. Тәуелсіз сараптамалық және Үміткерлерді іріктеу бойынша қорытынды комиссиялардың құрамы мен Тәуелсіз сараптамалық және Үміткерлерді іріктеу бойынша қорытынды комиссиялар туралы ереже ғылым және жоғары білім саласындағы уәкілетті органның бұйрығымен бекітіледі.
12. ТСК жоғары және (немесе) жоғары оқу орнынан кейінгі білім беру саласындағы халықаралық шарттар шеңберінде шетелде оқуға конкурсқа қатысу үшін құжаттарды қабылдау аяқталған күннен бастап 20 (жиырма) жұмыс күнінен кешіктірмей жүргізеді.";
18 және 19-тармақтар мынадай редакцияда жазылсын:
"18. Әкімші үміткерлерді іріктеу жүргізілген күннен бастап 5 (бес) жұмыс күні ішінде Тізімді кейіннен қабылдаушы тарапқа дипломатиялық арналар арқылы беру үшін ғылым және жоғары білім саласындағы уәкілетті органға береді.
Ғылым және жоғары білім саласындағы уәкілетті органның сұрау салуы бойынша Әкімші үміткерлердің қалыптастырылған жеке істерін осындай сұрау салу келіп түскен кезден бастап 5 (бес) жұмыс күні ішінде береді.
19. Тізім Үміткерлерді іріктеу жөніндегі қорытынды комиссияның отырысы өткізілгеннен кейін күнтізбелік екі күн ішінде ғылым және жоғары білім саласындағы уәкілетті органның және Әкімшінің интернет-ресурстарында орналастырылады.";
21-тармақ мынадай редакцияда жазылсын:
"21. Конкурс жеңімпазы қабылдаушы тараптан ғылым және жоғары білім саласындағы уәкілетті орган дипломатиялық арналар арқылы оқуға қабылданған үміткерлердің түпкілікті тізімін алған күннен бастап күнтізбелік 60 (алпыс) күн ішінде Әкімшімен осы Қағидалардың 7-қосымшасына сәйкес үлгілік нысандар бойынша оқыту шартын (бұдан әрі – шарт) жасасады, шарт міндетті түрде мыналарды қамтиды:
1) шарттың мәні;
2) тараптардың құқықтары мен міндеттемелері;
3) оқу мерзімі мен шарттары;
4) конкурс жеңімпазын шетелде академиялық оқуды аяқтағаннан кейін міндетті түрде Қазақстан Республикасына қайтару және 1 (бір) жылдық мерзімге үздіксіз еңбек қызметін жүзеге асыру туралы шарт.
5) уақытша консулдық есепке міндетті түрде қою туралы шарт.";
24-тармақ мынадай редакцияда жазылсын:
"24. Көрсетілетін қызметті алушы жоғары және жоғары оқу орнынан кейінгі білім беру саласындағы халықаралық шарттар шеңберінде шетелде оқуға арналған конкурсқа қатысу үшін көрсетілетін қызметті берушіге көрсетілетін қызметті беруші арқылы немесе портал арқылы жоғары және жоғары оқу орнынан кейінгі білім беру саласындағы халықаралық шарттар шеңберінде мемлекеттік қызметте көзделген құжаттарды қоса бере отырып, өтініш береді.";
30-тармақ жаңа редакцияда жазылсын:
"30. Білім беру саласындағы халықаралық шарттар шеңберінде мемлекеттік қызмет көрсету 1 (бір) жұмыс күні ішінде жүзеге асырылады және келесі рәсімдерден тұрады:
білім беру саласындағы халықаралық шарттар шеңберінде мемлекеттік қызметте көрсетілген құжаттар тізбесіне сәйкес көрсетілетін қызметті алушы ұсынған құжаттарды қабылдауға жауапты бөлімшенің қабылдауы – 15 минут;
көрсетілетін қызметті алушы ұсынған құжаттарды қабылдауға жауапты бөлімшенің конкурсқа қатысу үшін шарттар мен талаптарға сәйкестігін тексеруі – 30 минут;
құжаттарды қабылдауға жауапты бөлімшенің көрсетілетін қызметті алушы ұсынған құжаттар және (немесе) деректер (мәліметтер) дәйексіз болcа, білім беру саласындағы халықаралық шарттар шеңберінде конкурсқа қатысуға құжаттарды қабылдау туралы қолхатты немесе мемлекеттік қызметті көрсетуден жазбаша бас тартуды көрсетілетін қызметті алушыға беруі – көрсетілетін қызметті берушіге құжаттар топтамасын тапсырған сәттен бастап 7 (жеті) жұмыс сағат 15 (он бес) минут.
Ғылым және жоғары білім саласындағы уәкілетті орган өтініштерді қабылдауды және мемлекеттік қызмет көрсету нәтижелерін беруді жүзеге асыратын көрсетілетін қызметті берушіні, сондай-ақ бірыңғай байланыс орталығын осы Қағидаларға енгізілген өзгерістер және (немесе) толықтырулар туралы хабардар етеді.";
33-тармақ мынадай редакцияда жазылсын:
"33. Республикалық бюджет қаражаты есебінен академиялық оралымдылық шеңберінде шетелге оқуға жіберуді ғылым және жоғары білім саласындағы уәкілетті орган және білім беру ұйымдары жүзеге асырады.";
34 және 35-тармақтар жаңа редакцияда жазылсын:
"34. ЖЖОКБҰ бойынша орындар санын анықтау және әрбір ЖЖОКБҰ-да республикалық бюджет қаражаты есебінен жіберілетін үміткерлерді іріктеу үшін ЖЖОКБҰ-лар бойынша орындар санын анықтау және үміткерлерді іріктеу жөніндегі комиссиялар құрылады.
Құрылымдық бөлімшелердің басшыларынан тұратын ЖЖОКБҰ бойынша орындар санын айқындау жөніндегі комиссияны ғылым және жоғары білім саласындағы уәкілетті орган құрады.
Үміткерлерді іріктеу жөніндегі комиссияны ЖЖОКБҰ құрамы мәслихат депутаттары мен үкіметтік емес ұйымдардың тәуелсіз сарапшыларынан, қоғам қайраткерлерінен тұратын кемінде 15 адамнан құрады.
35. ЖЖОКБҰ бойынша орындар санын анықтау жөніндегі комиссияның төрағасы Комиссия мүшелері арасынан ашық дауыс беру жолымен Комиссия мүшелері жалпы санының көпшілік даусымен сайланады. Шешім қабылдау кезінде Төрағаны қоса алғанда Комиссияның барлық мүшелері тең дауыс беру құқығына ие. Комиссия отырысы егер оған Комиссия құрамының кемінде жартысы қатысса заңды деп есептеледі.
ЖЖОКБҰ бойынша орындар санын айқындау жөніндегі комиссияның жұмысын ЖЖОКБҰ бойынша орындар санын айқындау жөніндегі комиссияның жұмысын ұйымдастыруды жүзеге асыратын ғылым және жоғары білім саласындағы уәкілетті органның ведомстволық бағынысты заңды тұлғасы (бұдан әрі – Ұйымдастырушы) ұйымдастырады.";
37-тармақ мынадай редакцияда жазылсын:
"37. ЖЖОКБҰ-лар ғылым және жоғары білім саласындағы уәкілетті органның сұрауы бойынша Ұйымдастырушыға осы Қағидаларға 8-қосымшаға сәйкес ынтымақтастық туралы жасалған халықаралық келісімдерге сәйкес елдер және орындар бөлінісінде шетелге академиялық оралымдылық шеңберінде оқуға жіберу үшін ұсыныс жібереді.";
40, 41 және 42-тармақтар мынадай редакцияда жазылсын:
"40. Ұйымдастырушы ғылым және жоғары білім саласындағы уәкілетті органға ЖЖОКБҰ бойынша орындар санын айқындау жөніндегі комиссия отырысының еркін нысанда жасалған хаттамасын жібереді.
41. Ғылым және жоғары білім саласындағы уәкілетті орган ЖЖОКБҰ бойынша орындар санын айқындау жөніндегі комиссияның хаттамасына сәйкес бұйрық шығарады.
42. Ғылым және жоғары білім саласындағы уәкілетті орган мен ЖЖОКБҰ-лар жыл басында шетелге оқуға жіберу үшін конкурс жариялайды.";
65-тармақ жаңа редакцияда жазылсын:
"65. Академиялық оралымдылық шеңберінде мемлекеттік қызмет көрсету 1 (бір) жұмыс күні ішінде жүзеге асырылады және келесі рәсімдерден тұрады:
академиялық ұтқырлық шеңберінде мемлекеттік қызметте көрсетілген құжаттар тізбесіне сәйкес көрсетілетін қызметті алушы ұсынған құжаттарды қабылдау және толықтығын тексеру – 15 минут;
көрсетілетін қызметті алушы ұсынған құжаттардың конкурсқа қатысу шарттары мен талаптарына сәйкестігін тексеру – 30 минут;
көрсетілетін қызметті алушы ұсынған құжаттар және (немесе) деректер (мәліметтер) дәйексіз болса, конкурсқа қатысуға құжаттарды қабылдау туралы қолхат беру не академиялық оралымдылық шеңберінде мемлекеттік қызметті көрсетуден жазбаша бас тарту – көрсетілетін қызметті берушіге құжаттар топтамасын тапсырған сәттен бастап 7 (жеті) жұмыс сағаты 15 (он бес) минут.
Ғылым және жоғары білім саласындағы уәкілетті орган өтініштерді қабылдауды және мемлекеттік қызмет көрсету нәтижелерін беруді жүзеге асыратын көрсетілетін қызметті берушіні, сондай-ақ бірыңғай байланыс орталығын осы Қағидаларға енгізілген өзгерістер және (немесе) толықтырулар туралы хабардар етеді.".
2. Қазақстан Республикасы Ғылым және жоғары білім министрлігінің Жоғары және жоғары оқу орнынан кейінгі білім комитеті Қазақстан Республикасының заңнамасында белгіленген тәртіппен:
1) осы бұйрықтың Қазақстан Республикасы Әділет министрлігінде мемлекеттік тіркелуін;
2) осы бұйрық ресми жарияланғаннан кейін оны Қазақстан Республикасы Ғылым және жоғары білім министрлігінің интернет-ресурсында орналастыруды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Ғылым және жоғары білім вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасының Ғылым және жоғары білім министрі |
С. Нурбек |
"КЕЛІСІЛДІ"
Қазақстан Республикасының
Қаржы министрлігі
"КЕЛІСІЛДІ"
Қазақстан Республикасының
Сыртқы істер министрлігі
"КЕЛІСІЛДІ"
Қазақстан Республикасының
Ұлттық экономика министрлігі
"КЕЛІСІЛДІ"
Қазақстан Республикасының
Цифрлық даму,
инновациялар және аэроғарыш
өнеркәсібі министрлігі
