Консультациялық-диагностикалық көмек көрсету ережесiн бекiту туралы

Күшін жойған

Қазақстан Республикасы Денсаулық сақтау министрінің 2006 жылғы 25 қыркүйектегі N 433 Бұйрығы. Қазақстан Республикасының Әділет министрлігінде 2006 жылғы 14 қазанда Нормативтік құқықтық кесімдерді мемлекеттік тіркеудің тізіліміне N 4425 болып енгізілді. Күші жойылды - Қазақстан Республикасы Денсаулық сақтау министрінің 2009 жылғы 2 қарашадағы N 633 Бұйрығымен.

      Күші жойылды - Қазақстан Республикасы Денсаулық сақтау министрінің 2009.11.02 N 633 бұйрығымен.

      Қазақстан Республикасының "Денсаулық сақтау-жүйесi туралы" 2003 жылғы 4 маусымдағы N 430-ІІ , "Азаматтардың денсаулығын сақтау туралы" 2006 жылғы 7 шiлдедегi N 170-III және "Қазақстан Республикасының кейбiр заңнамалық актiлерiне денсаулық сақтау мәселелерi бойынша өзгерiстер мен толықтырулар енгiзу туралы" 2006 жылғы 7 шілдедегі N 171-ІІІ Заңдарына сәйкес, БҰЙЫРАМЫН :
      1. Осы бұйрыққа қосымшаға сәйкес Консультациялық-диагностикалық көмек көрсету ережесi бекiтiлсiн.
      2. Облыстардың, Астана және Алматы қалалары денсаулық сақтау департаменттерiнiң басшылары (келiсiм бойынша) осы бұйрыққа сәйкес консультациялық-диагностикалық көмек көрсетудi қамтамасыз етсiн.
      3. Қазақстан Республикасы Денсаулық сақтау министрлiгi Емдеу-алдын алу iсi департаментiнiң директоры Б.С.Байсеркин осы бұйрықты Қазақстан Республикасы Әдiлет министрлiгiне мемлекеттiк тiркеуге жiберсiн.
      4. Қазақстан Республикасы Денсаулық сақтау министрлiгi Ұйымдастыру-құқықтық жұмыс департаментiнiң директоры Д.В.Акрачкова осы бұйрықты Қазақстан Республикасы Әдiлет министрлiгiнде мемлекеттiк тiркеуден өткеннен кейiн оны бұқаралық ақпарат құралдарында ресми жариялауға жiберсiн.
      5. Осы бұйрықтың орындалуын бақылау Қазақстан Республикасы Денсаулық сақтау вице-министрi А.А.Ақановқа жүктелсiн.
      6. Осы бұйрық ресми жарияланған күнiнен бастап қолданысқа енгiзiледi.

      Министр

Қазақстан Республикасы  
Денсаулық сақтау министрінің
2006 жылғы 25 қыркүйектегі
N 433 бұйрығымен бекітілген

  Консультациялық-диагностикалық көмек
көрсету ережесі

1. Жалпы ережелер

      1. Осы консультациялық-диагностикалық көмек көрсету ережесі  (бұдан әрі - Ереже) азаматтарға лицензиясы болған жағдайда меншік нысаны мен ведомстволық тиесілігіне қарамастан консультациялық-диагностикалық көмек көрсету тәртібін айқындайды.

      2. Осы Ережеде мынадай негізгі ұғымдар пайдаланылады:
      1) консультациялық-диагностикалық көмек - тәулiк бойы медициналық бақылаусыз мамандандырылған немесе жоғары мамандандырылған медициналық көмек;
      2) мамандандырылған медициналық көмек - диагностиканың, емдеу және медициналық оңалтудың арнайы әдiстерiн пайдалануды талап ететiн аурулар кезiнде бейiндiк мамандар көрсететiн медициналық көмек;
      3) жоғары мамандандырылған медициналық көмек - диагностиканың, емдеу және медициналық оңалтудың жаңа технологияларын пайдалануды талап ететiн аурулар кезiнде денсаулық сақтау саласындағы уәкiлеттi орган айқындайтын медициналық ұйымдарда бейiндiк мамандар көрсететiн медициналық көмек;
      4) бейiндi маман - клиникалық бейiндегi белгiлi бiр мамандық бойынша сертификаты бар, жоғары медициналық бiлiмдi медицина қызметкерi;
      5) диагностика мен емдеудің кезеңдік хаттамалары - денсаулық сақтау саласындағы уәкiлеттi орган бекіткен медициналық көмекті көрсету кезіндегі емдеу-диагностикалық іс-шаралардың ең аз нормативтері (бұдан әрі - хаттамалар);
      6) бастапқы медициналық-санитарлық көмек маманы - тәуліктік медициналық бақылаусыз дәрігерге дейінгі немесе білікті медициналық көмек көрсететін медициналық қызметкерлер: учаскелік терапевт, педиатр, акушер-гинеколог, жалпы практика дәрігері (бұдан әрі - БМСК маманы);
      7) емделуші - медициналық қызметті тұтынушы болып табылатын жеке тұлға.

2. Консультациялық-диагностикалық
көмек көрсетудің тәртібі

      3. Консультациялық-диагностикалық көмек алдын алу, диагностикалық және емдеу қызметтері нысанында көрсетіледі.

      4. Алдын алу қызметі:
      1) БМСК мамандарымен бірлесе отырып, халықтың жекелеген топтарына алдын алу тексерулерін жүргізуді;
      2) сырқаттардың жекелеген топтарына диспансерлік бақылауды;
      3) айналасындағылар үшін қауіп төндіретін ауруларды, сондай-ақ кәсіби ауруларды болдырмау жөніндегі алдын алу медициналық іс-шараларын өткізуді;
      4)  негізгі аурулар кезінде қауіп-қатердің мінез-құлықтық факторларының алдын алуды қоса алғанда, салауатты өмір салтын қалыптастыру жөніндегі іс-шараларды жүзеге асыруды қамтиды.

      5. Диагностикалық қызметтер:
      1) зертханалық және аспаптық зерттеулерге медициналық айғақтары бойынша емделушілерді жіберуді;
      2) уақытша еңбекке жарамсыздық парағын (анықтамаларын) бере және ұзарта отырып, сырқаттардың уақытша еңбекке жарамсыздығына сараптама жүргізуді;
      3) медициналық айғақтары бойынша сырқатты мамандандырылған немесе жоғары мамандандырылған медициналық көмек көрсететін медициналық ұйымдарға стационарлық емдеуге жіберуді қамтиды.

      6. Емдеу қызметі мыналарды қамтиды:
      1) емделуші қиын жағдайдан шыққанға дейін жедел медициналық көмек бригадасы келгенге дейін шұғыл көмек көрсету;
      2) медициналық айғақтары бойынша емделушіге дәрілік заттарды тағайындау;
      3) емдеуге жатқызуды талап етпейтін жоспарлы түрде хирургиялық операцияларды жүргізу;
      4) емдеу манипуляцияларын жүргізу;
      5) медициналық айғақтар бойынша физиоемшаралар тағайындау;
      6) стоматологиялық көмек көрсету;
      7) рецептер жазып беру, оның ішінде тегін/жеңілдікті дәрі-дәрмекпен қамтамасыз етуге;
      8) тәуліктік медициналық бақылау мен емдеуді талап етпейтін сырқаттарға емдеу, алдын алу және оңалту іс-шараларын жүргізу мақсатында стационарды алмастыратын медициналық көмек көрсету;
      9) тасымалдауға болмайтын сырқаттарды үйде консультациялық тексеруді жүзеге асыру.

      7. Бейінді маман консультациялық-диагностикалық көмек көрсетуі БМСК маманының жолдамасы бойынша жүзеге асырылады.

      8. Консультациялық-диагностикалық көмекті бейiндi маман хаттамаларға сәйкес көрсетеді.
      Хаттамалар болмаған жағдайда диагностикалық және емдеу қызметтерінің көлемі жалпыға бірдей тәсілдерге сәйкес медициналық айғақтар бойынша белгіленеді.

      9. Бейінді маман емделушіге жүргізілген тексерулер мен емдеулер, сондай-ақ емделушіні одан әрі қарау жөніндегі ұсынымдар қорытындысын емделуші жіберілген дәрігерге жолдайды.

      10. Стационардан шығарғаннан кейін емделушіні жағдайына және ұсынымының сипатына қарай одан әрі бақылауды бейінді маман немесе БМСК маманы жүзеге асырады.

      11. Консультациялық-диагностикалық көмек көрсету кезінде денсаулық сақтау ұйымдары мынаны қамтамасыз етеді:
      1) лицензияға сәйкес сапалы медициналық көмек көрсетудi;
      2) профилактиканың, диагностика мен емдеудiң әдiстерiн, сондай-ақ денсаулық сақтау саласындағы уәкiлеттi орган рұқсат берген дәрiлiк заттарды қолдануды;
      3) айналасындағыларға қауiптi болып табылатын аурулардың, сондай-ақ кәсiби аурулардың алдын алу, диагностикалау мен емдеу жөнiндегi профилактикалық медициналық iс-шараларды жүргiзудi;
      4) азаматтарға медициналық көмектiң нысандары мен түрлерi туралы тегiн, жедел және шынайы ақпарат ұсынуды;
      5) санитарлық-эпидемиологиялық ережелер мен нормаларды, гигиеналық нормативтердi сақтауды;
      6) салауатты өмiр салтын насихаттауды және халықты гигиеналық оқытуды;
      7) басқа да денсаулық сақтау ұйымдарымен өзара iс-қимыл мен сабақтастықты;
      8) бастапқы медициналық құжаттарды жүргiзудi, денсаулық сақтау саласындағы уәкiлеттi орган белгiлеген нысандар, түрлер, көлем, тәртiп пен мерзiмдер бойынша есептер тапсыруды;
      9) айналасындағыларға қауiптi болып табылатын жұқпалы аурулар, улану, психикалық және мiнез-құлықтың бұзылу жағдайлары туралы денсаулық сақтау саласындағы тиiстi мемлекеттiк органдарға хабарлауды қамтамасыз етуді;
      10) практикаға уәкілетті орган ұсынған аурулардың алдын алуды, диагностиканың және емдеудің жаңа әдістерін енгізуді.

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады